Irunabar, Irungo bertsoaren bilgunea

Archive for the category “Bertsoak”

03 Aza 2026

“Pantailetatik zintzilik”. Manu Goiogana Bengoetxearen bertsoak, Bidasoko Hitzan.

PANTAILETATIK ZINTZILIK

Egilea: Manu Goiogana Bengoetxea

Doinua: Gizakiak harri bat

Hemen jaitsi dezakezu

1)
Idatzi nahiko nuke
dudan sentipenaz,
kezka baitut pantailek
duten hedapenaz.
Orain uneoro da
lehen zena apenas,
haurrak pantailen menpe,
ni penaren penaz,
hausnartu ote dugu
euren garapenaz? (Bis)

2)
Nahi baititugu isil
antzean mantendu
etengabe pantailak
ditugu sostengu.
Unean irtenbide
ona ematen du,
baina ondorioak
ohi dira gailendu:
isilarazten ditu
baina loa kendu. (Bis)

3)
Bideo zentzugabe
motzen zaintzapean
hainbeste estimulu
azkar ematean
horra ohituko dira
eurentzat kaltean.
Gero_eskuak burura
inork esatean
ezin dela murgildu
liburu batean. (Bis)

4)
Kognitiboki zenbat
dien eragiten
hausnartu gabe zaila
genuen jakiten.
Bideoak ikusten,
nahiz zer ez dakiten,
pilatu beharrean
hamaika bizipen
mundua esploratzen
eta hitz egiten. (Bis)

5)
Aldiro umeek ze
dopamina txute,
pentsa hori lutzatzen
bada urtez urte
eguneroko jardun
luzearen truke
pantailak bilakatzen
dituzte arkupe
ta euren mundua han
eraikitzen dute. (Bis)

6)
Ez den baden zerbait da
mundu digitala,
oso oso luzea
duena itzala.
Nork ez du_ikusi haur bat
mobila daukala
pantaila aurpegira
hurbilduz doala,
mugikorrak xurgatu
behar balu bezala. (Bis)

7)
Etxea txukuntzeko,
orrazteko apain,
laneko estresak ez
diezagun har gain…
lehen aiton-amonak,
mugikorrak orain.
Gurasoak ez beste
edozein umezain
eta artean haurra
haurtzaro baten zain. (Bis)

8)
Ez ditzagun haurrak har
hain era estuan,
gu ere baikabiltza
ezin saihestuan.
Mobila erabiltzen
beti aurreskuan,
haurren hobe beharrez
kezka antzeztuan
beraiei debekatzen
geurea eskuan. (Bis)

9)
Geratzeko etorri
zaigunez mundura
pantailen, edukien
ta hormonen guda,
nahiz eta haur gehienek
ikusi gustura,
ez ditzagula utzi
beraien eskura,
ta erabil ditzagun
behar den modura. (Bis)

Iturria: https://bidasoa.hitza.eus/generoak/iritziak/hitza-irunabar-bertso-sorta-manu-goiogana-2/

Posted in Bertsoak and tagged , | Utzi iruzkina
02 Aza 2026

“Zerrendan oraindik”. Josu Laguardia Igiñitzen bertsoak, Iruneron.

ZERRENDAN ORAINDIK

Egilea: Josu Laguardia Igiñitz

Doinua: Gure herri txiki hau da

Hemen jaitsi dezakezu

1)
Mundua jira eta jira…
AEB, Israel, Txina…
Belatzen estrategia,
usoentzako medizina.
Heriotza aiseagoa da,
aurrez jarrita morfina;
Ikusgarriagoa baina,
bada nitroglizerina.
Zertarako daude eskolak?
Zertarako sanedrina?
Zer irakasten da bertan?
Soilik gerrako doktrina?
Nola bihurtzen da norbait
erahiltzeko makina?
Belatzen soroetan, zurtz…
hilzorian, Palestina.

