Irunabar, Irungo bertsoaren bilgunea

01 Eka 2026

“Txakur bedeinkatuak”. Beñat Elosegi Ortiz de Zarateren bertsoak, Bidasoko Hitzan.

TXAKUR BEDEINKATUAK

Egilea: Beñat Elosegi Ortiz de Zarate

Doinua: Zer buruzbide bihotz gabe

Hemen jaitsi dezakezu

1)
Umeak baino txakur gehiago
ditugulako dut kezka,
jaso gabeko kakak direla
ixkinetan pixa festa,
belardietan ezin ibili
ez mutil eta ez neska,
hainbat jarrera desegokiek
egin digute gainezka,
maskoten jabe askoren aurka
egin behar dut protesta. (Bir)

2)
Pit-bull lotua ez da urruntzen
askea saltoka bizkor,
nik ez dut deusen kulparik baina
nigana jostari dator,
beldurrak seko ni irentsi nau,
zakurrak, berriz, hortxe hor;
ez zaizkit zertan gustatu behar
eta salatzera nator.
Dena den, horra, bistakoa da,
zerk paseatzen duen nor. (Bir)

3)
Bigarreneko zakur zaunkak
burusoileraino nauka,
jakin nahi nuke zer ote duen
etxe osoaren aurka.
Norberak soilik behar duenez
bizitzako xenda hauta,
bakardadea ezkutatzeko
agian maskota dauka;
txakurrek inor epaitu gabe
egiten baitute zaunka. (Bir)

4)
Orga batean faraoi legez
soinean jantzita xira,
pet_fashionak mugarik ez du
denok modari begira,
txorakeria hasi da eta
honek badakar segida,
gurtu ditzagun, hementxe datoz
jainko berriak herrira;
Irun bihurtzen hasia zaigu
lau hankekoen neurrira. (Bir)

5)
Auzoko bati eman zioten
artzain-txakur bat, gaztea,
paseatzeko prestatu nintzen
ez baitzen beti askea.
Mendi bidean otu zitzaion
espaloia marraztea,
hortxe hasi zen sormena eta
arte guztien nahastea,
zipaiotegi parean utzi
zuen kriston borrastea.
(Badaezpada pentsatu nuen
uzta jasotzen hastea.)

6)
Abere baino, jabe askoren
portaera txarren aurka
protesta eta purrustadaka
etsipenean galduta,
pertsonala den borrokan nabil
azkenaldian sartuta,
nahiz benetako sentimenduak
ezin ditudan ezkuta:
txakur gehienak maite baititut
bi hankekoak kenduta. (Bir)

7)
Leku askotan, Irunen ere,
hain da arazo haundia,
kale, terraza, parke, zein plaza,
gainezka dago mendia,
zaunkari oro jainkotu eta
zerutzat dute hiria.
Nire mezua zentzuduna da,
zintzoa eta garbia:
-Zuon txakurrak ez dira behiak,
eta hau ez da India!!! (Bir)

Iturria: https://bidasoa.hitza.eus/generoak/iritziak/hitza-irunabar-bertso-sorta-6/

Posted in Bertsoak and tagged , | Utzi iruzkina
27 maiatza 2026

Adiorik ez! [2026-05-30]

Posted in Berriak,Besterik and tagged , | Utzi iruzkina
19 maiatza 2026

Txingudi A taldea Gipuzkoako Herriarteko Taldekako Txapelketako finalaren atarian gelditu da.

Txingudi A taldeak Gipuzkoako Herriarteko Txapelketako final-erdietako saioa izan zuen maiatzaren 16an, arratsaldeko 17:00etan, Tolosako Bonberenean, Zumarraga-Urretxu 1 taldearen aurka.

Saio bizia, parekatua eta maila altukoa entzun ahal izan zuten bertaratu zirenek. Igauri Lopetegi Amostegi, Manu Goiogana Bengoetxea eta Jon Luzuriaga Iurramendi izan ziren Irungo taldea ordezkatu zutenak. Manex Mantxola Urrate, Mikel Iturriotz Etxaniz eta Antton Fernandez Lasa, berriz, Goierriko taldean kantuan aritu zirenak. Epai mahaia Aitor Errazkin Vicente, Jon Mendizabal eta Iñigo Legorburuk osatu zuten. Leire Akizu Bidegain aritu zen gai jartzen.

Azkenean, estu-estu Zumarraga-Urretxu 1 taldeak lortu zuen Gipuzkoako Herriarteko Taldekako Txapelketako finalean kantatzeko txartela. Saioa eta gero, Bonberenean bertan afaltzeko aukera izan zuten, bertako lagunen eskutik. Eskerrik asko egindako harrera eta tratu goxoarengatik!

