Irunabar, Irungo bertsoaren bilgunea

Archive for the tag “Oarso-Bidasoaldeko Hitza”

01 Eka 2026

“Txakur bedeinkatuak”. Beñat Elosegi Ortiz de Zarateren bertsoak, Bidasoko Hitzan.

TXAKUR BEDEINKATUAK

Egilea: Beñat Elosegi Ortiz de Zarate

Doinua: Zer buruzbide bihotz gabe

Hemen jaitsi dezakezu

1)
Umeak baino txakur gehiago
ditugulako dut kezka,
jaso gabeko kakak direla
ixkinetan pixa festa,
belardietan ezin ibili
ez mutil eta ez neska,
hainbat jarrera desegokiek
egin digute gainezka,
maskoten jabe askoren aurka
egin behar dut protesta. (Bir)

2)
Pit-bull lotua ez da urruntzen
askea saltoka bizkor,
nik ez dut deusen kulparik baina
nigana jostari dator,
beldurrak seko ni irentsi nau,
zakurrak, berriz, hortxe hor;
ez zaizkit zertan gustatu behar
eta salatzera nator.
Dena den, horra, bistakoa da,
zerk paseatzen duen nor. (Bir)

3)
Bigarreneko zakur zaunkak
burusoileraino nauka,
jakin nahi nuke zer ote duen
etxe osoaren aurka.
Norberak soilik behar duenez
bizitzako xenda hauta,
bakardadea ezkutatzeko
agian maskota dauka;
txakurrek inor epaitu gabe
egiten baitute zaunka. (Bir)

4)
Orga batean faraoi legez
soinean jantzita xira,
pet_fashionak mugarik ez du
denok modari begira,
txorakeria hasi da eta
honek badakar segida,
gurtu ditzagun, hementxe datoz
jainko berriak herrira;
Irun bihurtzen hasia zaigu
lau hankekoen neurrira. (Bir)

5)
Auzoko bati eman zioten
artzain-txakur bat, gaztea,
paseatzeko prestatu nintzen
ez baitzen beti askea.
Mendi bidean otu zitzaion
espaloia marraztea,
hortxe hasi zen sormena eta
arte guztien nahastea,
zipaiotegi parean utzi
zuen kriston borrastea.
(Badaezpada pentsatu nuen
uzta jasotzen hastea.)

6)
Abere baino, jabe askoren
portaera txarren aurka
protesta eta purrustadaka
etsipenean galduta,
pertsonala den borrokan nabil
azkenaldian sartuta,
nahiz benetako sentimenduak
ezin ditudan ezkuta:
txakur gehienak maite baititut
bi hankekoak kenduta. (Bir)

7)
Leku askotan, Irunen ere,
hain da arazo haundia,
kale, terraza, parke, zein plaza,
gainezka dago mendia,
zaunkari oro jainkotu eta
zerutzat dute hiria.
Nire mezua zentzuduna da,
zintzoa eta garbia:
-Zuon txakurrak ez dira behiak,
eta hau ez da India!!! (Bir)

Iturria: https://bidasoa.hitza.eus/generoak/iritziak/hitza-irunabar-bertso-sorta-6/

Posted in Bertsoak and tagged , | Utzi iruzkina
07 maiatza 2026

“Lagunaren heriotza”. Adrian Arruti Bernadeten bertsoak, Bidasoko Hitzan.

LAGUNAREN HERIOTZA

Egilea: Adrian Arruti Bernadet

Doinua: Hamalau heriotzena I

Hemen jaitsi dezakezu

2026ko apirilaren 1ean Eneko Sanchez Segurola zendu zen. Eneko Irunabar, Irungo bertsoaren bilguneko kide zen eta, Txingudiko bertso-eskoletan egoteaz gainera, eragile izan zen urteetan.
Irunabarren eta bere komunitatearen izenean, besarkada estu eta sentituenak helarazi nahi dizkiegu gertuko kide guztiei eta, bereziki, Ariane, Galder eta Ekairi.
Adrian Arruti Bernadeten bertso-sorta jarraian, Ruper Ordorikaren Bakarka diskoko Lagunaren heriotza kantuan oinarrituta.

1)
Bertsoak idaztea
gogorra zelako
uzteko prest nengoen
eta betirako.
Baina azken berriak
mindu nauelako
idazten ausartu naiz,
aitortu beharko,
lapurra gaur etxean
sartu zaigulako.