2)
Batzuk, doktrinaz doktrina;
beste batzuk, tranpaz tranpa.
Palestinatik urruti, Trump
bere hamakan etzanta.
Bero dagoenean, “ice-cream”,
fresko dagoenean, manta…
Eta asperdura uneetan,
hautatu nori egin “zanpa”.
Venezuela, Iran, Yemen,
Palestina… a zer txanpa!
Bere gozagarrirako,
odolustu, tantaz-tanta…
“Nola zaude gaur, Benjamin?
Zure estarriko marranta?
Gaur Gazako zer tokitan
nahi duzu kolpe galanta?”

3)
“Donald, kolpea izan dadila
bortitza bezain azkarra.
Ikas dezaten betiko
munduan nork duen indarra.
Zabal bedi Palestina
osoan Daviden izarra.
Gaza banatuko dugu
bi zatitan, lagun xarra.
Zuk aukeratu aurretik
non jarriko dugun marra.
Nik nahiago dut hegoa,
eta zuretzat, iparra.
Gure negozietarako
ez da banaketa txarra.
Zerrenda hau ez da izango
sekula Palestinarra!”

4)
Dagoeneko hiru urte dira
hasi zela bonba jasa.
Han ez da ezer geratzen…
ez etxe, ez kale, ez plaza.
Ez genuen usteko har
genezakeenik arnasa
basakeria horren aurrean.
Ez da, ez, ulerterraza.
Nolatan han heriotza den
bizilagunen jolasa.
Nolatan zoratzeraino
ez den lehenestsi solasa.
Nolatan belatzen esku
zokoratu dugun Gaza.
Nolatan gure erantzuna
izan den horren eskasa.

Iturria: https://irunero.eus/zerrendan-oraindik/

Posted in Bertsoak and tagged , | Utzi iruzkina
06 Urr 2026

Txingudiko Lore Jokoetan bertso-jaialdia izango da larunbatean

Kaixo, bertsozale:

Txingudiko Lore-Jokoen baitan egitarau zabala antolatu dute egunotan. Ekitaldien artean, larunbatean, urriaren 10ean, bertso-jaialdia izango da Irunen.

Saioa 18:30ean hasiko da, Istillaga plazan, eta kantuan ariko dira Manu Goiogana Bengoetxea eta Igauri Lopetegi Amostegi irundarrak. Aiora Fagoaga Iza irundarra izango da gai-jartzailea. Bertan, Hendaiako hainbat bertso-eskolako kidek ere egingo dute bertsotan.

Bertara gerturatu eta arratsaldeko bertsoez gozatzeko gonbita luzatzen dizuegu.

Jarraian, Txingudiko Lore-Jokoen egitarau osoa:

Posted in Berriak,Bertso saioa,Bertsoak and tagged ,, | Utzi iruzkina
01 Urr 2026

“Irakurri nahiko genituzkeenak”. Jon Luzuriaga Iurramediren bertsoak, Iruneron.

IRAKURRI NAHIKO GENITUZKEENAK

Egilea: Jon Luzuriaga Iurramendi

Doinua: Nagusi jauna hauxe da lana A

Hemen jaitsi dezakezu

1)
Joan etorri, hasi bukatu;
bizitzak mugimendua du tratu.
Adibidetzat gara bikaina
kimu berriak badatoz baina
adar zaharrari
susmoa hartu nion aspaldi
ez ote zaigun lehortzen ari?

2)
Gure Andoni, maisutan maisu
boligrafoa bukatu al zaizu?
Bertso-jartzaile askorengandik
irten beharko dira oraindik
bertso dezente
ikusi arte harro zein tente
Euskal Herria independente.

3)
Doinu berriaz, musikaz apain
Idatzi beharra dut dator orain.
Gairik ez eta Rafael hara
hau egiteko gai baldin bada
pentsatu, hemen,
gustuko gaia badu, bederen,
zer egiteko kapaz ote den.

4)
Ai, zeinen bertso zoragarriak
trenaren gainbeherari jarriak!
Nahi al diozu heldu Andoni
jarri dizudan erronka honi?:
Ezetz halako
bi sorta sortu argitarako
AHTa irteterako.

