Irunabar, Irungo bertsoaren bilgunea

Archive for the tag “Bertso-tailerra”

IV. Bertso Mendaria bertan behera [2021-11-24]

Kaixo, bertsozale:

Pasa den urriaren 25ean iragarri genuen IV. Bertso Mendaria egingo genuela, baina bertan behera utziko dugu.

Egun dauzkagun baldintzak ez dira egokienak, eta izurritearen enegarren zabalkundea dugun honetan, ezin dugu bete beharreko segurtasun neurririk bermatu. Beraz, tamalez, IV. Bertso Mendariari egoerak uzten digunean ekingo diogu.

Bertso Mendaria bertan behera utzi badugu ere, Irabazi asmorik gabeko I bertso paper sarian parte hartu duten bertsolariekiko zorretan gaude. Horregatik, sorta azaroaren 23a baino lehen aurkeztu duten kideekin aurreikusitakoari eutsiko diogu, beti ere, modu xume eta seguruan. Beraz, orain hilabete iragarri bezala, ostiral honetan, azaroaren 26an, arratsaldeko 19:30ean hasita, sorta aurkeztu duten bertsolariekin batera burutuko dugu ekitaldia.

Besterik gabe, eskerrak eman nahi dizkiegu bertso paper sarian parte hartu duzuen bertsolari guztiei eta, era berean, barkamena eskatu nahi diegu gurekin batera IV. Bertso Mendarian parte hartzeko asmoa zuten gainontzeko lagun guztiei.

Aurki elkar ikusiko dugulakoan,

osasuna.


Txingudiko Bertso Eskolako Bertso Tailerra

Irabazi asmorik gabeko I. Bertso paper saria eta IV. Bertso Mendaria > 2021eko azaroaren 26an

Txingudiko Bertso Eskolako Bertso-tailerrak laugarrenez antolatu du Bertso Mendaria azaroaren 26rako, ostiralarekin eta 19:30ean hasi eta 22:30ak bitarte.

Joan den ikasturteetan antolatutakoren batera azaldu zenak badaki zertan den kontua: Muara Elkartearen ateak, barra (pintxo eta guzti) eta mikrofonoak guztiontzat zabalik.

Oraingoan, baina, bada berrikuntzarik; Irabazi asmorik gabeko I. Bertso paper saria.

Sari honen helburu behinena, bailarako bertso sortzaileak bertsoa protagonista den inguruan batzea da. Horrek ez du, inondik inora ere, beste edonongo sortzailerik baztertzen; edonork hartu dezake parte sari honetan.

Bertso paperak aurkeztu ahala, antolakuntzak denak batu eta azaroaren 26an, Hondarribiako Muara Elkartean, ikusgai jarriko ditu. Sortzaile bakoitzak, sorta igorri bezala, aipatutako data horretan Muaran aurkeztu eta bere sorkuntza kantatzeko konpromezua hartuko du.

Parte hartzaileek, egunean bertan antolatzaileek markatutako sistemaren arabera, sorta bakoitza kantatu ahala ebaluatu beharko dute. Egileak ezingo du bere sorta baloratu.

Aurkeztutako sorta bakoitza elkarteko paretetan egongo da eskegita gainontzekoek irakurri ahal izateko.

Saria egongo da… edo ez!

Jarraian, zeinbait irizpide:

Bertsoekiko:

– Maila bat eta bakarra.

– Norbanakoak zein talde batek egin ditzake.

– Nahi adina bertso paper aurkez daitezke.

– Gutxienez 3 eta gehienez 5 bertsoko sortak.

– Gai, doinu eta neurri librean*.

– *Kopla formatuan bada, gutxienez 6 eta gehienez 10 kopla.

Nola helarazi:

– PDF formatuan.

– txingudikobertsotailerra@gmail.com helbide elektronikora.

– Urriaren 26tik azaroaren 23ra bitarteko edozein egun eta ordutan.

Azaroaren 26an, ostiralarekin, arratsaldeko 19:30ean, Hondarribiako Muara Elkartean ikusiko dugu elkar! Animatu zaitezte parte hartzera! Ederki pasako dugu!

Bertso berriak, ikasturte amaierari jarriak [2021-06-18]

Kaixo, bertsozale:

Konturatu orduko bukatu da ikasturtea eta, zailtasunak zailtasun, aurtengoa ere primerakoa izan da.

Txingudiko Bertso-Eskoletako Bertso-Tailerreko kideak, bertso sorta kolektiboa ondu dute ikasturteari amaiera emateko. Ikasturtean zehar pasatako hainbat efemeride hartuta, ideia landu eta sorta osatzerainoko esperientzia izan da. Gainera, Eleuterio Jauregi Makaloren ahots eta gitarraz lagunduta ikus-entzunezkoa egin dute.

