2024ko Korrika Irundik hasiko dela-eta, hamaika ekimen da eskualde osoan zehar. Girotze fase horretan, hainbat eragilerekin ari gara elkarlanean, eta Hendaiako Enbata gaztetxearekin onduko dugu hurrengo ekimena. Martxoaren 1ean, ostiralean, bertso-saio musikatua antolatu dugu Enbatako eta Aek-ko kideekin batera. Urko Casadok gidatuko du saioa, arratsaldeko 19:00etan hasiko da. Adrian Arruti, Haira Aizpurua, Manu Goiogana eta Maddi Ane Txoperena bertsolariak ariko dira, eta baita Iban Clemente, Beñat Elosegi, Oneka Jauregi eta Rafa Rodrigo musikariak ere.
Gogoratu datorren ilbeltzaren 20an egitarau txukun askoa antolatu dugula Bidasoko AEK, Landetxako auzo elkartea eta Larrea, hurbileko elikadurarekin batera. Oraindik sarrerarik erosi ez baduzu, kontuan izan erosteko azken eguna igande honetan izango dela. Saioaren gaineko informazio gehiago nahi baduzu, esteka honetan bilatuko duzu behar duzun hori. Musikari eta bertsolariak prest daude honezkero, zeren zain zaude?
1 Abenduaren hamabostean, hala duzu iragarri, erretiratu zara aritu ostean buru-belarri. Merezitako esker keinurik ez denez jasotzen sarri nahi nizkioke zure lanari hainbat bertso xume jarri.
2 Alde batetik, biblioteka bat sortu duzu aldez alde. Zenbait ikerlan historikoren jabea zara, bestalde. Ez dakit ongi jabetu garen, behin eginda zure galde, zenbat lan egin duzun gaurgero Hondarribiaren alde.
3 Itsas Etxetik Zuloagara, mandatuari jarraiki, hogeita hamasei urtean zehar lana egin duzu, baiki, biblioteka bat ez baita inoiz, aditu gisa zenbaiti, eskuizkribu eta liburu zaharrez soilik eraiki.
4 Gehiago dela konforme gaude, baina gehiago zer da ba? Erakusketa, tailer, liburu eta ekimen bailara. Zenbat hitzaldi, zenbat aurkezpen… guztia Zuloaga da. Gure kapital kulturalaren hornitzaile izan zara.
5 Zeregin hori beste edonork burutu zezakeenik gauza jakina da eta ez dut esango hala ez denik. Baina horrela gertatu balitz ikusi nahiko nuke nik zuk adinako elegantziaz egin ahalko zuenik.
6 Baleen ehizaz Hondarribian nahiz Konbentzio guduaz, Hondarribiko itsaslapurraz zein baserrien munduaz… inor kezkatu ez balitz kontu horien iturburuaz nekez jakingo genuke ezer bizi dugun inguruaz.
7 Herri bat ezin da sortu bere historia jakin gabe zure alea eskaini duzu izan dadin burujabe. Hondarribitik harago ere ez da pasa oharkabe hori ulertu dugun guztiok oso eskertuta gaude.
8 Sorta zintzoa eskribitu nahi nizun, baina hala ote? Ingurukoek, behintzat, hitzez hitz gauza berbera diote. Merezi duen horri aitortza egin behar genioke salbuespena ez zara eta milesker, bihotzez, Kote!
Kaixo, bertsozale: 2024ko Korrika Irundik hasiko dela-eta, Bidasoko AEK eta eskualdeko gainontzeko euskara eta kultura eragileak martxoaren 14ra bitarteko asteak girotzeko lanetan hasi gara. Testuinguru horrekin, Irunabar, Irungo bertsoaren bilguneko hainbat kidek eta inguru hurbileko lagunek osatu duten halako “bertso-banda”-ren saioa antolatu dute Katea-Landetxako auzo elkartearekin batera. Bertso bazkari musikatua izango da. Bertsolariak (Adrian Arruti, Abel Zabala, Aitor Errazkin eta Manu Goiogana), musikariak (Iban Clemente, Beñat Elosegi, Rafa Rodrigo eta Maddi Sanz), eta guzti horien artean, lokailu lanetan, gai jartzailea (Gotzon Aizpiolea). Horixe da antolatutako menua. Ilbeltzaren 20an izango da, eguerdiko 14:00etan, auzo elkartean. Jatekoa Larrea, hurbileko elikadurak prestatuko du eta sarrerak 15 euroan eskuratu ahal dira, honezkero, Hazia, Depor, Aranaztarra, Nuevo, Otazpi eta Itzala tabernetan (aukera beganoa ere egongo da. Hala nahi izanez gero, idatzi 747425434 telefono zenbakira).
Kaixo, bertsozale: 2023an ere Moskuko jaiak egongo dira eta antolatzaileek aukeratutako leloa “Egiten baduzu hozka, gure auzotik ospa” da. Aurten ere, egitarau zabal eta aberats baten baitan, bi bertso-saio antolatu ditu Irunabar, Irungo bertsoaren bilguneak, Moskuko jai batzordeko kideekin elkarlanean: bertso-poteoa eta bertso-saioa.
Bertso-poteoa izango da lehena, abuztuaren 12an, larunbatean, herri-bazkariaren aurretik, eguerdiko 12:30ean, Larragane tabernatik abiatuta. Beñat Gaztelumendi, Irantzu Idoate eta Ekhiñe Zapiain ariko dira auzoko tabernetan barrena kantuan.