2)
Inortxok ere esan
izango ez balit
argirik ez denean
ez dela itzalik
lo egingo nukeen
ohean zabalik.
Lapur zitalak ez du
egin lan makalik!
Ez baitigu lapurtu
ondasun hutsalik.

3)
Garrantzitsuagoa
zen zerbait, jakina.
Artoski gordetzeko
a zer ahalegina!
Guztion isilpean
eduki du grina
adiskide-bilduma
hartzeko adina
eta osteko ale
ordezkaezina.

4)
Ni egonik galduen
artean galduen
kargu hartu zenidan
“Adrien, mecaguen!
No me jodas, begira
ni nola nagoen!”
Senti zintzadan ongi;
ahal bezain gertuen.
Ez nizun esan, baina
arrazoi zenuen.

5)
Ruperrek Bakarka Bat
disko biniloan
daukan kantu bat daukat
hoska garondoan.
Halaxe idatzi dut
sorta hau gaurkoan.
Nahiz eta zauria beti
orbaintzera doan
beti egongo zara
guztion gogoan.

Iturria: https://bidasoa.hitza.eus/generoak/iritziak/hitza-irunabar-bertso-sorta-adrian-arruti/

Posted in Bertsoak and tagged ,, | Utzi iruzkina
09 Api 2026

“Herri Dantzaria”. Aiora Fagoaga Izaren bertsoak, Bidasoako Hitzan.

HERRI DANTZARIA

Egilea: Aiora Fagoaga Iza
Doinua: Aita San Migel Idurretako

Hemen jaitsi dezakezu

1
Iturenen eta Zubietan
joaldunen joariak
hamaika herritan dantzan eta
hartzak atera nagiak.
Puska biltzera ta sorgin dantzan
herriak daude biziak
udaberria loratutzeko,
gora gora inauteriak!

2
Kriskitin hotsak entzun Oñatin
denak badoaz plazara.
Urdiainen ta Biasterin San Juan,
ekainan dena algara
Hernani eta Andoain ere
axeri-dantzan festara
urteko penak sutan erreta,
ongi pasatu udara.

3
Zubi, herria dantzariz betez,
Lesakak badu distira
Trokeo dantzak Iruñan bizi
plazan jira eta bira.
Euskal Herria dantza ta dantza
mila tokira begira
udara eta egun beroak
segituan pasa dira.

4
Katximorroa Eltziegon eta
biba Bobo ta Otsagi!
Cortesen ere makilak jota
indarra Erriberari.
Ezpata, makil ta txintxarriak
entzuten dira ugari
eta Iurretan hanka altxatuz
esan agur irailari!

5
Inauteritan puska biltzera
ezetz etorri laguna
Soka-dantzakin gaur jaiak hasi,
bihar da San Juan eguna
Ezpata-dantza irailan dugu
ekainan galdu duzuna
beti kanpora begira baina
hau da hemen daukaguna.

6
Laburpentxoko dantza guztiek
badute bere magia
Euskal Herriko dantzen zerrenda
da luze ta ugaria.
Gure Bidasoa txiki hontan
badabil hor gazteria,
Euskal Herria zerbait bada da
herri oso dantzaria.

Iturria: https://bidasoa.hitza.eus/generoak/iritziak/hitza-irunabar-bertso-sorta-aiora-fagoaga-2/

Posted in Bertsoak and tagged , | Utzi iruzkina
18 Mar 2026

“Zaharra, umea eta astoarean alegia”. Jon Luzuriaga Iurramendiren bertsoak, Bidasoako Hitzan.

ZAHARRA, UMEA ETA ASTOAREN ALEGIA

Egilea: Jon Luzuriaga Iurramendi

Doinuak: Manuel Narruk atzo esan dit C / Minberatu zaizkigu

Hemen jaitsi dezakezu Hemen jaitsi dezakezu

1)
Adineko bat eta ume bat
astoa sokan lotuta
herrira doaz pausaon oinez
eguzkiak berotuta
baina zer pentsa eduki dute
ez daude eta ohituta
ume koadrilla bat hasi zaie
barrezka eta ohiuka:

2)
-Zuek leher eginda
ez ote zaudete?
oinez zabiltzatenez
ia ordubete.
Inuzente xamarrak
izango zarete
asto gainean ere
joan zaitezkete!

