Irunabar, Irungo bertsoaren bilgunea

Archive for the category “Berriak”

09 maiatza 2025

Bertso kantu bazkaria maiatzaren 31n, Joxe Mari Lopetegiren jaiotzaren 150. urteurrena ospatzen jarraitzeko

Irungo Atsegiña Elkartean bertso kantu bazkaria antolatu dugu Txingudiko bertso eskolako bertso-tailerrak eta Irunabarrek, maiatzaren 31rako. Txartelak Atsegiña tabernan eta Bidasoko AEK Irungo euskaltegian izango dituzue salgai, 20 euroan, maiatzaren 26ra arte, gehienez ere. Beraz, bizkor ibili!

Joxe Mariren ondorengoak eta haien adiskideak ere burubelarri ditugu antolakuntza lanetan murgilduta, bazkari prestaketa kontuetan, besteak beste. Horren harira, txartela erosten duten bazkaltiarrek antolatzaileekin harremanetan jartzeko modua izango dute 688 826 433 telefono zenbakira idatzita, elikaduraren nahasmendurik edo menuaren gaineko oharrik egin nahi izanez gero (haragirik ez…).

Ea apirilaren 13koa bezain arrakastatsua egiten dugun maiatzaren 31koa ere. Zuen zain izango gara. Anima zaitezte. Primeran bazkaldu eta hobeto pasatuko dugu.

Posted in Berriak and tagged Bertso-tailerra,Joxe Mari Lopetegi,txingudiko bertso eskola | Utzi iruzkina

02 maiatza 2025

Lopetegi oroitzeko kantaldiak harrera ezin hobea. Eskerrik asko guztioi. Orain kantu bazkariaren txanda (2025-05-31)

Joan den apirilaren 13an jendeak estu moldatu behar izan zuen Irunabarrek Joxe Mari Lopetegi oroitu eta omentzeko Bidasoako EKTn antolatu zuen kantaldian. Eskerrik beroenak eman nahi dizkizuegu Txingudiko bertso-eskolako bertso-tailerraren, Irunabarren eta Lopetegiren ondorengoen partez, modu batera zein bestera kantaldian parte hartu zenuten guzti-guztioi.

Orain kantu bazkari herrikoiaren txanda da. Irungo Atsegiñan antolatu dugu maiatzaren 31rako, larunbatarekin, eta laster zabalduko dugu kartela. Animatuko ahal zarete! Bien bitartean, joan den apirilaren 13ko kantaldiko irudi batzuk hementxe:

Azkenik, horra Joxan Elosegik beti bezain fin eta eskuzabal ikus-entzule guztientzat apailatutako liburuxka.

Posted in Berriak,Kronikak and tagged Bertso-tailerra,Bidasoako EKT,Joxe Mari Lopetegi | Utzi iruzkina

17 Aza 2024

Bertso saioa Larreaundi-Olaberria auzoko euskararen egunean [2024-11-30]

Kaixo, bertsozale:

Larreaundi-Olaberriako Auzo Elkarteak egitarau zabala antolatu du Euskararen Nazioarteko Egunaren giran.
Dakizuenez, abenduaren 3an den arren, azaroaren 30ean, larunbatean, burutuko dira ekimen gehienak. Tartean, eguerditik hasita, bertso-saioa eskainiko dute Manu Goiogana Bengoetxea eta Igauri Lopetegi Amostegi irundarrek eta Jon Luzuriaga Iurramendi ikaztegietarrak.
Jarraian egitarau osoaren berri ematen duten afitxak dauzkazu ikusgai:

Posted in Berriak,Bertso saioa and tagged 'Euskararen Egunak',Igauri Lopetegi,Jon Luzuriaga,Larreaundi-Olaberriako Auzo Elkartea,Manu Goiogana | Utzi iruzkina

10 Urr 2024

Ikasturtea hasi dugu, baina izen emateko aukera beti dago zabalik [2024-10-10]

Kaixo, bertsozale:

Ikasturteari ekin diogu jada, baina gogoan izan urte osoan zehar zabalik dagoela Txingudiko bertso-eskoletan izena emateko aukera. Bertsolaritzaren alderdi “guztiak” lantzeko moduko taldeak ditugu gurean: bat-batean aritzeko, aritzen ikasteko, trebatzeko, idatzizkorako, eskualdean bertsolaritza sustatzeko…

Oraingoz aktibo dauzkagun bertso-eskolak hauek dira:

1- Gazte eta heldu hasi berrien bertso-eskola: asteazken arratsaldeetan. Igauri Lopetegi da arduraduna.
2- Bat-batean I bertso-eskola: asteazken arratsaldeetan. Igauri Lopetegi da arduraduna.
3- Bat-batean II bertso-eskola: ostegun arratsaldeetan. Abel Zabala da arduraduna.

Hala ere, ez da baztertzen ikasturtean zehar beste talderen bat sortzeko aukera. Bertso-tailerra edo bertso jarriak lantzeko taldea esaterako.