Jarraian, transkripzioa eta youtubeko lotura.

Gozatu eta uda ona pasa!

BERTSO BERRIAK, IKASTURTE AMAIERARI JARRIAK

Doinua: Antton eta Maria i

1

Asian nola dagon

Mesopotamia

Bidasoan daukagu

guk akademia.

Ez eskola, ez tailer;

Bertsokodemia.

Hitzetan umorea

bota legamia

Bertso-Tailerrak dakar

hona pandemia.

2

Teknologia berri

komiki, fanzine

asko ikasi dugu:

argazki ta zine.

Denbora esan baino

orain esan time

azkar egina baino

hobeto Azkaine

Orain galdetzen dugu

Bilduko online?

3

Tailerrak urte luzez

Aitor zuen buru

baina ihes betean

harrapatu dugu.

Oiartzunek besoak

zabalik hartu du.

Gerra Kontseilua fin

prestatu dizugu

Baina lasai, oraindik

guk maite zaitugu!

4

Birus zital gaiztoak

egin digu kalte:

guri jake, guk hari

berriz jake mate.

Txertoekin gabiltza

ziztatuz jo ta ke

Moderna dauzkate…

AstraZeneca, Pfizer,

Eta zuek, lagunak,

Txertan zabiltzate?

5

Aurten deskubrimendu

onena onetan

Makalo da, nola ez?

Diogu benetan.

Bertso sorta musikaz

jantzi duenetan,

hau bera adibide

adibideetan,

kolorea jarri du

urte gris honetan!

6

Amorruen jopuntu

Garrido zein Macron.

Koldar hutsak zarete

ez zuzen, ez gizon.

Euskararekin gogor,

erdararekin bon.

Udaltzainekin dugu

hainbat ideia on

kasu: erabil bezate

Google Translation!

7

Urte bat daramagu

zailtasunak jota,

euskara zein kultura

datoz ate joka,

musukoa, forumna

ezin kendu bota,

birusak ez bai daki

toka eta noka,

saretzeak arindu

dezake borroka.

8

Telematikoz nola

telepati lana,

etxez etxe arnastuz

gure harremana,

eta bizirik gaude

gatoz zuengana,

Irunabar bertsoz blai

ta sorta andana,

Bertso-Tailerretikan

besarkada bana.

III. Bertso Mendaria > 2020ko otsailaren 28an

Txingudiko Bertso Eskolako Bertso-tailerrak hirugarrenez antolatu du Bertso Mendaria otsailaren 28rako, ostiralarekin eta 19:30ean hasi eta 22:30ak bitarte.

Joan den ikasturtean antolatutakoren batera azaldu zenak badaki zertan den kontua: Muara Elkartearen ateak, barra (pintxo eta guzti) eta mikrofonoak guztiontzat zabalik.

Ederki pasako dugu, beste behin ere. Anima zaitezte!

Ikasturteko 2. eta azken bertso mendaria. 2019-06-21, Hondarribiko Muara Kultur Elkartean

2019ko ekainaren 21ean ospatuko dugu ikasturteko 2. eta azken bertso mendaria. Horrek ez du esan nahi urtea amaitu aurretik besterik antolatuko ez dugunik, baina hel diezaiogun, oraingoz behinik behin, ekainean datorkigun honi.
Estrainekoan bezalaxe, jatekoa eta edatekoa izango da, merke eta ona, eta bertsoa izango da protagonista nagusi. 19:30etan emango diogu hasiera eta 22:30ak bitarte iraungo du mendariak. Bertan elkar ikusiko dugulakoan, izan ongi eta anima zaitezte ikasturteari lagun artean eta bertsotan agur esatera. Ederki pasako dugu.

2019-06-21

Xanti Zabala “Lexo” – omenaldia. 2019-03-16.

Kantaldia [2019-03-16]

Hedabideetan zabaltzen ari da Txingudiko Bertso Eskolako bertso tailerreko kideek Xanti Zabala bertsolariaren omenez antolatu duten kantaldiaren berri.

Eskerrik beroenak eman nahi dizkiegu hedapen horretan beren aletxoa jarri duten hedabide eta erakundeei. Guri iritsi zaizkigun loturak partekatu nahi ditugu zuekin (barka, baten bat ahaztu badugu), bai eta sarean Xanti Zabala “Lexo” bertsolariari buruz aurrez bazen hainbat lotura interesgarri ere:

Jakingo duzuen bezala, datorren larunbatean izango da omenaldia, martxoaren 16an, Hondarribiko Itsas Etxea Auditoriumean, 19:00etan hasita (ate irekiera, 18:30etan).
Kantaldiari buruzko informazio gehiago:
Xanti Zabala “Lexo” bertsolariari buruzko hainbat lotura:
Datorren larunbatean elkar ikusiko dugulakoan,
Eskerrik asko guztioi,

XANTI ZABALA “Lexo” bertsolariaren aldeko kantaldi-omenaldia [2019-03-16, Hondarribian]

Tania Lozano Irundarrak eginiko kartela. Erretratuaren egilea, Arantxa Arratibel.

