Irunabar, Irungo bertsoaren bilgunea

Archive for the tag “Igauri Lopetegi”

17 Ira 2026

Txingudiko bertso-eskolako kideak Eugeniren Txokoan. Hitz eta pitz.

EUGENIren TXOKOA – EuTxo bertsozale, euskaltzale, artista, kirolari eta hainbat ekintzaileren topagune kuttun bilakatu da azkenaldian. Oraingo honetan, Txingudiko bertso-eskolako hiru kide izan dira Eugeniren gonbidatu bereziak: Igauri Lopetegi Amostegi eta Manu Goiogana Bengoetxea irundarrak eta Jon Luzuriaga Iurramendi Ikaztegietarra. Bertan, beren bertso-ibilbideaz, langintzez eta bizitzako hainbat pasartez hitz egiteko aukera izan dute.

Eskerrik asko, bihotz-bihotzez, Eugeni Alzibar Etxeberria, zure etxeko ateak horrela zabaltzeagatik!

Hemen dituzue elkarrizketak ikusgai:

Igauri Lopetegi Amostegi:

Jon Luzuriaga Iurramendi:

Manu Goiogana Bengoetxea:

Posted in Berriak,Besterik and tagged Eugeni Alzibar,Eugeniren Txokoa,EuTxo,Igauri Lopetegi,Jon Luzuriaga,Manu Goiogana | Utzi iruzkina

19 Abu 2026

Moskuko Jaiak 2026 [Argazki bilduma]

Kaixo, bertsozale:

Pasa den igandean, abuztuaren 16an, urteroko bertso-saioa izan genuen Moskuko Jaietan.

Saioa polita izan zen.

Argazki bilduma jarraian:

Posted in Berriak,Bertso saioa,Bertsoak,Kronikak and tagged Ekhiñe Zapiain,Igauri Lopetegi,Jon Luzuriaga,Manu Goiogana,moskuko jaiak,Oinatz Mitxelena | Utzi iruzkina

18 Abu 2026

Manu Goiogana txapeldun ‘Metaberso, Gaintxurizketako Bertso Txapelketa’-n [2026-08-14]

Gaintxurizketako Antxillastegin jokatu zen ostiralean Metaberso, Gaintxurizketako Bertso Txapelketaren lehen edizioa, giro ederrean eta auzotarren erantzun beroarekin. Bertso saioaren aurretik, 20:30ean, afari autogestionatua egin zuten bertaratutakoek, eta 22:30ean ekin zioten saioari.

Zortzi bertsolari aritu ziren kantuan: Inge Mitxelena oreretarra, Egiar Otegi Torres oiartzuarra, Igauri Lopetegi Amostegi irundarra, Jon Luzuriaga Iurramendi ikaztegietarra, Manu Goiogana Bengoetxea irundarra, Karlos Aizpurua Etxarte oiartzuarra, Jon Altuna Iza «Oxan» hernaniarra eta Mikel Lujanbio «Xapo» hernaniarra. Epaile lanetan Zuhaitz Olazabal Susperregui eta Abel Zabala Elizazu aritu ziren, eta Iñigo Ugarte Azurmendik gidatu zuen saioa.

Bertsolarien jarduna arretaz eta gustura jarraitu zuen bildutako jendeak, eta gauaren amaieran Manu Goiogana Bengoetxea izan zen lehen edizioko txapelduna.

Lehen aldia izanagatik, ekimenak harrera oso ona izan zuen Antxillastegin. Saioa amaituta, auzokideen artean iritzi nagusia argia izan zen: errepikatzeko moduko ekimena da. Lehen edizioak, beraz, hurrengo baterako atea zabalik utzi du.

Bertsolariek amaierako agurretan egin bezala, hemendik ere eskerrak eman nahi dizkiogu Iñigo Ugarte Azurmendiri, ekimena aurrera ateratzeko egindako lan guztiagatik eta bertsolariak hain goxo hartu eta zaintzeagatik.

