Irunabar, Irungo bertsoaren bilgunea

Archive for the tag “Uxue Larrukert”

2019ko lehen bertso gaua, bihar, urtarrilak 3, 19:30etan Kabigorrin.

Urte berri on, denori. 2019ko lehen bertso gaua bihar izango da, urtarrilak 3, hileko lehen ostegunarekin, 19:30etan Kabigorrin. Beñat Gaztelumendi, Odei Barroso, Xabi Maia eta Abel Zabala izango ditugu kantuan, Uxue Larrukerten esanetara. Anima zaitezte urteko lehendabiziko bertso-zitara, eta azken boladan nahikoa jan eta edan egingo zenuten arren, gogoan izan Kabigorrik afaltzeko aukera paregabea eskaintzen digula.

Ama Xantalen-Moskuko jaiak 2018

Aurtengo Moskuko jaietan ere bi bertso saio antolatu ditu Irunabar, Irungo bertsoaren bilguneak, jai batzordeko kideekin elkarlanean. Datorren larunbatean izango da lehena, abuztuaren 18an, bertso-poteoa, herri bazkaria eta gero, arratsaldeko 17:00aetan hasita eta auzoko tabernetan barrena. Manu Goiogana irundarrak eta German Urteaga beasaindarrak kantatuko dute bertan.

Igandean, berriz, bertso saioa izango da plazan bertan, 18:00etan hasi eta 19:30ak bitarte (kartelean bestela agertzen bada ere). Bertan Alaia Martin oiartzuarrak, Igor Elortza durangarrak eta Miren Artetxe eta Egoitz Zelaia hendaiarrek kantatuko dute. Gaiak Uxue Larrukertek eta Adrian Arrutik hartu dute bere gain; egunean bertako Gai-emaile lanak Uxue Larrukert irundarrak egingo ditu, ordea.

 

Uxue Larrukert irundarraren “Alaineri” bertso sorta, Iruneron

Irunero hamabostekariaren 324. zenbakian argitaratu dute Uxue Larrukert irundarraren “Alaineri” bertso sorta.

ALAINERI
1)
Orain hilabete batzuk
joan zinen Diriambara
Bertako elkarte baten
grabaketa lanetara
Argazkitan harrapatuz
gizartearen islada
Gordina edo alaia
kliskada eta kliskada
Batenbat heltzen zitzaigun
zure “egun on” gisara
Hau ere jaso genuen
errazegi beharbada:
“Daniel Ortegaren aurka
Nikaragua altxa da.”
2)
“Ezin dut dena kontatu
baina oso da krudela”
“Tankeak herrian eta
kale-borroka itzela”
hilketa kopuru hotza
ta odol usain epela
“Manifa batera noa,
ta ondo nabil bestela”
“Jakin Managuan kaleak
trintxerak ziruditela
AK-47z
tirokatzen gintuztela”
Ta wifiak berriz ihes
bala artetik bezela…
3)
Nicaragua sandinista
Muguruzaren ahotik
Zenbatetan ez al dugu
kantatu biok gogotik
Ta orain dena ezberdin
zu han bertan zaudenetik
Ze errez ikusten dugun
iraultza gure sofatik
Morboa eta izua
biak batera datozkit
Baina pribilegiodun
lasaitasun bat daukat nik
Haiek baino ziurrago
zaudela ongi baitakit
4)
“Azken egunotan asko
okertu da egoera
Agian itzuli beharko
genuke laster etxera”
Azkar bukatuko al da?
zein ote da bukaera?
Behin borrokan sartu eta
botako al naiz atzera?
Hautu ona zuk zeuk duzu
egon motz edo luzera
Zentzudun, iraultzailea
ta sentibera baitzera
Laster emango dizudan
besarkadaren antzera.
Alaineri.

Apirileko Kabigorriko bertso-gaua [2017-04-06]

Apirilaren 6an izango da, ostegunarekin, 2016-2017 ikasturteko 7. bertso-gaua. Gotzon Aizpiolea irundarraren esanetara ariko dira Urko Casado astigartarra, Iñigo Ugarte Gaintxurizketakoa, Odei Barroso urruñarra eta Maialen Akizu urretxuarra. Bertso jarriak, ordea, Uxue Larrukert irundarraren eskutik helduko zaizkigu. Saioa Kabigorri Bidasoaldeko Ateneoan izango da saioa, hilabeteko lehenengo ostegunero bezalaxe, arratsaldeko 19:30etatik aurrera. Saioa eta gero, afaltzen geratzeko aukera bikaina izaten da Kabigorrin. Anima zaitezte!

This slideshow requires JavaScript.

 

2015-2016 ikasturteko Kabigorriko bertso-gauetako bertso sortak

Hemen dituzue irakurtzeko moduan 2015-2016 ikasturtean Kabigorriko berts-gauetako bat-bateko saioen aurretik Irunabarreko hainbat kide eta lagunek ondu eta kantatutako bertso-sortak.

//e.issuu.com/embed.html#26461396/39283552

Apirileko Kabigorriko bertso gaua (2016-IV-07)

Jokin Bergara eibartarra, Iñaki Murua gabiriarra, Beñat Gaztelumendi añorgarra eta Aitor Errazkin irundarra ariko dira kantuan apirileko bertso gauean, eta Manu Goiogana irundarra arduratuko da gaiak jarri eta saioa aurkeztu eta gidatzeaz. Bertso jarriak Uxue Larrukert irundarraren eskutik helduko zaizkigu; atzerrian da bera, baina iritsaraziko dizkigu bertsoak, ziur, nola edo hala.

Hitzorduari dagokionez, beti bezalatsu; 19:30etan ekingo diegu bertso idatziei eta amaitu bezain laister oholtzaratuko dira bertsolariak. Kontuan izan aparta izaten dela saioa amaitu eta afaltzen geratzeko Kabigorrik eskaintzen digun aukera. Guk aldiro baliatzen dugu, bederen; anima zaitezte zuek ere.

This slideshow requires JavaScript.

Maiatzeko Kabigorriko bertso gaua (2015-05-07)

Urtea nahi baino bizkorrago joan den honetan, ikasturteko azken aurreko saioarekin topo egin dugu. Maiatzaren 7an, arratsaldeko 19:30etatik aurrera, Saioa Alkaiza Guallar iruindarra, Miren Artetxe hendaiarra, Nahikari Gabilondo zarauztarra eta Egoitz Zelaia hendaiarra ariko dira bertsotan. Alaia Martin oiartzuarrak jarriko dizkie gaiak bertsolariei, eta Uxue Larrukert irundarrak jarriko ditu bat-bateko saioaren aurreko bertsoak.

Anima zaitezte! Kontuan hartu Kabigorrik saioa eta gero bikainki afaltzeko aukera eskaintzen digula ostegunero.

 

This slideshow requires JavaScript.

Post Navigation