Beraz, edozein dela ere bertsolaritzara hurbiltzeko buruan duzu(e)n manera, ez izan zalantzarik, eta idatzi irunabar@gmail.com helbide elektronikora. Gu geu jarriko gara zu(r)ekin harremanetan, eta hitz egingo dugu.

Jarraian Iruneroko urriko zenbakian argitaratua: https://irunero.eus/ikasturte-berria-bertsolari-hasiberri-zein-eskarmentudunentzat-ere-hasiko-da/

Posted in Berriak,Besterik and tagged txingudiko bertso eskola | Utzi iruzkina

09 Ira 2024

Ikasturte honetan ere bailarako hedabideekin elkarlanean ariko gara

Irunabarren helburuetako bat bertsoa inguruko hainbat txokotara helaraztea ere badenez, badira zenbait ikasturte bailarako hedabideekin elkarlanean ari garela.

Hasi berri dugun 2024/25 hau seigarren ikasturtea dugu Bidasoko Hitzarekin elkarlanean. Irailean hasi eta ekaina bitarte, hilero, eta hilabeteko azken ostiraletan, Txingudiko bertso-eskoletako kide batek bertso-jarriak argitaratuko ditu aipatutako aldizkariko papereko edizioan, eta egun gutxi batzuk igaro ondoren, eskuragarri izango duzue argitalpen hori bera baita bertsio digitalean ere. Nola ez, Irunabarren webgunera ere ekarriko ditugu bertso horiek guztiak.

Irunero aldizkariarekin hasitako elkarlana oraindik lehenagokoa da. Zortzigarren ikasturtez jarraian, Txingudiko bertso-eskoletako kideren baten bertso jarriek argia ikusiko dute hilero. Iruneroren kasuan, hilabete hasieran argitaratuko da elkarlanaren emaitza, eta kasu honetan ere paperezko edizioan zein bertsio digitalean egongo da ikusgai. Ikasturtea urria hasieran hasi eta ekainean amaituko da, eta Iruneroko sorta guztiak ere Irunabarren webgunera ekarriko ditugu.

Horretaz gain, osagarri modura, idatzitako sorta hauek musikatzen direnean ere eskuragarri izango dituzue webguneko argitalpenetan zein Ivoox-eko gure kanalean (harpidetu zaitezte!). Gero eta gehiago zarete elkarlan hauetako bertso-sortaren bat musikatzera animatu zaretenak. Ikasturte honetan ere animatuko bazinate plazer handiz jasoko genituzke zuek musikatu eta kantatutako bertso-sortak irunabar@gmail.com helbidean.

Hona hemen pasa den ikasturtean argitaratu eta musikatutako zenbait bertso-sorta:

“Hemen duzu nire sorta”, Rafa Rodrigo Perurenak 2024ko apirilean Bidasoako Hitzan argitaratu eta Rafak berak musikatutako bertso-sorta:

Hemen jaitsi dezakezu

“Eskolatik jasotzeko”, Manu Goiogana Bengoetxeak 2024ko marxoan Iruneron argitaratu eta Makalo Jauregi Belokik musikatutako bertso-sorta:

Hemen jaitsi dezakezu

“Ibaitik itsasora”, Igauri Lopetegi Amostegik 2023ko azaroan Bidasoako Hitzan argitaratu eta Peio Etxeberriak musikatutako bertso-sorta:

Hemen jaitsi dezakezu

Posted in Berriak,Bertsoak and tagged bertso-paperak,Eleuterio Jauregi "Makalo",Igauri Lopetegi,Irunero,Manu Goiogana,Oarso-Bidasoaldeko Hitza,Peio Etxeberria,Rafa Rodrigo | Utzi iruzkina

08 Abu 2024

Txingudiko bertso-eskolak: 2024-2025 ikasturtea. Izen-ematea abian.

Azken ikasturteetan bezalaxe, datorrenean ere hainbat talde izango dira Txingudiko bertso-eskolan, 2024ko urritik aurrera: haur, nerabe eta gazteentzako bertso-eskolak, hasiberrientzako bertso-eskolak, bertso-tailerra, bat-bateko jardunerako taldeak, …

Izena emateko, edo informazioa behar baduzu, idatzi lasai asko irunabar@gmail.com posta elektronikora eta gu geu jarriko gara zuekin harremanetan.

Anima zaitezte eta zabaldu mezua.

Posted in Berriak,Besterik and tagged txingudiko bertso eskola | Utzi iruzkina

08 Abu 2024

Moskuko jaiak 2024

Kaixo, bertsozale:

2024an ere Moskuko jaiak egongo dira eta aurten ere, egitarau zabal eta aberats baten baitan, bertso-saioa antolatu du Irunabar, Irungo bertsoaren bilguneak, Moskuko jai batzordeko kideekin elkarlanean.