Posted in Berriak,Bertsoak,Kronikak and tagged Abel Zabala,Antxillastegi,Egiar Otegi,Gaintxurizketa,Iñigo Ugarte,Igauri Lopetegi,Inge Mitxelena,Jon Altuna "Oxan",Jon Luzuriaga,Karlos Aizpurua,Manu Goiogana,Metaberso,Mikel Lujanbio "Xapo",Zuhaitz Olazabal | Utzi iruzkina

10 Abu 2026

Moskuko Jaiak 2026

Kaixo, bertsozale:

2026 honetan ere Moskuko Jaiak egongo dira eta aurten ere, egitarau zabal eta aberats baten baitan, bertso-saioa antolatu du Irunabar, Irungo bertsoaren bilguneak, Moskuko Jai Batzordeko kideekin elkarlanean.

Bertso-saioa, igandean izango da, abuztuaren 16an. Plazan izango da, arratsaldeko 17:30ean. Oinatz Mitxelena gai-jartzailearen esanetara ariko dira kantuan Irantzu Idoate hazpandarra, Igauri Lopetegi irundarra, Jon Luzuriaga ikaztegietarra eta Ekhiñe Zapiain beratarra.

Posted in Berriak,Bertso saioa,Bertsoak and tagged Ekhiñe Zapiain,Igauri Lopetegi,Irantzu Idoate.,Jon Luzuriaga,moskuko jaiak,Oinatz Mitxelena | Utzi iruzkina

19 maiatza 2026

Txingudi A taldea Gipuzkoako Herriarteko Taldekako Txapelketako finalaren atarian gelditu da.

Txingudi A taldeak Gipuzkoako Herriarteko Txapelketako final-erdietako saioa izan zuen maiatzaren 16an, arratsaldeko 17:00etan, Tolosako Bonberenean, Zumarraga-Urretxu 1 taldearen aurka.

Saio bizia, parekatua eta maila altukoa entzun ahal izan zuten bertaratu zirenek. Igauri Lopetegi Amostegi, Manu Goiogana Bengoetxea eta Jon Luzuriaga Iurramendi izan ziren Irungo taldea ordezkatu zutenak. Manex Mantxola Urrate, Mikel Iturriotz Etxaniz eta Antton Fernandez Lasa, berriz, Goierriko taldean kantuan aritu zirenak. Epai mahaia Aitor Errazkin Vicente, Jon Mendizabal eta Iñigo Legorburuk osatu zuten. Leire Akizu Bidegain aritu zen gai jartzen.

Azkenean, estu-estu Zumarraga-Urretxu 1 taldeak lortu zuen Gipuzkoako Herriarteko Taldekako Txapelketako finalean kantatzeko txartela. Saioa eta gero, Bonberenean bertan afaltzeko aukera izan zuten, bertako lagunen eskutik. Eskerrik asko egindako harrera eta tratu goxoarengatik!

Honenbestez, finalaren atarian agur esan behar izan dio Irungo Txingudi A taldeak Gipuzkoako Herriarteko Taldekako Txapelketari. Ibilbide luze eta oparoa egin dute, beraz bejondeizuela eta zorionak!

Hemen dituzue ikusgai saioko bi taldeen hasierako agurrak eta hainbat argazki:

https://ataria.eus/tolosa/1778955856673-txingudi-a-taldearen-agurra-bonbereneako-finalaurrekoan

https://ataria.eus/tolosa/1778955985076-zumarraga-urretxuren-agurra-bonbereneako-finalaurrekoan

Mila esker Tolosaldeako Atariari eta Unai Gaztelumendiri argazkiak eskuratzeko aukera emateagatik.

Posted in Berriak,Bertso saioa and tagged Aitor Errazkin,Antton Fernandez,Gipuzkoako Herriarteko Bertsolari Txapelketa 2026,Igauri Lopetegi,Jon Cia Insausti,Jon Luzuriaga,Jon Mendizabal,Leire Akizu,Manex Mantxola,Manu Goiogana,Mikel Iturriotz | Utzi iruzkina

12 maiatza 2026

Gipuzkoako Herriarteko Bertsolari Txapelketako finalerdietako saioa Tolosan [2026-05-16]

Kaixo, bertsozale.

Dagoeneko amaierara iristen ari da Gipuzkoako Herriarteko Bertsolari Txapelketa. Hernaniko final-laurdenetako saioan nagusi irten ondoren, Zumarraga-Urretxu taldearekin ariko da Txingudi A taldea finalerdietan.