5)
Idatzi gabe zenbat denbora?
Aspaldiko, zer egingo zaio ba…
Lasai, Gotzon, ez kezkarik izan
ze bizikletan ibili gisan
sortak idazten
ideiak bertsoz adierazten
inoiz ere ez omen da ahazten!

6)
Euskal Herria, gure habia,
nola den horren herri dantzaria
txoko bakoitzak bere ohitura
Aiorak esan zigun modura.
Poz esperantzan
jarrai bezate etxean, plazan…
bi oinek eta arkatzek dantzan!

7)
Gerra txikiak ze alde duen,
Zuhaitz, bikain deskribatu zenuen!
Gerra osteak dakar ordena,
beraz, ez esan zure sormena
joan zaizunik…
Iritsi bada bake itunik
nola izan den jakin nahi dut nik!

8)
Maskarak jarri maskarak kendu
Maddik zail dena erraz egiten du.
Sentipen, mezu eta aldarri
gordin askotan, umorez sarri…
Sortetan gorde
dituzu txukun eta dotore
inauteriek beste kolore.

9)
Hamar bat bertso ikaragarri
Urkok Aiako Harriari jarri,
muxarrek ere letrarik letra
buruz ikasi dituzte eta!
Baina akabo!
Geroztik ezer gutxi gehiago
eta Jaizkibel jeloskor dago.

10)
Bertso-sorta hau ere heldu da
gogoratu agur epiko hura.
Silveira, Mikel Goñi, Montero,
Hertzainak, Fermin, La Polla gero…
Gaude agian
berragerpenen belaunaldian…
Beraz, zergatik zu ez, Adrian?

11)
Bertso-jartzaile gelditu lasai
nik ez nizun presiorik sartu nahi.
Ekarpen latza eginagatik
beste bertso-sorta bat haatik,
mira zorrotzez
jartzeko baldin bazaude gosez
irakurriko dizugu pozez!

Iturria: https://irunero.eus/irakurri-nahiko-genituzkeenak/

Posted in Bertsoak and tagged ,, | Utzi iruzkina
29 Ira 2026

“Josu Zabala 76 50”. Igauri Lopetegi Amostegiren bertsoak, Bidasoko Hitzan.

JOSU ZABALA 76 50

Egilea: Igauri Lopetegi Amostegi

Doinua: Hamalau heriotzena I

Hemen jaitsi dezakezu

2026ko Hondarbiko Gazte Egunean egindako omenaldian kantatuak

1)
24 urteko
Irungo gazte bat
ta 24 urteko
Irungo beste bat
hizketan ginelako
izan dut uste bat,
nola kontatzen zidan
istori triste bat,
bizia bera galdu
zuen desastre bat:

2)
“76
ta Irailak 8.
50 urte
ez dira, ba, gutxi!
Eskolan ez dizute
inoiz erakutsi,
gaurkoa ez dezazun
hain garbi ikusi,
baina nik ondo dakit
ta kontatzen utzi.

3)
Alardea bukatu,
manifa bat hasi
Pertur egin zuten ta
desagerrarazi.
Guardia Zibilak giro
nahasi hura nahasi.
Amnistia! egiten
genula garraxi,
bizitzak egin zidan
ahotik ihesi.

4)
“Hemen Zabala hil zuten”
paretan ageri,
nahiz ta hiltzen ahal zuten
beste bat, beste bi…
Heriotza jartzeko
aurpegiz aurpegi,
bala hark bizkarrean
eman zidan neri,
apuntatuta hemen
gauden guztieri.

5)
Cabacas hil ta inor ez
kartzelara joan,
bat galdua barrabil
bat desalojoan,
Gasteizen pelotazo
batek jo ahoan…
Ni bezelako asko
oraindik dago han.
Dei nazazue Josu
guztiak gogoan!”

6)
Zabalak memoria
nahi balu zabaldu,
bere ahotik guk geuk
beharko azaldu.
Gu gazte bat, beste bat
guzti bat gara gu,
ta Hondarbiyan Gu horrek
Josu izena du.
Dagonan aurka egin
beharra daukagu!