Bertso-saioa, ostegunean izango da, abuztuaren 15ean. Plazan izango da, arratsaldeko 19:30ean. Adrian Arruti gai-jartzailearen esanetara ariko dira kantuan Oihana Bartra santutxuarra, Nerea Elustondo legazpiarra, Libe Goenaga getariarra eta Irantzu Idoate hazpandarra.

Posted in Berriak,Bertso saioa and tagged Adrian Arruti,Irantzu Idoate.,LIbe Goenaga,moskuko jaiak,Nerea Elustondo,Oihana Bartra | Utzi iruzkina

08 Abu 2024

Euskal Jirako bertso-saioa [2024-08-03]

Kaixo, bertsozale:

Aurten Igauri Lopetegi, Aitor Mendiluze eta Aitor Sarriegi aritu dira bertsotan pasa den larunbatean, abuztuaren 3an, Urdanibia plazan. Oholtzan aritzeaz gain, auzoko taberna ezberdinetan zehar aritu dira.

Posted in Berriak,Bertso saioa and tagged Aitor Mendiluze,Aitor Sarriegi,Euskal Jira,Igauri Lopetegi | Utzi iruzkina

17 Uzt 2024

“Onbuaren itzalak” figuranteak behar ditu Hondarribian, 2024-08-03an, 9:00etan.

Onbuaren itzala filmatzen ari dira dagoeneko, eta 80 figurante inguru behar dituzte 2024ko abuztuaren 3an Hondarribiko herriko etxeko areto nagusia betetzeko. Filmaketan parte hartzeko prest dagoenak 653 71 56 64 telefono zenbakira deitu behar du, eta bertan emango dizkiote jakin beharreko guztien gaineko azalpenak.

Segidan, antolatzaileek zabaldu duten testua:

“Arratsalde on lagun hori.
Oraingo honetan eskeintza-eskaera bat egitera natorkizu.
Segurozko gaia honetaz zerbait entzuna izango duzula azken hilabete hauetan
Horrela ez bada orain bidaltzen dizudan imajinaren bidez berri izango duzu.
Motx motxean agertu nahi dizudana da, zuretaz-zuetaz gogoratu naizela honen berri ematerakoan. Zure-zuen beharra izango bai du Euskal kultur ekintza honetarako Patxi Biskert Tasio filmako aktoreak, orain esku artean eta grabaketa lan aurreratuan Hondarribian Abuztuaren 3an egitera dijoan grabaziorako.
80-90 pertsonaren beharrean aurkitzen da Hondarribiko UDAL ARETO NAGUSIA entzulez bete ahal izateko.
OMBUREN ITZALA Pellomari Otaño bertsolari izanduaren bizitzaz izango den filmaz ari gara.
Denon arte lortzeko saioan buru belarri sartuta gaude. Ta gaude esaten dut, zurekin ere kontatu nahi bai dugu AUZOLANEAN aurrera eramanez bukatu nahi dugulako.
Karteltxoarekin obeto irudikatuko duzulakoan, zure deiaren zai gelditzen gara.
Animatuko zarelakoan-zaretelakoan agur eta ongi etorri bero bat.
Deitu tfno honetara
653715664
Eta mila esker aurreratuak.
Ez utzi azken ordu arte mesedez.”

Posted in Berriak and tagged Patxi Bisquert,Pello Mari Otaño | Utzi iruzkina

11 Eka 2024

Txingudiko bertso-eskolen eguna [2024-06-08]

Zazpi urteren ondoren, Irunabar, Irungo bertsoaren bilguneko kideok berreskuratu egin dugu Txingudiko bertso-eskolen eguna.

Kateako Auzo Elkarteko areto nagusian ospatu genuen (Eskerrik asko, Maider!), eta lagun-giro ezinhobean joan zitzaigun arratsaldea, Otazpi tabernako lagunek prestatutako arroza, kroketa eta tortillaz lagunduta, besteak beste.

Oholtza gainean “denetik” izan bazen ere, bertso-saio musikatua osatu genuen guztion artean. Musikari lanetan, Aitor (kitarra), Iban (baxua) eta Beñat (mandolina) aritu ziren.

Saioa aurkezten eta ekitaldiaren gidari, Egoitz aritu zen.

Oholtzan kantari Iker, Jon, Lorea (bejondaiela zure kuadrilako guztiei!), Joseba, Abel, Iñigo, Urko, Adrian, Xabier, Andoni, Aiora, Maider eta Igauri aritu ziren.

Eta Arratsaldeko bertso-sortak Lorea, Aiora, Maider eta Jonen eskutik heldu zitzaizkigun.

Ederki pasa genuen. Egun ahaztezina. Datorren ikasturtean gehiago. Hobeto? Kostako zaigu. Horretarako, 2024-2025 ikasturteak joan berri denak baino gehiago eman beharko digu. Erronka mahai gainean da, heldu nahi dionarentzat.

Eskerrik asko guztioi!