Honenbestez, finalaren atarian agur esan behar izan dio Irungo Txingudi A taldeak Gipuzkoako Herriarteko Taldekako Txapelketari. Ibilbide luze eta oparoa egin dute, beraz bejondeizuela eta zorionak!

Hemen dituzue ikusgai saioko bi taldeen hasierako agurrak eta hainbat argazki:

https://ataria.eus/tolosa/1778955856673-txingudi-a-taldearen-agurra-bonbereneako-finalaurrekoan

https://ataria.eus/tolosa/1778955985076-zumarraga-urretxuren-agurra-bonbereneako-finalaurrekoan

Mila esker Tolosaldeako Atariari eta Unai Gaztelumendiri argazkiak eskuratzeko aukera emateagatik.

Posted in Berriak,Bertso saioa and tagged ,,,,,,,,,, | Utzi iruzkina
12 maiatza 2026

Gipuzkoako Herriarteko Bertsolari Txapelketako finalerdietako saioa Tolosan [2026-05-16]

Kaixo, bertsozale.

Dagoeneko amaierara iristen ari da Gipuzkoako Herriarteko Bertsolari Txapelketa. Hernaniko final-laurdenetako saioan nagusi irten ondoren, Zumarraga-Urretxu taldearekin ariko da Txingudi A taldea finalerdietan.

Aipatutako saioa maiatzaren 16an, larunbatean, izango da eta 17:00etan emango zaio hasiera. Bertsotan “Txingudi A” taldeko Igauri Lopetegi Amostegi, Manu Goiogana Bengoetxea eta Jon Luzuriaga Iurramendi eta “Zumarraga-Urretxu” taldeko Manex Mantxola Urrate, Mikel Iturriotz Etxaniz eta Antton Fernandez Lasa ariko dira; gai jartzen, Jon Cia Insausti eta Leire Akizu Bidegain; epaile lanetan, berriz, Aitor Errazkin Vicente eta Jon Mendizabal.

Tolosako Bonberenean jokatuko den saiorako sarrera eskuratu beharra dago. Horretarako bertsosarrerak.eus atarian duzue aukera, eta bestela, saioa hasi aurretik, txarteldegian.

Bertan elkar ikusiko dugulakoan, larunbatera arte!

Posted in Berriak,Bertso saioa and tagged ,,,,,,,,,, | Utzi iruzkina
07 maiatza 2026

“Lagunaren heriotza”. Adrian Arruti Bernadeten bertsoak, Bidasoko Hitzan.

LAGUNAREN HERIOTZA

Egilea: Adrian Arruti Bernadet

Doinua: Hamalau heriotzena I

Hemen jaitsi dezakezu

2026ko apirilaren 1ean Eneko Sanchez Segurola zendu zen. Eneko Irunabar, Irungo bertsoaren bilguneko kide zen eta, Txingudiko bertso-eskoletan egoteaz gainera, eragile izan zen urteetan.
Irunabarren eta bere komunitatearen izenean, besarkada estu eta sentituenak helarazi nahi dizkiegu gertuko kide guztiei eta, bereziki, Ariane, Galder eta Ekairi.
Adrian Arruti Bernadeten bertso-sorta jarraian, Ruper Ordorikaren Bakarka diskoko Lagunaren heriotza kantuan oinarrituta.

1)
Bertsoak idaztea
gogorra zelako
uzteko prest nengoen
eta betirako.
Baina azken berriak
mindu nauelako
idazten ausartu naiz,
aitortu beharko,
lapurra gaur etxean
sartu zaigulako.

2)
Inortxok ere esan
izango ez balit
argirik ez denean
ez dela itzalik
lo egingo nukeen
ohean zabalik.
Lapur zitalak ez du
egin lan makalik!
Ez baitigu lapurtu
ondasun hutsalik.

3)
Garrantzitsuagoa
zen zerbait, jakina.
Artoski gordetzeko
a zer ahalegina!
Guztion isilpean
eduki du grina
adiskide-bilduma
hartzeko adina
eta osteko ale
ordezkaezina.

4)
Ni egonik galduen
artean galduen
kargu hartu zenidan
“Adrien, mecaguen!
No me jodas, begira
ni nola nagoen!”
Senti zintzadan ongi;
ahal bezain gertuen.
Ez nizun esan, baina
arrazoi zenuen.

5)
Ruperrek Bakarka Bat
disko biniloan
daukan kantu bat daukat
hoska garondoan.
Halaxe idatzi dut
sorta hau gaurkoan.
Nahiz eta zauria beti
orbaintzera doan
beti egongo zara
guztion gogoan.