3)
Ustekabeko kritika entzun
dutelako adi-adi
asto gainera igo da haurra
eutsi nahian orekari
zaharrak berriz oinez ondoan
ekin dio bideari
herritar batzuk hasi bitarte
kontu eske umeari:

4)
-Tokia zaharrari
haurrak ebasteak
erakutsi dizkigu
zuon kontrasteak.
Tristura ematen du
pentsatzen hasteak
errespeturik ez du
egungo gazteak…

5)
Umiltasunez haien kritika
iristean belarrira
umea jaitsi eta zaharra
asto gainean jarri da
herrira heldu nahi zuten baina
ezin joan urrutira
bidean zeuden hiru agure
kexaka hasi baitira:

6)
-Haurrak hartu bitarte
halako jipoia
patxadaz pasa duzu
kaleko kantoia.
Adina izan arren
baduzu sasioa,
nola izan zaitezke
horren zeurekoia?

7)
Erdi betilun, erdi haserre
(badute aski motibo)
biak batera aberearen
bizkarrera dira igo
modu horretan bidean barna
jarraitu arren astiro
ohartzerako geldiarazi
dituzte biak berriro:

8)
-Biak astoan lasai
nik ez dakit nora
zoazten baina ezetz
iritsi inora…
Astoa lehertzear
doa maldan gora
halako kargarekin
laister itoko da.

9)
Bien artean besotan hartu
dute asto handi hura
eta zubia pasa behar den
unean dena da duda…
Asto gaixoa ikaratuta
errekara amildu da
dena ikusi duen andreak
hau esan die gustura:

10)
-Astoa bizkarrean
zuek ezin eutsi,
ikusi dudana nik
ezin dut sinetsi,
errekan zuengandik
dijoa ihesi
normala, besterik ez
zenuten merezi.

11)
Denei atsegin eman beharrez
eta azkenean larri
alegia hau besteen gisan
denotzat erakusgarri.
Etengabeko kritikei hobe
arreta txikia jarri
norberak bere zentzua ere
galtzen duelako sarri!

Iturria: https://bidasoa.hitza.eus/generoak/iritziak/jon-luzuriaga-iurramendi-zaharra-umea-eta-astoarean-alegia/

Posted in Bertsoak and tagged , | Utzi iruzkina
02 Ots 2026

“Badator Herriartekoa!”. Aitor Errazkin Vicenteren bertsoak, Iruneron.

BADATOR HERRIARTEKOA

Egilea: Aitor Errazkin Vicente

Doinua: Agur maiteño, gudara noian

Hemen jaitsi dezakezu

1)
Bi mila eta hamazazpian
joan ginen lehen aldiz
gaur bederatzi urte ondotik
izena eman dugu berriz…

2)
Martxa arindu behar, ordea
gainean daukagu eta
Gipuzkoako Herriarteko
Taldekako Txapelketa!

3)
Talde-izenak aurreko berak:
“Txingudi bat”, “Txingudi bi”
originalak ez dira baina
bai oso baten erdi bi.

4)
Saririk bada talde-izenen
kontu hori gora-behera
guri ematen izango dute
guk hartutako lan bera.

5)
Bi talde, beraz, beren epaile
gai-jartzaile, arduradun
kargu adina parte hartzaile
ez dakit nik badaukagun…

6)
Baina badugu estrategia
erne ibili besteak
atzegoardia zaharrak gara
lehen ilaran gazteak!

7)
Desira bakar bat daramagu
(norberak bereak ditu):
antolakuntza-lanak ez gaitzan
guda zelaian zauritu.

8)
Eta bidean etsairik gabe
lagunik eginez gero,
ezin esango dugu, aizue,
ez genuenik espero…

9)
Eskualdean pare bat saio
Kabigorrin, ahal badugu
lubaki horrek lehendik ere
babestu izan gaitu gu!

10)
Nahi duzuenok egingo dugu
nahiz irabazi, nahiz galdu
saioetara bildu, aditu
eta elkarrekin afaldu.

11)
Estrategia horrekin goaz
zer iruditzen zaizue?
Zatozte gure ondoan ongi
pasatu nahi baduzue!

12)
Data zehatzik ez da oraindik
baina horra azken bala:
postaz helduko zaizkizue guk
haien berri izan ahala.

Iturria: https://irunero.eus/badator-herriartekoa/

Posted in Bertsoak and tagged ,, | Utzi iruzkina
08 Urt 2026

“Kanpolarrosak”. Manu Goiogana Bengoetxearen bertsoak, Bidasoko Hitzan.

KANPOLARROSAK

Egilea: Manu Goiogana Bengoetxea

Doinua: Emazte baten bihotz xamurra I

Hemen jaitsi dezakezu

1)
Bertsolariok aritzen gara
inoiz goxo, inoiz zakar,
gaurkoak ere, nor den hartzaile,
pixka bat denetik dakar.
Dena den, argi utzi nahi nuke,
egin aurretik atzapar,
ni neu naizela idatzitako
hitzen erantzule bakar.