Hemen dituzue ikusgai Igauri Lopetegik omenaldian kantatutako bertsoak Jon Aperribaik saxofoiaren lagunduta:

Iturria: https://bidasoa.hitza.eus/generoak/iritziak/hitza-irunabar-bertso-sorta-igauri-lopetegi-2/

Posted in Bertsoak and tagged ,, | Utzi iruzkina
10 Ira 2026

Beste ikasturte batez Irunero eta Bidasoako Hitzarekin elkarlanean

Irunabarren, ondo dakizuen bezala, bertso idatziek ere badute euren lekua. Bertsolaritza eta bertso-jarriak inguruko txoko eta plaza ezberdinetara eramateko asmoz, hainbat urtez aritu gara bailarako hedabideekin elkarlanean, eta bide horretan 149 argitalpen egin ditugu, 142 bertso-sorta ezberdinek ikusi dute argia eta 28 bertso-jartzaile izan ditugu bidelagun. Ikasturte honetan ere, elkarlan horiei eutsiko diegu.

Hasi berri dugun 2026/27 ikasturtea hamargarrena izango da Irunerorekin elkarlanean. Urritik ekainera bitarte, hilero, hilabetearen hasieran, Txingudiko bertso-eskoletako kide batek sortutako bertso-jarriak argitaratuko dira aldizkariaren paperezko edizioan. Handik egun gutxira, argitalpen bera formatu digitalean ere izango duzue eskuragarri. Eta, noski, sorta guztiak Irunabarren webgunera ere ekarriko ditugu.

Bestalde, zortzigarren ikasturtea izango dugu Bidasoko Hitzarekin elkarlanean. Txingudiko bertso-eskoletako kideren baten bertso-jarriak hilabeteko azken ostiraletan argitaratuko dira, irailetik ekainera bitarte. Kasu honetan ere, paperezko edizioan zein bertsio digitalean izango dituzue irakurgai, eta Hitzan argitaratutako sorta guztiak Irunabarren webgunean ere bilduko ditugu.

Horrez gain, elkarlan hauen osagarri gisa, idatzitako bertso-sortak musikatuak direnean ere zabalduko ditugu gure webguneko argitalpenetan eta Ivoox-eko kanalean. Beraz, ikasturte honetan ere animatzen bazarete, plazer handiz jasoko ditugu zuek musikatu eta kantatutako bertso-sortak irunabar@gmail.com helbidean.

Eskerrik asko, beste behin ere, elkarlan hau posible egiten duzuen guztioi!

Posted in Berriak,Bertsoak and tagged ,, | Utzi iruzkina
19 Abu 2026

Moskuko Jaiak 2026 [Argazki bilduma]

Kaixo, bertsozale:

Pasa den igandean, abuztuaren 16an, urteroko bertso-saioa izan genuen Moskuko Jaietan.

Saioa polita izan zen.

Argazki bilduma jarraian:

Posted in Berriak,Bertso saioa,Bertsoak,Kronikak and tagged ,,,,, | Utzi iruzkina
18 Abu 2026

Manu Goiogana txapeldun ‘Metaberso, Gaintxurizketako Bertso Txapelketa’-n [2026-08-14]

Gaintxurizketako Antxillastegin jokatu zen ostiralean Metaberso, Gaintxurizketako Bertso Txapelketaren lehen edizioa, giro ederrean eta auzotarren erantzun beroarekin. Bertso saioaren aurretik, 20:30ean, afari autogestionatua egin zuten bertaratutakoek, eta 22:30ean ekin zioten saioari.

Zortzi bertsolari aritu ziren kantuan: Inge Mitxelena oreretarra, Egiar Otegi Torres oiartzuarra, Igauri Lopetegi Amostegi irundarra, Jon Luzuriaga Iurramendi ikaztegietarra, Manu Goiogana Bengoetxea irundarra, Karlos Aizpurua Etxarte oiartzuarra, Jon Altuna Iza «Oxan» hernaniarra eta Mikel Lujanbio «Xapo» hernaniarra. Epaile lanetan Zuhaitz Olazabal Susperregui eta Abel Zabala Elizazu aritu ziren, eta Iñigo Ugarte Azurmendik gidatu zuen saioa.