Kantaldi formatuan egingo dio omenaldia Txingudiko bertso eskolak Xanti Zabala “Lexo” bertsolari handia zenari. Martxoaren 16an izango da emanaldia, Hondarribiko Itsas Etxea Auditoriumean, eta dohainik izango da sarrera.

Gaztetan ekin zion Lexok bertso lanari, eta hainbat sariketa eta txapelketatan hartu zuen parte. Zepai Saria irabazitakoa, 1967ko Gipuzkoako finalean ere kantatu zuen, besteak beste. Eta bertso jarritan ere sekulako altxorra, animaleko ondarea utzita zendu zen Xanti, 2012ko martxoan. Bere obra idatziaren zati handi bat txukun asko jasota dago Udaberriz izeneko Auspoa bildumako 325. liburukian, eta baita bat-batean kantatutako hainbat bertso ere, liburuak KDa baitakar barruan. Liburuaren koordinazio lanak eta iruzkinak Nikolas Aldaik eginak dira, eta Pello Esnalen hitzaurrea darama. Liburu horretatik beretik hautatu dituzte bertso tailerreko kideek kantaldian kantatuko dituzten bertso-sorta guztiak, hautaketa egitea galanki kosta bazaie ere.

Donostiako hainbat lagunekin bildu ohi zen Xanti bere zaletasunik handiena zuenari eusteko, eta 2008 eta 2012 urteen bitartean Txingudiko bertso eskolara ere etortzen hasi zen, bat-bateko taldean aritzera. Abel Zabala, Xantiren seme gazteena, Txingudiko bertso eskolako kide da, eta Irunabar, Irungo bertsoaren bilguneko eragile. Aita-semeek makina bat bertso kantatu zituzten elkarrekin, beraz, denbora tarte horretan. Baina bertso eskolako kide guztiekin zuen Xantik hartu-eman bikaina, eta hortik bertso eskolako kideek kantaldiari aitortzen dioten garrantzia. Bertsolaria omenduko dute, obrari aitortza egin, baina batez ere, berak idatzitako bertsoak mimoz musikatu eta kantatuz oroitu nahi dute laguna.

Orain hiru urte, 2016ko urriaren 22an, hain zuzen ere, Joxe Mari Lopetegiren aldeko kantaldi omenaldia antolatu zuten Txingudiko bertso eskolako bertso tailerreko kideek. Eta kantaldi harekiko lanak amaitu bezain laster ekin zioten Xanti Zabala “Lexo”ren aldekoa antolatzeari. Bertso tailerreko lagunek Lopetegi omendu zuteneko hainbat kantari eta musikariren laguntza jasoko dute honakoan ere: Auntxa Trikitixa Eskolako irakasle eta ikasleak, Irungo eta Hondarribiko Musika Eskoletako hainbat irakasle eta ikasle, eta beste hainbat musikari, kantari, bertsolari eta lagun.

40 lagun ingururen artean burutuko dituzte emanaldiko oholtza gaineko lanak. Eta Joxan Elosegi idazle eta itzultzaileak hartuko du bertso sortei buruzko iruzkinak egin eta kantaldia aurkezteko ardura. Bertso tailerreko kideek emanaldi hunkigarri bezain ederra espero dute. Ziur daude egindako bertso-sorten hautaketarekin, eta oso pozik kantari, musikari eta lagunek bertsoak musikatzeko eta oholtzaratzeko egiten ari diren lanarekin. Martxoaren 16a iristeko irrikitan daude dagoeneko bertso eskolako kideak, eta gonbidapena egin nahi diete eskualdeko bertsozale guztiei kantaldia entzutera Hondarribiko Itsas Etxea Auditoriumera etor daitezen, ezustez betetako kantaldia izango delako.

Bertso Tailerreko kideek Txingudiko Mugaz Gaindiko Partzuergoaren eta Hondarribiko Udalaren laguntza jaso du kantaldia aurrera ateratzeko.

Erne! Hemen da “I. Bertso Mendaria”. Animatu!

