Irunabar, Irungo bertsoaren bilgunea

Archive for the tag “Andoni Zelaia”

“(poli-tik-a)”, Iruneron. Andoni Zelaia Otañoren bertsoak.

(poli-tik-a)

Doinua: Delikatua baitut (Anje Duhalde)
Egilea: Andoni Zelaia Otaño

1
Batetikan keria
bestetik ismoa,
hitz potolo kutsua
ote den susmoa,
irudimenez jantzi
euskaldun kosmoa,
elkartzeko bakoitzan
mundu intimoa.

2
Amesten den artean
egin leike hegan,
probatzen ez duenak
nola jakin zer dan,
ametsaren erdia
gogoratzen dedan,
oraingoz ezingo det
ur hortatik edan.

3
Pentsamentu askea
ta ideiak argi,
aldaketaren alde
agertuaz garbi,
egia da oraindik
gabiltzala nagi,
bat gahi bat elkartuta
egiten dira bi.

4
Okerren dagoena
hobetze aldera,
berari laguntzea
guztion afera,
birusan ikasgaia
ez bada sobera,
gure harrotasuna
itsua ote da.

5
Gizarte askearen
Euskal Herri aske,
politika ohiturak
bilakatuz gazte,
jerarkiak baztertuz
berritasun eske,
ezkerretik jokatuz
indar eta ospe.

6
Beren menpe herriak
eta nor banako,
eskubia hobe da
boteretik flako,
gizarte justuaren
arrisku dalako,
arrazoi ez dugula
pobre garelako.

7
Historia luzean
zenbat ukazio,
politiko askoren
sasi negozio,
herriarentzat ez dut
gehiago desio,
borroka burutsua
bihurtu pasio.

8
Askatasuna ez da
zenbaki kontua,
Eskubidea ez da
batzuen patua,
Berdintasuna ez da
zerbait pribatua,
hau lortzea ezin da
izan delitua.

Iturria: https://irunero.eus/poli-tik-a/

“Lurtarron desafioak”, Iruneron. Andoni Zelaia Otañoren bertsoak.

Lurtarron desafioak

Doinua: “Potajiarena
Egilea: Andoni Zelaia Otaño

1)
Zer moduz irakurle?
Zenbait gogoeta:
noren eskutan dago
lurtarron oreka?
Iturriak agortu
mendiak erreta
ura gainez daraman
ibaia, erreka…
Gaixotasun sintomak
hartu du planeta.

2)
Hausnartzeko denbora
hartzea bederen
planeta bakarrean
bizi gara zeren
laster ez da guretzat
ez eta besteren
zuzentzeko aukera
helduko ote den
ondorengoentzako
kiskali baino lehen.

3)
Ozono zulo beltza
handitzen, handitzen
atmosfera zikinez
ari da loditzen
hotz-bero baremoak
dihoaz gorritzen
ezin esan naturak
ez duela sufritzen
gero eta zailago
daukagu garbitzen.

4)
Aurreikusten duen
zientzi zentroa
itsasoa igoko
omen da metroa
zikloiak, lurrikarak
dena da makroa
horren aurrean nola
mantendu neutroa
gerora iristeko
orainan zikloa.

5)
Kontsumo erregelak
ez da berriketa
multinazionalen
zonbi ariketa
dena da merkatua
diru pilaketa
urrean pareta bat
atzean pareta
ez ote gara ari
burukin kolpeka.

6)
Abiapuntuaren
“kilometro zero”
denbora kontua da
estresan bezero
nora joan etorri,
hola egunero,
Beste biderik jada
ez da honezkero…
Tximista bezain bizkor
Bidaiatu edo!

7)
Lur azpiaren txanda
bete baita gaina
bide-gorri, metroa
ta bus-a, jakina!
Bakoitzari autoa,
motoa, patina,
Lemoniz-en bikia
beharko da, baina,
elektrika sortzeko,
guztientzat haina.

8)
Lurtarron erronkari
jo diot aldaba
kontsumoa handitu
berdin abiada.
Zorionaren zama
zinez hori bada
itzulerarik gabe
aurkituko gara.
Suntsipenera doan
trena habian da.

 

Iturria: https://irunero.eus/lurtarron-desafioak/

Abenduko Kabigorriko bertso-gaua: Martin, Elustondo, Arregi, Zelaia eta Ugarte. [2018-12-13]

Abenduaren 13koa izango da 2018ko azken bertso-gaua, eta boskote mundial batekin emango diogu amaiera urteari: Jon Martin oiartzuarra, Nerea Elustondo legazpiarra, Maider Arregi oñatiarra, Andoni Zelaia hendaiarra eta Iñigo Ugarte irundarrarekin. Gaiak jartzen Aitor Errazkin irundarra ariko da eta bertso jarriak Adrian Arruti irundarraren eskutik etorriko zaizkigu. Anima zaitezte eta gogoratu Kabigorrik aukera bikaina eskaintzen digula saioaren ondotik afaltzen geratzeko.

