Azken ikasturteetan bezalaxe, datorrenean ere hainbat talde izango dira Txingudiko bertso-eskolan, 2024ko urritik aurrera: haur, nerabe eta gazteentzako bertso-eskolak, hasiberrientzako bertso-eskolak, bertso-tailerra, bat-bateko jardunerako taldeak, …
Izena emateko, edo informazioa behar baduzu, idatzi lasai asko irunabar@gmail.com posta elektronikora eta gu geu jarriko gara zuekin harremanetan.
2024an ere Moskuko jaiak egongo dira eta aurten ere, egitarau zabal eta aberats baten baitan, bertso-saioa antolatu du Irunabar, Irungo bertsoaren bilguneak, Moskuko jai batzordeko kideekin elkarlanean.
Bertso-saioa, ostegunean izango da, abuztuaren 15ean. Plazan izango da, arratsaldeko 19:30ean. Adrian Arruti gai-jartzailearen esanetara ariko dira kantuan Oihana Bartra santutxuarra, Nerea Elustondo legazpiarra, Libe Goenaga getariarra eta Irantzu Idoate hazpandarra.
Aurten Igauri Lopetegi, Aitor Mendiluze eta Aitor Sarriegi aritu dira bertsotan pasa den larunbatean, abuztuaren 3an, Urdanibia plazan. Oholtzan aritzeaz gain, auzoko taberna ezberdinetan zehar aritu dira.
Onbuaren itzala filmatzen ari dira dagoeneko, eta 80 figurante inguru behar dituzte 2024ko abuztuaren 3an Hondarribiko herriko etxeko areto nagusia betetzeko. Filmaketan parte hartzeko prest dagoenak 653 71 56 64 telefono zenbakira deitu behar du, eta bertan emango dizkiote jakin beharreko guztien gaineko azalpenak.
Antolatzaileek zabaldu duten irudia
Segidan, antolatzaileek zabaldu duten testua:
“Arratsalde on lagun hori. Oraingo honetan eskeintza-eskaera bat egitera natorkizu. Segurozko gaia honetaz zerbait entzuna izango duzula azken hilabete hauetan Horrela ez bada orain bidaltzen dizudan imajinaren bidez berri izango duzu. Motx motxean agertu nahi dizudana da, zuretaz-zuetaz gogoratu naizela honen berri ematerakoan. Zure-zuen beharra izango bai du Euskal kultur ekintza honetarako Patxi Biskert Tasio filmako aktoreak, orain esku artean eta grabaketa lan aurreratuan Hondarribian Abuztuaren 3an egitera dijoan grabaziorako. 80-90 pertsonaren beharrean aurkitzen da Hondarribiko UDAL ARETO NAGUSIA entzulez bete ahal izateko. OMBUREN ITZALA Pellomari Otaño bertsolari izanduaren bizitzaz izango den filmaz ari gara. Denon arte lortzeko saioan buru belarri sartuta gaude. Ta gaude esaten dut, zurekin ere kontatu nahi bai dugu AUZOLANEAN aurrera eramanez bukatu nahi dugulako. Karteltxoarekin obeto irudikatuko duzulakoan, zure deiaren zai gelditzen gara. Animatuko zarelakoan-zaretelakoan agur eta ongi etorri bero bat. Deitu tfno honetara 653715664 Eta mila esker aurreratuak. Ez utzi azken ordu arte mesedez.”
Zazpi urteren ondoren, Irunabar, Irungo bertsoaren bilguneko kideok berreskuratu egin dugu Txingudiko bertso-eskolen eguna.
Kateako Auzo Elkarteko areto nagusian ospatu genuen (Eskerrik asko, Maider!), eta lagun-giro ezinhobean joan zitzaigun arratsaldea, Otazpi tabernako lagunek prestatutako arroza, kroketa eta tortillaz lagunduta, besteak beste.
Oholtza gainean “denetik” izan bazen ere, bertso-saio musikatua osatu genuen guztion artean. Musikari lanetan, Aitor (kitarra), Iban (baxua) eta Beñat (mandolina) aritu ziren.
Saioa aurkezten eta ekitaldiaren gidari, Egoitz aritu zen.
Oholtzan kantari Iker, Jon, Lorea (bejondaiela zure kuadrilako guztiei!), Joseba, Abel, Iñigo, Urko, Adrian, Xabier, Andoni, Aiora, Maider eta Igauri aritu ziren.
Eta Arratsaldeko bertso-sortak Lorea, Aiora, Maider eta Jonen eskutik heldu zitzaizkigun.
Ederki pasa genuen. Egun ahaztezina. Datorren ikasturtean gehiago. Hobeto? Kostako zaigu. Horretarako, 2024-2025 ikasturteak joan berri denak baino gehiago eman beharko digu. Erronka mahai gainean da, heldu nahi dionarentzat.