Bertsolarien jarduna arretaz eta gustura jarraitu zuen bildutako jendeak, eta gauaren amaieran Manu Goiogana Bengoetxea izan zen lehen edizioko txapelduna.

Lehen aldia izanagatik, ekimenak harrera oso ona izan zuen Antxillastegin. Saioa amaituta, auzokideen artean iritzi nagusia argia izan zen: errepikatzeko moduko ekimena da. Lehen edizioak, beraz, hurrengo baterako atea zabalik utzi du.

Bertsolariek amaierako agurretan egin bezala, hemendik ere eskerrak eman nahi dizkiogu Iñigo Ugarte Azurmendiri, ekimena aurrera ateratzeko egindako lan guztiagatik eta bertsolariak hain goxo hartu eta zaintzeagatik.

Posted in Berriak,Bertsoak,Kronikak and tagged ,,,,,,,,,,,,, | Utzi iruzkina
10 Abu 2026

Moskuko Jaiak 2026

Kaixo, bertsozale:

2026 honetan ere Moskuko Jaiak egongo dira eta aurten ere, egitarau zabal eta aberats baten baitan, bertso-saioa antolatu du Irunabar, Irungo bertsoaren bilguneak, Moskuko Jai Batzordeko kideekin elkarlanean.

Bertso-saioa, igandean izango da, abuztuaren 16an. Plazan izango da, arratsaldeko 17:30ean. Oinatz Mitxelena gai-jartzailearen esanetara ariko dira kantuan Irantzu Idoate hazpandarra, Igauri Lopetegi irundarra, Jon Luzuriaga ikaztegietarra eta Ekhiñe Zapiain beratarra.

Posted in Berriak,Bertso saioa,Bertsoak and tagged ,,,,, | Utzi iruzkina
09 Uzt 2026

“Ai, Xenpelarrek baleki”. Xabier Isasi Balanzategiren bertsoak, Bidasoko Hitzan.

AI, XENPELARREK BALEKI

Egilea: Xabier Isasi Balanzategi

Doinua: Iparragirre abila dela

1)
Petriarena, Juan Frantzisko
Xenpelar izenordeko
Errenteriko bertsolaria
gizona, izen oneko
orain bere kalteko
ernegu egoteko
Ai Xenpelarrek baleki
zer gertatu den Errenterian
bere eskolan zehazki!

2)
Emazte batzuk salatu dute
eraso latzak eskolan
irakasleak iraindu eta
tratamendu txarrak eman
neska gazteek jasan
eskolan eta plazan
Ai Xenpelarrek baleki
esango luke orain ez dela
lehengoa baino hobeki

3)
Alkateak du agindu eman
ixteko bertso eskola
arriskutsua dela deritzo
matxismoaren gandola
kiratsa dariola
uhertu erriola
Ai Xenpelarrek baleki
bere hobian egingo luke
amorruz negar emeki

4)
Errespetua galtzen badugu
edozein pertsonarekin
egindakoa ez da zuzentzen
aitorpen hutsalarekin
jendilaje horrekin
edo basabereekin
Ai Xenpelarrek baleki
bera errudun senti zitekeen
gure antzera bereki

5)
Bertso eskola izan dadila
denon eremu seguru
irakaslea ez dadin izan
ez jainko eta ez  guru
biktimak zu eta gu
salatu behar dugu
Ai Xenpelarrek baleki
errudunak non gordeta dauden
aitortu eragabeki

6)
Emakumeek epaitu dute
Errenteriko auzia
hori ez al da beste modu bat
egiteko justizia?
matxismoren jauzia
errotik erauzia
Ai Xenpelarrek baleki
berriro ere berrehun bat urte
bizi behar herabeki

Iturria: https://bidasoa.hitza.eus/generoak/iritziak/hitza-irunabar-bertso-sorta-xabier-isasi-balenziaga/

Posted in Bertsoak and tagged , | Utzi iruzkina

Post Navigation

← Older Entries