2)
Bertsolariak behar ditu plazak
eta ikasten joatea,
transmiti dadin, zabaldu dadin,
eten ez dadin katea.
Erakundeek zein elkarteek
hala itxita atea
utopia da Bidasoako
bertsolari izatea.

3)
Bertso munduan Gipuzkoako
Elkarteak badu sona,
alboratuta, gutxietsita
duena hemengo zona.
Beraien mapak duen itxurak
sortzen dit ezinegona:
Gipuzkoarik ba ote dago
Gaintxurizketatik hona?

4)
Urrunekotik abiatu naiz,
baina, tira, ez du zertan,
zer hausnartua, zer konpondua
ere badaukagu bertan.
Irungo Udalak bista beti du
urrutiko intxaurretan:
bertako zeinek kantatu du ba
Irungo San Martzialetan?

5)
Abenduaren hasieran, bai,
kantatu dut honezkero,
baina aurpegi zuritze hori
onartzerik ez espero…
Kulturaz eta diru partidez
hitz egiten dute gero,
baina ez dakit nondik hasten den
euren km0.

6)
Euskal Jiraren jarrera ere
ez da bere onenean
nahiz eta esku asko ez dauden
lanerako orenean.
Azken aldian gure jardunik
ez dute oroimenean,
baina agudo oroitu ziren
sosik ez zegoenean.

7)
Nahiz ez nukeen inor mindu nahi
nire usteen aitortzan,
bertsotan beti lehenik besteak
eta gu euren morrontzan.
Imajinatzen al dituzue,
etsenplu bat otzan-otzan,
Auntxa eta Kemen deitu ez eta
Solano eta Kukai oholtzan?

8)
Hondarribiko Udala ere
sar dadila kalabazan,
arduradunen itsutasunak
guri nola ez erasan?
Bailarakoen presentzia ere
ez al da nahiko eskas han?
Hasi zenetik nork kantatu du
Santiago kaleko plazan?

9)
Bertan daudenak nahi baditugu
arrimatu kulturara
herri gogoak udaletxetik
izan behar du bultzada.
Dagoeneko ailegatu zait
pazientzia mugara:
ez da alderdi kontua soilik
borondate kontua da.

10)
Nahiz eta ez den deus aldatuko
bertsook idaztearren
azken boladan nire barruak
husteko nahia nekarren.
Esperantzara kondenatuta
bizi nahi ez nukeen arren
bi mila eta hogeita seiak
ea berririk dakarren.

Iturria: https://bidasoa.hitza.eus/generoak/iritziak/manu-goiogana-bengoetxea-kanpolarrosak/

Posted in Bertsoak and tagged , | Utzi iruzkina
04 Abe 2025

“Betti Gotti”. Josu Laguardia Iginitzen bertsoak, Bidasoko Hitzan.

BETTI GOTTI

Egilea: Josu Laguardia Iginitz

Doinua: Praixku Galtzazarreta A

Hemen jaitsi dezakezu

1)
Aisia eta euskera,
biak nola uztartu?
Eta Irun eta_Hondarribia,
bi hitz horiei batu?
Duela hogei bat urte,
bertako lau katu,
helburu_horiek zituztela,
egin ziren elkartu.

2)
Betti Gottiri zor zaio
aitortza honezkero.
euskera sustatzen duelako
udaro, egunero…
Zuhatzako uda-pasa
eskura ez balego
Haurren aisia hain ederra
ez litzateke gero!

3)
Zenbat gazte pasa dira
Zuhatzatik jada?
Ba, gutti gotti betti, mila.
Hori marka handia da!
Ta zenbat begirale?
Berrehun, beharbada…
Zenbaki handiak dira.
Zer nolako zirrara!

4)
Zenbaki handiak, bai, eta
FICOBAn zer martxa!
Koadrila Eguneko trantzea,
hori da hori saltsa!
Lau mila lagun aise,
askorentzat, latza.
Bi trago, postrea eta
mahaitik ezin altxa.

5)
Koadrila Eguna ez da
huts egitekoa.
Irungo edonorentzako
bizi beharrekoa.
Goizean goitibeherak
ta hamaiketakoa.
Betti Gotti, sustatzaile.
Hortxe dago gakoa!