This slideshow requires JavaScript.

 

Hartu Hitza herri ekimenarekin bat, beste behin ere

Irunabar, Irungo bertsoaren bilguneko eta Txingudiko Bertso Eskolako lau kide aritu ziren apirilaren 21ean Hartu Hitza herri ekimenak antolatutako sinadura bilketan kantari: Xabier Isasi, Andoni Zelaia, Manu Goiogana eta Aitor Errazkin.

Hona sinadura bilketa egun horretarako Xabier Isasik eta Andoni Zelaiak propio ondutako bertso-sortak:

 

BERTSO BERRIAK, ANDONI ZELAIAK 2018ko APIRILAREN 21erako JARRIAK:

1.- Zure ahala sinadurakin

iritsi da atarira

asmo jatorra gailendu bedi,

agertu zure dizdira

elkar lanaren ahaleginean

fruituak helduko dira

gure bidea egin daiteke

ondorengoei begira

 

2.- Zure eskutan dagon arkatzak

orain badu garrantzia

egun batean ez da lortuko

behar da pazientzia

modu isilean egiten dugu

eskubide irrintzia

agintariek jakin dezaten

herritarron iritzia.

 

3.- Euskal Herria nazio duina

Europa aldamenean

herri bezala nola soseguz

eta gure izenean

zenbat bilkura, zenbat harreman

iritsi da azkenean

gure etxea etxeago da

erabaki nahi denean.

 

4.- Erabakia orain da hemen

eta galdera gardenak

buruak dantzan, ideiak ketan

zer eskatzen du barrenak

bakarka nola kolektiboan

iristen diren lorpenak

ongi etorriak izango dira

bakoitzaren ekarpenak.

 

5.- Beraz zutikan jarrita dago

askatasunan bandera

behatz puntekin ukitzen dugu

pizkundearen sorrera

errespetua dugu aurrena

denok eskubide bera

erantzuna da bakoitzarena

denona, berriz, galdera.

 

6.- Txikitasunak handitzen duen

elkarlana herrigintza

garenak gara, garen bezala

ta ikuspegi anitza

sendian nola, auzoan berdin

ingurukoekin mintza

azaroaren hemezortzian

irundarrena da hitza.

 

 

 

 

 

HARTU HITZA IRUNEN

Egilea: Xabier Isasi
(Doinua: Intsumiso egin naiz.)

1
Kalera atera gara
sinadura bila
Moskun eta Anakan
bildu dugu pila
Gehiago nahi dugu ta
jo deia-ezkila
zurearekin baietz
lortu hiru mila

2
Bertan bizi garela
edonork badaki
Irabaziko dugu
lubakiz lubaki
Galtzak urratuz gero
jarri adabaki
Bertan bizi nahi dugu
bertan erabaki

3
Irunen hartu hitza
bete enparantza
erabaki nahi dugu
gure gobernantza
mesfidantza baztertu
gora esperantza!
Libre izango gara
ez izan zalantza

4
Sinadurak biltzeko
piztu dugu lehia
Herriak bizi nahi du
bere epopeia
norberaren asmoa
nork bere ideia
Herriak egin beza
bozkarako deia

6
Demokrazian beti
herria da lehena
guretzat nahi duguna
erabakimena
Irunen jarria da
egun handiena
azaroak dadukan
hamazortzigarrena

6
Irunek jasan zuen
eraso bortitza
faxistek bota nahian
Gernikan haritza
gero jarri ziguten
muga gaindigaitza
muga bakarra bedi
herriaren hitza

7
Independentzia da
batzuen gurari
beste batzuek, berriz,
lotu Espainiari
bakoitzak kasu egin
bere asmoari
baina ez egin uko
askatasunari

8
Kalera atera gara
sinadura bila
Moskun eta Anakan
bildu dugu pila
Gehiago nahi dugu ta
jo deia-ezkila
zurearekin baietz
lortu hiru mila.

 

 

 

 

 

 

Bertso berriak, Kabigorriko bertso gauei jarriak

Txingudiko Bertso Eskolako Bertso tailerreko Xabier Bengoetxea, Iñaki Portugal, Xabier Isasi, Andoni Zelaia eta Aitor Errazkinek elkarlanean ondutako sorta da Irunero aldizkariaren 320 zenbakian argitaratutako bertso-sorta.

 

Egilea: Txingudiko Bertso Eskolako bertso tailerreko kideak

Doinua: Oihan beltzean zoinen eder den

 

 

Zuen aurrera bertso tailerra:

bosten proiektu komuna;

nagusi gabe eratu gara

sormena dugu jarduna.

Ba al dakizu Iruneroren

irakurle euskalduna,

zer demontre den Kabigorriko

hileko lehen osteguna?

 

Hilero bertso saio bat bertan.

Hasieran, sinesgaitza.

Batek lokala jarri, besteak

antolakuntza lan gaitza.

Eta bost urte dira gozatzen

paregabeko eskaintza:

Kabigorri ta Irunabarren

elkarlanaren emaitza.