Iturria: https://bidasoa.hitza.eus/generoak/iritziak/hitza-irunabar-bertso-sorta-adrian-arruti/

Posted in Bertsoak and tagged ,, | Utzi iruzkina
03 maiatza 2026

“Opila”. Lorea Abejon Sunsundeguiren bertsoak, Iruneron.

OPILA

Egilea: Lorea Abejon Sunsundegui

Doinua: Ezagutu zuenak

Hemen jaitsi dezakezu

1)
Apirilan gaudenez
opila aipatu,
bizkotxo moduko bat
da erregalatu.
Irun, hondarribian
dute bedeinkatu,
San Markos egunean
dugu guk probatu.

2)
Gu atera kalera
ta okindegietan,
erakuslehioetan
daude gure bistan.
Baita etxean ere
egiten da bertan,
eta gero guk jarri
txitak opiletan.

3)
Beti ama bitxiak
egiten du opari,
bere besoetako
duen pertsonari.
Jaiotzen garenetik
daukagu janari
ta urtero eskertu
ama bitxiari.

4)
Orain eroskin gaude
karroa betetzen,
gurina non dagoen
ari naiz asmatzen.
Gero azukrea ta
arrautzak aurkitzen,
zer gehiago falta zait
ari naiz pentsatzen.

5)
Pentsatu ta pentsatu
txitak falta zaizkit,
hortxe dagoen hori
hartu dut lehenik.
Bukatu erosketa
ta goazen hemendik,
bizkotxoa egingo
duzu zuk ala nik.

6)
Piztu labea eta
goazen astera,
pixkana- pixkanaka
dena nahastera.
Irabiagailuarekin
guztia batzera,
gero molde batean
labean sartzera.

7)
Atera bizkotxoa
oraintxe labetik,
eta goazen jartzera
arrautzak gainetik.
Goxokiak ere gehitu
pixka bat hemendik,
luma eta txitoa
jarri dugu azkenik.

8)
Orain eramatera
joan behar dut nik,
etxean egiten dut
beti- betidanik.
Mimoz eta kariñoz
nik egiten dakit,
onen tradizioa
dator aspaditik.

Iturria: https://irunero.eus/opila/

Posted in Bertsoak and tagged , | Utzi iruzkina
28 Api 2026
2 Comments

Txingudi A taldea aurrera, Gipuzkoako Herriarteko Taldekako Txapelketan.

Txingudi A taldeak Gipuzkoako Herriarteko Txapelketako final-laurdenetako saioa izan zuen apirilaren 24an, arratsaldeko 19:00etan, Hernaniko Milagrosan, bertako Hernani taldearen aurka.

Azkenean, estu-estu, eta talde bien artean oso saio ederra osatu ondotik, Txingudi A taldeak Txapelketan aurrera egitea hobetsi zuten epaileek. Zorionak Igauri, Jon eta Manu! Eta zorte on aurrerantzean!

Saio ostean bertaratu zirenek mokadutxoa egiteko aukera eduki zuten Hernaniko bertso-eskolaren eskutik. Mila esker egindako harreragatik eta hartutako lanarengatik!!

Maiatzaren 16an izango du finalerdietako saioa Txingudi A taldeak, Tolosako Bonberenean, 18:00etan hasita. Bertan, Zumarraga-Urretxu 1 taldekoekin ariko dira kantuan Irunabarreko kideak. Bertan ikusiko dugu elkar!

Posted in Kronikak and tagged ,,,,
21 Api 2026

Gipuzkoako Herriarteko Bertsolari Txapelketako final-laurdenetako saioa Hernanin [2026-04-24]

Kaixo, bertsozale.

Dagoeneko amaierako fasean murgildua da Gipuzkoako Herriarteko Bertsolari Txapelketa. Donostia-Oarso-Bidasoa bailarako saioetan nagusi irten ondoren, Buruntzaldeako irabazle izan zen Hernani taldearekin ariko da Txingudi A taldea final-laurdenetan.

Aipatutako saioa apirilaren 24an, ostiralean, izango da eta 19:00etan emango zaio hasiera. Bertsotan “Txingudi A” taldeko Igauri Lopetegi Amostegi, Manu Goiogana Bengoetxea eta Jon Luzuriaga Iurramendi eta “Hernani” taldeko Ekain Tolaretxipi Errazti, Unai Agirre Goia eta Eñaut Martikorena Lizaso ariko dira; gai jartzen, Jon Cia Insausti eta Markel Oiarzabal; epaile lanetan, berriz, Aitor Errazkin Vicente eta Ainara Azpiazu Aduriz “Axpi”.

Hernaniko Milagrosa aretoan jokatuko den saiorako sarrera eskuratu beharra dago. Horretarako bertsosarrerak.eus atarian duzue aukera, eta bestela, saioa hasi aurretik txarteldegian.