6)
Koadrila Egunagatik
mila esker, aurrez.
Ta aurten Euskal Jiragatik,
zorionak, nola ez?
Santiagon bazkaria
antolatu ordez,
Joxeja, heldu den urtean
San Juan plazan ezetz!

Iturria: https://bidasoa.hitza.eus/generoak/iritziak/josu-laguardia-iginitz-betti-gotti/

Posted in Bertsoak and tagged , | Utzi iruzkina
04 Aza 2025

“Ingumaren besarkadak”. Aitor Errazkin Vicenteren bertsoak, Bidasoko Hitzan.

INGUMAREN BESARKADAK

Egilea: Aitor Errazkin Vicente

Doinua: Tarteka lokartzen gara

1)
Tarteka lokartzen gara
buruari eraginda
luzaro egon bagara
begiak bildu ezinda
halakoetan Ingumak
guretzat boxeo ringa
prestatzen du eta hanka
egin nahi baina ezin da…
Altxa, altxatuko gara,
baina xehe-xehe eginda!

2)
Iritsi denean behingoz
begiak ixteko txanda
oinez goazela uste,
estropezu eta danba!
Ba ote da fisikaren
funtsezko legeez landa
jauzi egiterik ohe
batean luze etzanda?
Gaua nahasia dator
lehen abisua izan da.

3)
Bigarren aldiz heldu naiz
amets “gozoen” mundura
emozioak soltean
jostatzen diren lekura
eta gauetan guztia
igotzen denez burura
egunez izaten dena
jendetasuna, itxura
mozorroa kendu duen
karnabal bilakatu da.

4)
Orain kale erdian naiz
biluzi, larrugorrian
begi-bistakoa denez
nahiko ataka larrian
lagunik minenak ere
modu mespretxagarrian
muzin egiten dit eta
nahigabea eztarrian
arrotz sentitzen hasi naiz
non eta nire herrian!

5)
Lantegi bat urrutira
pausoak harantz zuzendu
lanpostuak eskas baina
lan egitea baimendu
eskatutakoa egin
besteen hutsak zuzendu
nire soldata, ordea,
nagusi jaunak hartzen du
behin eta berriz ari zait
erakutsi eta kendu.

6)
Lantoki horretan luze
arituko nintzen antza
ametsetan inork gutxik
galtzen baitu esperantza
eskuan motozerra bat
daukat bilintzi-balantza
behar ez zuen aldera
egin duenean dantza
ez dut deus sumatu baina…
A zer nolako triskantza!

7)
Nik ez dakit kartzelara
zergatik sartu gaituzten
zaindariak ari dira
bazter guztiak zapuzten
beren begietan ez da
erruki izpirik ikusten
ume bat bisita-gelan
marrazki bat erakusten
besotan hartu nahi nuke
baina ez didate uzten.

8)
Halako batean jende
mordoa daukat atzean
lasterka nahi baina ezin
kamera geldo antzean…
Eta bat-batean nago
zulo beltz baten ertzean
handik amildu egin naiz
hegaldatzen saiatzean
esnatuko ote gara
lurrera ailegatzean?

9)
Nolako surrealistak
Ingumaren besarkadak!
Begiak zabaldu ditut
eta blai daude izarak
berriro berpiztu zaizkit
amesgaiztoko ikarak
“izerdia baino ez da”
baretu gara pixka bat…
Zein lasaigarriak diren
horrelako “eskapadak”!

10)
Eki da “mendebaldarron”
lokamutsen zirrikitu
argiak ongi baitaki
iluna nola gainditu
baina nahiago bideak
denentzat baldin balitu!
Izan ere hemen askok
nahiz eta egunak argitu
amets gaiztoenak esna
bizi behar izaten ditu.

Iturria: https://bidasoa.hitza.eus/generoak/iritziak/hitza-irunabar-bertso-sorta-aitor-errazkin-2/

Posted in Bertsoak and tagged , | Utzi iruzkina
29 Ira 2025

“OTAri (Ordaindu Ta Amorratzeari)”. Jon Luzuriaga Iurramendiren bertsoak, Bidasoako Hitzan.

OTAri (Ordaindu Ta Amorratzeari)

Egilea: Jon Luzuriaga Iurramendi

Doinua: Betroiarena A

Hemen jaitsi dezakezu

1)
Hiri modernoa ez
al da tiranoa?
Ipurdian atera
ohi den granoa?
Pobreenentzat presto
du sotamanoa…
Ni igual izan arren
probintzianoa,
zu hain urbanoa;
harreman sanoa
eta humanoa
zen bion asmoa
baina barru guztia
hustera noa.

