Irunabar, Irungo bertsoaren bilgunea

Archive for the tag “Maddi Ane Txoperena”

Urriaren 3an eman genien hasiera Kabigorriko bertso gauei

Hasi da 2019-2020 ikasturteko Kabigorriko bertso gaua. Lehen saioa ederra izan zen, jende bailara bildu zen eta bertsolariak gustora aritu ziren. Saioari hasiera Abel Zabalak eman zion, hona hemen prestatutako bertso sorta:

2019KO UDAKO ERREPASOA

DOINUA: Loriak udan intza bezela

Egilea: Abel Zabala

1-Konpromisoa hartu nuen ta
sorta jartzeari ekin
hilabetean borrokatu naiz
ideiekin zein hitzekin
errepaso bat egin nahi nuke
orain ahal dela zuekin
bi mila eta hemeretziko
udak utzitakoekin.

2-Udaletako hauteskundeei
beharko erreparatu
udaberriko azken egunek
utzi zuten zenbait datu
berriro ere Sagarzazuk zein
Santanok botoak batu
Hondarribian eta Irunen
ezertxo ez da aldatu.

3-Uda parteak parranda gogoz
jartzen gaitu aldez-alde
nahiz ta urteak joaten diren
beti berdinetan gaude
ze emakume izate hutsa
ez da irteten debalde
ia jairikan ez da igaro
sexu erasorik gabe.

4-Klima kontutan nahiko sentsible
omen dabil Jaurlaritza
baina eredua aldatzea da
ezinbesteko baldintza
trenez, metroez ta errausgailuez
kokoteraino gabiltza
ingurumena kixkaltzen dute
ta kea saltzen dabiltza.

5-Gerran dago(e)nak bere herritik
nola nahi duen atera
Siriatikan iristen dira
Italiako atera
ez da goxoa Europatikan
egiten zaien harrera
Open Arms-ekin gertatu zena
horretxen adibide da.

6-Nola galerna uda betean
iritsi zen G zazpia
ta Biarritzen atera zuten
familiko argazkia
alturan gora igo ezkero
bistaratzen da azpia
gutxi batzuek zuzentzen dute
munduaren sarraskia.

7-Kristautasuna gurean ere
oraindik ez dago hila
Jainkoa eta Lege Zaharra
Jeltzaleen maratila
Urkullu jauna Batikanora
bada kilometro pila
ta militarrak Arantzazura
bedeinkazioan bila.

 

8-Sei adibide edo exenplu
aipatu ditut emeki
zein den indartsu ta zein menpeko
azaltzen dute ederki
alternatibak behar ditugu
eta garunak ireki
zeren bestela boteredunek
irabazten dute beti.

 

Jarraian, bertso gauak utzi zituen irudiak:

Hemen da 2019-2020 ikasturteko lehen Kabigorriko bertso-gaua [2019-10-03]

Kaixo bertsozale.

Hasi dugu, dagoeneko, 2019-2020 ikasturtea eta Kabigorriko bertso-gaua ere hemen da.

Zazpigarren ikasturtea izango da aurtengoa eta ohiko egitura mantenduko dugu aurten ere.

Lehen bertso-gauari urriaren 3an, ostegunean, ekingo diogu 19:30etatik aurrera. Bertsotan arituko dira Aitor Errazkin irundarra, Iñigo Izagirre itziartarra, Maddi Ane Txoperena hendaiarra eta Maindi Murua azkaindarra. Saioa Egoitz Zelaia hendaiarraren gidaritzapean egongo da eta bertso jarrien ardura Abel Zabala irundarrarena izango da.

Gogoan izan Kabigorrik aukera ezin hobea eskaintzen duela behin saioa amaituta afaltzen geratzeko ere.

Bertan elkar ikusiko dugulakoan, izan ongi!

 

Moskuko jaiak 2019

Azken urteetan bezala, aurtengo Moskuko jaietan ere bi bertso saio antolatu ditu Irunabar, Irungo bertsoaren bilguneak, Moskuko jai batzordeko kideekin elkarlanean: bertso-poteoa eta bertso saioa.

Abuztuaren 10ean izan zen lehena, herri bazkaria eta gero, arratsaldeko 17:00ak inguruan. Manu Goiogana irundarra, Maddi Ane Txoperena lesakarra eta Egoitz Zelaia hendaiarra aritu ziren auzoko tabernetan barrena kantuan. Giro bikaina ipini zuten, eta gustura geratu ziren bertaratutakoak.

Bertso saioa, berriz, igandean izan zen, abuztuaren 11n. Eguraldiaren baimena garaiz iritsiko ez ote zen beldur ibili ondoren, azkenean plazan bertan egin zen bertso saioa, eta Alaia Martin oiartzuarra, Igor Elortza durangarra eta Miren Amuriza berriztarra eta Aitor Sarriegi beasaindarra aritu ziren kantuan Egoitz Zelaia hendaiarraren esanetara. 18:30ean hasi zen saioak seriotik beste eduki zuen umoretik, eta bikain asmatu zuten 4 protagonistek Egoitzek agindutako lanak betetzen. Saioa amaitzerako plaza ere jendez beteta zegoela agurtu zituzten bertsolariek Moskuko jaiak, aurtengoz.

This slideshow requires JavaScript.

Azaroak 7, osteguna, BERTSO SAIOA Kabigorrin

Adi. Antxeta Irratiaren PROGRAMAZIO BERRIA aurkezteko baliatuko dugu hilabete hontako bertso saioa. Odei Barroso, Aimar Karrika eta Maddi Ane Txoperenarekin batera, Gotzon Aizpiolea irundarra ariko da honako honetan. Itxura ezin hobea du.

Egoitz Zelaia Hendaiarra saioa gidatzeko prest izango delarik, ARRATSALDEKO 19:00etan izango gaituzue zain, ostegun hontan, Kabigorrin.

Bertso Saio besta azaroak 7

Aurreko hilabeteko giro bera sortzea lortzen badugu mundiala izango da.

Anima zaitezte.

Moskuko bestetako saioa

Joan den abuztuan “Moskuko Bestak” izan dira, eta bertsoak izan du presentziarik, haietan ere. Hilaren 18an, larunbatarekin, bertso poteoa antolatu zuten Egoitz Zelaia, Alaia Martin eta Maddi Ane Txoperenarekin. Biharamunean, aldiz, dagoeneko ohiturazko saio bihurtzen ari den bertso jaialdia izan zen eguerdian. Bertan, Irungo bertso eskolako Aitor Errazkin aritu zen, Amaia Agirre, Xabier Silveira, Egoitz Zelaia eta Sustrai Colinarekin batera. Hemendik eskerrak eman nahi dizkiegu Moskuko Bestetako antolatzaileei, Irungo bertso eskola kontuan hartzeagatik eta gerora emandako tratu ezin hobeagatik. Bide batez, auzoko jaien antolaketan egiten ari diren lan eskerga txalotu nahi dugu baita ere. Soka luzea ekarriko duen elkarlan oparo baten hasiera izan dadila aurtengoa.

This slideshow requires JavaScript.

Post Navigation