Aurten Irungo Sagardo Egunaren antolatzaileek gogoeta urtea hartu dutela-eta, ez da Sagardo Egunik izan… Ez? Bai! Taberna menderaezin batek ohiturari eutsi nahi izan dio eta Sagardo Egun Alternatiboa antolatu zuen.
Moskuko Aranaztarra tabernak egitarau propioa egitea erabaki zuen eta, testuinguru horretan, bertso saioa antolatu zuen. Hasiera batean, protagonista izan behar zuten gure bertso-eskoletako kide eta irakasle Igauri Lopetegi Amostegi irundarrak eta Aroa Arrizubieta Barredo gasteiztarrak. Bigarrenak, ordea, ezintasuna tarteko, ezin izan zuen bertan izan eta haren ordez Emaitz Murua Arzallus oreretarra aritu zen bertsotan.
2024ko Korrika Irundik hasiko dela-eta, hamaika ekimen da eskualde osoan zehar. Girotze fase horretan, hainbat eragilerekin ari gara elkarlanean, eta Hendaiako Enbata gaztetxearekin onduko dugu hurrengo ekimena. Martxoaren 1ean, ostiralean, bertso-saio musikatua antolatu dugu Enbatako eta Aek-ko kideekin batera. Urko Casadok gidatuko du saioa, arratsaldeko 19:00etan hasiko da. Adrian Arruti, Haira Aizpurua, Manu Goiogana eta Maddi Ane Txoperena bertsolariak ariko dira, eta baita Iban Clemente, Beñat Elosegi, Oneka Jauregi eta Rafa Rodrigo musikariak ere.
Gogoratu datorren ilbeltzaren 20an egitarau txukun askoa antolatu dugula Bidasoko AEK, Landetxako auzo elkartea eta Larrea, hurbileko elikadurarekin batera. Oraindik sarrerarik erosi ez baduzu, kontuan izan erosteko azken eguna igande honetan izango dela. Saioaren gaineko informazio gehiago nahi baduzu, esteka honetan bilatuko duzu behar duzun hori. Musikari eta bertsolariak prest daude honezkero, zeren zain zaude?
Kaixo, bertsozale: 2024ko Korrika Irundik hasiko dela-eta, Bidasoko AEK eta eskualdeko gainontzeko euskara eta kultura eragileak martxoaren 14ra bitarteko asteak girotzeko lanetan hasi gara. Testuinguru horrekin, Irunabar, Irungo bertsoaren bilguneko hainbat kidek eta inguru hurbileko lagunek osatu duten halako “bertso-banda”-ren saioa antolatu dute Katea-Landetxako auzo elkartearekin batera. Bertso bazkari musikatua izango da. Bertsolariak (Adrian Arruti, Abel Zabala, Aitor Errazkin eta Manu Goiogana), musikariak (Iban Clemente, Beñat Elosegi, Rafa Rodrigo eta Maddi Sanz), eta guzti horien artean, lokailu lanetan, gai jartzailea (Gotzon Aizpiolea). Horixe da antolatutako menua. Ilbeltzaren 20an izango da, eguerdiko 14:00etan, auzo elkartean. Jatekoa Larrea, hurbileko elikadurak prestatuko du eta sarrerak 15 euroan eskuratu ahal dira, honezkero, Hazia, Depor, Aranaztarra, Nuevo, Otazpi eta Itzala tabernetan (aukera beganoa ere egongo da. Hala nahi izanez gero, idatzi 747425434 telefono zenbakira).
Bertso-saio berezia antolatu dute elkarlanean Txingudiko bertso eskolako bertso-tailerrak eta Bidasoko EKTk, Pello Mari Otaño Zizurkilgo bertsolari handiaren bizitzaren gaineko zinema proiektuaren alde: Ombuaren itzala. Patxi Bisquert da proiektu horren zuzendaria, eta Bisquertek berak emango du auzolanean oinarritu duen egitasmoaren berri, abenduaren 15ean, Irungo EKTn, 19:00etatik aurrera.
Horrez gainera, Otaño, Txirrita eta Lopetegiren bertsoak ezagutzeko eta kantatzeko aukera izango dute arrats-iluntzean zehar bertaratzen diren guztiek, bai proiektuaren aurkezpen saioan (19:00), bai afaritan (21:00). Afaltzen geratu nahi duenak 685 727539 telefono zenbakira idatzita dauka izena emateko aukera (menu “bejeta” eta beganoa erreserbatzeko aukera badago).
Bisquerten “Ombuaren itzala” proiektuaren webgune ofiziala, diru-akarpena egiteko aukera eskaintzen duena:
Irunabar, Irungo bertsoaren bilgunea 