2)
Hondarribia, Irun
edo Hendaiara
autoz joanez gero
dena da traba,
txuloren baten bila
hona eta hara
aparkatu arte bi
ordu beharbada,
hori gutxi da ba,
gero zuri paga
ematea jada
nahitaezkoa da…
Zerbitzu deitu arren
lapurra zara!

3)
Lehen leku gutxitan
zeunden osasuntsu
orain muturra nonahi
atera duzu.
Zoritxarrez onartu
zaitugu amultsu
baina nire protestak
ze amorru kutsu
nahiz ez esan usu
aitortzen dut sutsu
maiz hartu ohi dut su
gorroto zaitut zu,
nire txanpon guztiak
jaten dituzu!

4)
Ezikusiarena
eginda arantza
ateratzeko izan
dut esperantza,
txanponik bota gabe
zure ahorantza
zigortuko al nauzun
geroko zalantza.
Ustezko bengantza
edo errebantxa
egitean antza,
multa testigantza,
beti oso garesti
irten zait txantxa!

5)
Gustu txarreko OTA,
TAO bedeinkatu
pozoiez nahi zintudan
madarikatu!
Bederatzi puntutan
nahiz ozen kantatu
belar txarra ezin da
errez akabatu…
Sorta hau bukatu
aurretik ohartu
hitz onik aipatu
badizut barkatu
eta gaizki esanak
gogoan hartu!

Iturria: https://bidasoa.hitza.eus/generoak/iritziak/hitza-irunabar-bertso-sorta-jon-luzuriaga/

Posted in Bertsoak and tagged , | Utzi iruzkina
14 Ira 2025

Beste ikasturte batez bailarako hedabideekin elkarlanean

Irunabarren, bat-bateko bertsoez gain bertso idatziek ere garrantzia handia dute, bertsolaritza eta bertso-jarriak inguruko hainbat txokotara helarazi asmoz, badira zenbait ikasturte bailarako hedabideekin elkarlanean ari garela.

Hasi berri dugun 2025/26 hau bederatzigarren ikasturtea dugu Irunerorekin elkarlanean. Urrian hasi eta ekaina bitarte, hilero, hilabete hasieran, Txingudiko bertso-eskoletako kide batek bertso-jarriak argitaratuko ditu aipatutako aldizkariko papereko edizioan, eta egun gutxi batzuk igaro ondoren, eskuragarri izango duzue argitalpen hori bera baita bertsio digitalean ere. Nola ez, Irunabarren webgunera ere ekarriko ditugu bertso horiek guztiak.

Bestalde, zazpigarren ikasturtea osatuko dugu Bidasoko Hitzarekin elkarlanean. Txingudiko bertso-eskoletako kideren baten bertso-jarriek argia ikusiko dute, irailetik hasi eta ekaina bitarte, hilabeteko azken ostiraletan. Kasu honetan ere paperezko edizioan zein bertsio digitalean egongo da ikusgai eta Hitzako sorta guztiak ere Irunabarren webgunera ekarriko ditugu.

Horretaz gain, osagarri modura, idatzitako sorta hauek musikatzen direnean ere eskuragarri izango dituzue webguneko argitalpenetan zein Ivoox-eko gure kanalean (harpidetu zaitezte!). Gero eta gehiago zarete elkarlan hauetako bertso-sortaren bat musikatzera animatu zaretenak. Ikasturte honetan ere animatuko bazinate plazer handiz jasoko genituzke zuek musikatu eta kantatutako bertso-sortak irunabar@gmail.com helbidean.

Hona hemen pasa den ikasturtean argitaratu eta musikatutako zenbait bertso-sorta:

  • “Madraí amach!” Beñat Elosegi Ortiz de Zaratek 2025eko apirilean Iruneron argitaratu eta Beñatek berak musikatutako bertso-sorta:
Hemen jaitsi dezakezu
  • “Bertso sorta hau ere heldu da”, Adrian Arruti Bernadetek 2024ko azaroan Bidasoako Hitzan argitaratu eta Peio Etxebarriak musikatutako bertso-sorta:
Hemen jaitsi dezakezu
  • “Ikaztegietatik Irunabarreara”, Jon Luzuriaga Iurramendik 2024ko urrian Iruneron argitaratu eta Jone Garmendia eta Jonek berak musikatutako bertso-sorta:
Hemen jaitsi dezakezu

Posted in Berriak,Bertsoak and tagged ,,,,,,, | Utzi iruzkina

Post Navigation

← Older Entries