Bertso-saioa, berriz, asteartean izango da, abuztuaren 15ean. Plazan izango da, arratsaldeko 17:30ean. Adrian Arruti, Unai Iturriaga, Aitor Sarriegi eta Maddi Ane Txoperena ariko dira kantuan Egoitz Zelaia esanetara.
Aurtengo kartela eta gainontzeko egitaraua:
Abuztuak 11, ostirala
18:00etan: Txosna irekiera eta pregoia.
18:30-20:00: Ibilbide historikoa Mertxe Trantxerekin.
20:15-20:45: Santanin lasterketa.
21:00etan: LUKIEK eta BAD SOUND SYSTEM ETA LAGUNAK.
Abuztuak 12, larunbata
12:30-14:00: Bertso poteoa.
14:00-16:30: Herri bazkaria. Tiketak Moskuko ostatuetan salgai 12 euroan.
16:30-17:30: Bertso poteoa 2.0.
18:00: Pintxada gaua. DJ VIV; S.U.A; SUSTRAI SISTER ETA AMETS; TOXMINA; ETA SELECTOR DON LOOPE.
Abuztuak 13, igandea
12:30: Patata tortilla txapelketa.
17:00-21:00: Artisau eta bigarren eskuko azoka.
18:00-19:00: Bakarrizketa.
22:00: Pestañas postizas SL: ALICIA KISS ETA GARAZI LA FANTASY.
Abuztuak 14, astelehena
15:00-17:30: Mus txapelketa.
18:00: Futbolin txapelketa.
21:00: YOGURINHA BOROVA; OCCHI DI FARFALLA; SOFA; ETA CHULERIA, JODER!.
Lehen bost saioak egin ditugu eta primerakoak izan dira. Seigarren saioaren atarian gaude honezkero. 2023ko ilbeltzean abiatu genuen proiektuak ikasturte amaiera aurrean du eta, beraz, ikasturteko azken saioa izango da ekainaren 9an izango duguna.
Saioa berezia izango da. Orain arte ez bezala, musikatua izango da ekainekoa. Kantuan ariko dira Adrian Arruti Bernadet irundarra, Izarne Zelaia Arratibel donostiarra eta Manu Goiogana Bengoetxea irundarra. Haiekin batera musikan arituko dira Iban Clemente Martin, baxuarekin, Iker [Xufi] Eizagirre Zufiaurre, gitarrarekin, Beñat Elosegi Ortiz de Zarate, mandolinarekin, Rafa Rodrigo Perurena, gitarrarekin eta Maddi Sanz Sanchez, harparekin. Bertso-saioa 19:30ean hasiko da.
Gogoan izan Muarak afaltzeko aukera bikaina eskaintzen duela.
Bortzirietako Bertso Eskolak gonbidatuta joan ginen Irunabarren jirako hainbat lagun XXIII. taldekako lehiaketara kantura, eta sekulako harrera egin ziguten bortziritarrek. Horra bidasotarrentzat ondutako bertsoak, esate baterako; behin baino gehiagotan kantatu genituen denok elkarrekin, baita Arrano Elkartean jokatu zen finalean ere.
Irun badaukazu zerbait
Hondarribiko kresala
Irun badaukazu zerbait
Aiako harrien itzala
Irun badaukazu zerbait
Biriatuko magala
Irun badaukazu zerbait
Plaiaundi ta Sindikala
Irun badaukazu zerbait
Bidasoa ospitala
Irun badaukazu zerbait
Bortziriko kapitala?
Irun badaukazu zerbait
Irunabar mundiala
ta bihar egunsentiak
bertsotan erna zaitzala
Bortziriko bertso eskolan
gabon bueltako epela
hogeita hiru aldi dira
taldeka biltzen garela
bertso onenaren saria
Kottorentzako txapela
koplak trikitixarekin
kale ixkiñan kartzela
oparia oroigarri
ta kanta bat gai bezela
Arranoko afaria
bertsozaleen hotela
irri algara ta malko
emozioen koktela
gazteak zarete eta
gozatu dezazuela
Eskerrik asko Kataku, Zialdo, Antoiu eta Arrano; eskerrik asko Bortziriak!
1 Nahiz irakurtzera heltzen zaren ez zaidan inporta hitz hauekin hautsiko dut zu eta bion konforta. Hona hemen idatzita, eta odola borborka, nire ahotik sekula entzungo ez duzun sorta.
2 Hasierako eztia bilakatu zen gozakaitz nahiz egoerak behartu ez zuen izan behar gaitz. Izurriek zer ikasi erakusten dutenez maiz; zoriontasunik bada asintomatikoa naiz.
3 Ez nagoelako ongi ezin dut egin eskerik, baina zure jokaerak nire mina berresten dit. Ustez ez zenuenean zure hitza saihesterik zugandik ez dut aditu isiltasuna besterik.
4 Hautazko isiltasunak, ohartu behar zenuke, gainontzekooi ahotsa ere ken diezaguke. Ahots-korden loturek maiz gehiegi estutzen dute zure eztarrian daude, baina ni itotzen naute.
5 Batera eta bakarrik pasatako une latzen ondotik ez dakit ongi zer ari zaren bilatzen mundua ez baita zure zilborretik abiatzen eta, are gutxiago, zure ohean bukatzen.
6 Aldentzearen ideia gu biontzat bada bera bidea aukeratzean joan banaiz galbidera nik nire gezurrarekin egin dezaket aurrera. Zuk zure egia duzu, baina egia ote da?
Irunabar, Irungo bertsoaren bilgunea 