Txingudiko Bertso Eskolako bertso tailerraren ekimena da bertso mendariena. Hain justu ere joan den ekainean, ikasturteko azken bilkura amaitu eta mahaitik altxatzen ari zirela, bertso tailerreko kide batek botatako ideia izan zen. Gainerako kideek proposamena entzun, eta bost bat segundoz geratu omen zen denbora Irungo Motor Elkarteko hartan. “Zer?”, “Nola?”, “Ederra!”, “Horixe!”… “Egin behar diagu!”. Eta gaur arte.

Bertso tailerreko kideen esanetan, bertsozaletasuna garatzeko espazio bat gehiago izan nahi dute bertso mendariek. Aisialdiarekin lotutako espazio informala, baina bertsoaren jiran ibiliko dena, nolabait esan.

Eskerrik beroenak eman nahi dizkiete bertso tailerreko kideek Muara Elkartekoei, jarduera gauzatzeko lokala eta azpiegiturak erabiltzen uzteagatik. Bai eta mendaria dinamizatzen laguntzeko hurbildu zaizkien Irun eta Hondarribiko gazteei ere.

Anima zaitezte “bertso mendaria” probatzera. Ziur ez zaizuela kontrako eztarritik joango.

Bertso berriak, Kabigorriko bertso gauei jarriak

Txingudiko Bertso Eskolako Bertso tailerreko Xabier Bengoetxea, Iñaki Portugal, Xabier Isasi, Andoni Zelaia eta Aitor Errazkinek elkarlanean ondutako sorta da Irunero aldizkariaren 320 zenbakian argitaratutako bertso-sorta.

 

Egilea: Txingudiko Bertso Eskolako bertso tailerreko kideak

Doinua: Oihan beltzean zoinen eder den

 

 

Zuen aurrera bertso tailerra:

bosten proiektu komuna;

nagusi gabe eratu gara

sormena dugu jarduna.

Ba al dakizu Iruneroren

irakurle euskalduna,

zer demontre den Kabigorriko

hileko lehen osteguna?

 

Hilero bertso saio bat bertan.

Hasieran, sinesgaitza.

Batek lokala jarri, besteak

antolakuntza lan gaitza.

Eta bost urte dira gozatzen

paregabeko eskaintza:

Kabigorri ta Irunabarren

elkarlanaren emaitza.

 

Bat batekoak dira saioak

aurretik, bertso papera

beti bertako bertsolari bat

kantuz direnen artera

gaiak ontzeko eskualdeko

gai jartzaileak topera

kabiak ez du gutxi eskaintzen,

eta debalde, gainera.

 

Bidasoaldeko Ateneoa

beti abegi jario

egarri eta gose handi zein

txikien erremedio

entzule oro adi, isilik

errespetua medio

hitz neurtuari neurri-neurriko

babesa ematen dio.

 

Esperimentu kabi ere bada,

ta ez edonolakoa!

Musika-tresnak lagun badira,

magia bezalakoa!

Bertako doinu zein atzerriko,

bat-batekoan gakoa.

Eskualdeko probalekurik

emankorrenetakoa.

 

“Belarribizi” edo “ahoprest”

ongi etorria zara

leku bat duzu Kabi gorrian

etorri gure plazara

etxean legez baietz sentitu

senide baten gisara

zaletasunak batzen gaituen

famili txikia gara.

 

Ez du axola ofizioak

albaitero edo artzain

hargin, arotza, langile soila,

emagin edo abeltzain

mugazain edo mugalaria

osagile zein erizain

hilaren lehen ostegunero

bertan izango gara zain.

JOXE MARI LOPETEGIREN ITURRITIK BERTSOTAN – Kantaldia (bideoa)

Blog honetan adierazi genuen bezala, 2016ko urriaren 22an izan zen Joxe Mari Lopetegi bertsolari irundarraren omenez antolatu genuen kantaldia; orduko grabazioa publiko egiteko, ordea, gaurko eguna hautatu dugu: Espainiako II. Errepublika aldarrikatu zen egunaren bezpera, eta Joxe Mari Lopetegi zenaren eguna, 1875eko apirilaren 13an jaio baitzen, Irunen, orain dela 142 urte.

Post honekin itxitzat ematen dugu, momentuz, Txingudiko Bertso Eskolako Bertso-tailerreko kideek 2016ko urrian Joxe Mari Lopetegi bertsolari irundarra eta haren obra ezagutzera emateko abiatutako ekitaldi sorta. Mila esker bihotz-bihotzez bidelagun izan zareten guztioi.

Kantaldiari buruz, hona Argia aldizkariko zuzendari Estitxu Eizagirrek bere blogean idatzitakoak. Mila esker, Estitxu, beste behin ere (Estitxuk “Joxe Mari Lopetegi: Irungoa, errepublikarra eta bertsolaria” artikulua idatzia zuen, aurrez, Argian bertan, 2005. urtean).

Post Navigation