Bertan elkar ikusiko dugulakoan, ostiralera arte!

Posted in Berriak,Bertso saioa and tagged ,,,,,,,,,, | Utzi iruzkina
09 Api 2026

“Herri Dantzaria”. Aiora Fagoaga Izaren bertsoak, Bidasoako Hitzan.

HERRI DANTZARIA

Egilea: Aiora Fagoaga Iza
Doinua: Aita San Migel Idurretako

Hemen jaitsi dezakezu

1
Iturenen eta Zubietan
joaldunen joariak
hamaika herritan dantzan eta
hartzak atera nagiak.
Puska biltzera ta sorgin dantzan
herriak daude biziak
udaberria loratutzeko,
gora gora inauteriak!

2
Kriskitin hotsak entzun Oñatin
denak badoaz plazara.
Urdiainen ta Biasterin San Juan,
ekainan dena algara
Hernani eta Andoain ere
axeri-dantzan festara
urteko penak sutan erreta,
ongi pasatu udara.

3
Zubi, herria dantzariz betez,
Lesakak badu distira
Trokeo dantzak Iruñan bizi
plazan jira eta bira.
Euskal Herria dantza ta dantza
mila tokira begira
udara eta egun beroak
segituan pasa dira.

4
Katximorroa Eltziegon eta
biba Bobo ta Otsagi!
Cortesen ere makilak jota
indarra Erriberari.
Ezpata, makil ta txintxarriak
entzuten dira ugari
eta Iurretan hanka altxatuz
esan agur irailari!

5
Inauteritan puska biltzera
ezetz etorri laguna
Soka-dantzakin gaur jaiak hasi,
bihar da San Juan eguna
Ezpata-dantza irailan dugu
ekainan galdu duzuna
beti kanpora begira baina
hau da hemen daukaguna.

6
Laburpentxoko dantza guztiek
badute bere magia
Euskal Herriko dantzen zerrenda
da luze ta ugaria.
Gure Bidasoa txiki hontan
badabil hor gazteria,
Euskal Herria zerbait bada da
herri oso dantzaria.

Iturria: https://bidasoa.hitza.eus/generoak/iritziak/hitza-irunabar-bertso-sorta-aiora-fagoaga-2/

Posted in Bertsoak and tagged , | Utzi iruzkina
02 Api 2026

“Baratzea”. Josu Laguardia Igiñitzen bertsoak, Iruneron.

BARATZEA

Egilea: Josu Laguardia Igiñitz

Doinua: Praixku Galtzarreta A

Hemen jaitsi dezakezu

1)
Baratzea udazkenean, oraindik, emankor.
Tomate festak jarraitzen du, baina gain behera dator…
Elikatzen, erleak, etenik gabe, hor…
Kuia eta zerba biltzera oso gustura nator!

2)
Abenduan bada lana, baina nahiko suabe.
Zeruan eguzkia ez da gehiago jaun da jabe.
Babak erein behar dira, ta erleak, bestalde,
erlauntzetan gordetzera egiten dute alde.

3)
Urtarrilean gurean ezin dut gehiago.
Hotza eta euria barra-barra, jai girorik ez dago.
Etxetik irten gabe, aspertuta nago.
Bitartean baratzean, barazki gutxiago.

4)
Barazki gutxi eta euria, guretzat, kondena.
Kuiarik eta zerbarik ez… betetzeko barrena.
Aza bat edo beste, neguko azkena…
Norbaitek uzta biltzeko ba al du itxaropena?

5)
Martxoarekin batera, epeltze garaia.
Agur otsaileko elurra, barazkien etsaia!
Konpondu arrastalua, zorroztu igitaia!
Azkenean, baratzean piztu egin da jaia.

6)
Jaia hasi ondoren, uzta; bazkaltzeko, bapo!
Eguzki-beroa nolako, jan-edana halako!
Marrubiak, ilarrak…. Den-dena, etxerako!
Lagunei pixar batzuk… maite ditugulako!

7)
Baratzea egin dezagun! Egin, berehala!
Tokikoa baino hoberik, topa daiteke ala?
Bideratu hortara gure eginahala!
Elikadura sanoa… Hori bai naturala!

8)
Ta erleekin arestian, a zer buruhauste!
Lorautseztapenik ez dago, haiek gabe, ez uste!
Milioika polen-bidai egiten dituzte.
Baratzeen desagertzetik, salbatu ohi gaituzte!

Iturria: https://irunero.eus/zerrendan/

Posted in Bertsoak and tagged , | Utzi iruzkina

Post Navigation

← Older Entries