 

Bat batekoak dira saioak

aurretik, bertso papera

beti bertako bertsolari bat

kantuz direnen artera

gaiak ontzeko eskualdeko

gai jartzaileak topera

kabiak ez du gutxi eskaintzen,

eta debalde, gainera.

 

Bidasoaldeko Ateneoa

beti abegi jario

egarri eta gose handi zein

txikien erremedio

entzule oro adi, isilik

errespetua medio

hitz neurtuari neurri-neurriko

babesa ematen dio.

 

Esperimentu kabi ere bada,

ta ez edonolakoa!

Musika-tresnak lagun badira,

magia bezalakoa!

Bertako doinu zein atzerriko,

bat-batekoan gakoa.

Eskualdeko probalekurik

emankorrenetakoa.

 

“Belarribizi” edo “ahoprest”

ongi etorria zara

leku bat duzu Kabi gorrian

etorri gure plazara

etxean legez baietz sentitu

senide baten gisara

zaletasunak batzen gaituen

famili txikia gara.

 

Ez du axola ofizioak

albaitero edo artzain

hargin, arotza, langile soila,

emagin edo abeltzain

mugazain edo mugalaria

osagile zein erizain

hilaren lehen ostegunero

bertan izango gara zain.

2018ko lehendabiziko bertso gaua urtarrilaren 4ean

Urtarrilaren 4ean izango da urteko lehendabiziko bertso gaua, eta bertan ariko dira Iñaki Zelaia, Julen Zelaieta, Aimar Karrika, Andoni Zelaia eta Abel Zabala. Gaiak jartzen Aitor Errazkin ariko da, eta bat-bateko saioaren aurreko bertso jarriak, aldiz, Adrian Arrutiren eskutik helduko zaizkigu.

Gogoan izan saioa eta gero afaltzeko aukera paregabea eskaintzen digula Kabigorrik. Bertan elkar ikusiko dugulakoan, urte berri on denoi.

Maiatzeko Kabigorriko bertso-gaua [2017-05-04]: A. Zelaia, J.M. Lopez, M. Arozena eta I. Zelaia

Badator ikasturteko azken-aurreko bertso-gaua, Andoni Zelaia, Juan Mari Lopez, Manolo Arozena eta Iñaki Zelaia bertsolariak kantuan aditzeko aukera eskainiko diguna. Lau bertsolariei gaiak jartzen eta saio aurkezten, aldiz, Urko Casado ariko da, Txingudiko bertso-eskolako kide astigartarra. Bat-bateko saio aurreko bertso-jarriak Egoitz Zelaiaren eskutik helduko zaizkigu.

19:30etatik aurrera izango da saioa, eta ondoren, gogoan har ezazue Kabigorrik afaltzen geratzeko eskaintzen digun aukera paregabea.

Bertan ikusiko dugu elkar.

This slideshow requires JavaScript.

Txingudi I taldeko kideek Gipuzkoako Herriartekoan kantatutako hainbat bertso

Txingudi I taldeak Irungo Hazia Elkarte Kulturalean hartu zuen Ereñotzuko Taldea, 2017ko martxoaren 3an, eta Azkoitiara kantatzera joan ziren 2017ko martxoaren 10an. Hona bi saio horietan barrena Abel Zabalak, Iñigo Ugartek eta Andoni Zelaiak ondutako ariketa eta bertsoaldi zenbait.

 

Gipuzkoako Herriartekoa: martxoaren 10ean, bi hitzordu

Martxoaren 10ean bi hitzordu ditugu txinguditarrok, Gipuzkoako Herriartekoa dela eta. Txingudi I taldeak Azkoitira egin beharko du; eta Txingudi II-k, aldiz, Andoainera. Hementxe dituzue bi saioen berri ematen duten kartelak.

Eta hona orain arteko bi saioetako hainbat argazki:

This slideshow requires JavaScript.

 

Txingudi I – Ereñotzu [2017-03-03], Hazia Elkartean (bertso-afaria)

Martxoaren 3an, ostiralarekin, Txingudi I eta Ereñotzu taldeak aurrez-aurre jarriko dituen saioa izango dugu Irungo Hazia Elkartean. Afaldu eta gero izango da bertso saioa, gaueko 23:00etatik aurrera, gutxi gorabehera. Hazia Kultur Elkarteak menua finkatuko du, eta aurrez tokia hartu nahi duenak izango du horretarako aukerarik, Hazian bertan abisu emanez gero (Haziako telefonoa: 943 63 36 42). Menua 15 euroan izango da. Txartelak erosteko azken eguna Martxoak 1, asteazkena.

Txingudi I taldetik Abel Zabalak, Iñigo Ugartek eta Andoni Zelaiak kantatuko dute. Ereñotzuko taldea Arnaitz Lasarte, Aritz Zerain, Ibon Miner eta Iñaki Zelaiak osatzen dute, eta lau horietatik hiruk kantatuko dute Irunen.

txingudii-erenutzu

Post Navigation