Aipatutako saioa maiatzaren 16an, larunbatean, izango da eta 17:00etan emango zaio hasiera. Bertsotan “Txingudi A” taldeko Igauri Lopetegi Amostegi, Manu Goiogana Bengoetxea eta Jon Luzuriaga Iurramendi eta “Zumarraga-Urretxu” taldeko Manex Mantxola Urrate, Mikel Iturriotz Etxaniz eta Antton Fernandez Lasa ariko dira; gai jartzen, Jon Cia Insausti eta Leire Akizu Bidegain; epaile lanetan, berriz, Aitor Errazkin Vicente eta Jon Mendizabal.

Tolosako Bonberenean jokatuko den saiorako sarrera eskuratu beharra dago. Horretarako bertsosarrerak.eus atarian duzue aukera, eta bestela, saioa hasi aurretik, txarteldegian.

Bertan elkar ikusiko dugulakoan, larunbatera arte!

28 Api 2026

2 Comments

Txingudi A taldea aurrera, Gipuzkoako Herriarteko Taldekako Txapelketan.

Txingudi A taldeak Gipuzkoako Herriarteko Txapelketako final-laurdenetako saioa izan zuen apirilaren 24an, arratsaldeko 19:00etan, Hernaniko Milagrosan, bertako Hernani taldearen aurka.

Azkenean, estu-estu, eta talde bien artean oso saio ederra osatu ondotik, Txingudi A taldeak Txapelketan aurrera egitea hobetsi zuten epaileek. Zorionak Igauri, Jon eta Manu! Eta zorte on aurrerantzean!

Saio ostean bertaratu zirenek mokadutxoa egiteko aukera eduki zuten Hernaniko bertso-eskolaren eskutik. Mila esker egindako harreragatik eta hartutako lanarengatik!!

Maiatzaren 16an izango du finalerdietako saioa Txingudi A taldeak, Tolosako Bonberenean, 18:00etan hasita. Bertan, Zumarraga-Urretxu 1 taldekoekin ariko dira kantuan Irunabarreko kideak. Bertan ikusiko dugu elkar!

Posted in Kronikak and tagged Aitor Errazkin,Gipuzkoako Herriarteko Taldekako Txapelketa 2026,Igauri Lopetegi,Jon Luzuriaga,Manu Goiogana

21 Api 2026

Gipuzkoako Herriarteko Bertsolari Txapelketako final-laurdenetako saioa Hernanin [2026-04-24]

Kaixo, bertsozale.

Dagoeneko amaierako fasean murgildua da Gipuzkoako Herriarteko Bertsolari Txapelketa. Donostia-Oarso-Bidasoa bailarako saioetan nagusi irten ondoren, Buruntzaldeako irabazle izan zen Hernani taldearekin ariko da Txingudi A taldea final-laurdenetan.

Aipatutako saioa apirilaren 24an, ostiralean, izango da eta 19:00etan emango zaio hasiera. Bertsotan “Txingudi A” taldeko Igauri Lopetegi Amostegi, Manu Goiogana Bengoetxea eta Jon Luzuriaga Iurramendi eta “Hernani” taldeko Ekain Tolaretxipi Errazti, Unai Agirre Goia eta Eñaut Martikorena Lizaso ariko dira; gai jartzen, Jon Cia Insausti eta Markel Oiarzabal; epaile lanetan, berriz, Aitor Errazkin Vicente eta Ainara Azpiazu Aduriz “Axpi”.

Hernaniko Milagrosa aretoan jokatuko den saiorako sarrera eskuratu beharra dago. Horretarako bertsosarrerak.eus atarian duzue aukera, eta bestela, saioa hasi aurretik txarteldegian.

Bertan elkar ikusiko dugulakoan, ostiralera arte!

Posted in Berriak,Bertso saioa and tagged Ainara Azpiazu "Axpi",Aitor Errazkin,Eñaut Martikorena,Ekain Tolaretxipi,Gipuzkoako Herriarteko Bertsolari Txapelketa 2026,Igauri Lopetegi,Jon Cia Insausti,Jon Luzuriaga,Manu Goiogana,Markel Oiartzabal,Unai Agirre | Utzi iruzkina

30 Mar 2026

2 Comments

M-28, egun betea Donostian eta Añorgan. Txingudi A taldea aurrera, Gipuzkoako Herriarteko Taldekako Txapelketan.

Txingudi A taldeak Gipuzkoako Herriarteko Taldekako Txapelketako saioa izan zuen martxoaren 28an, goizeko 11:00etan, Donostiako Guardetxean, bertako Bilintxi taldearen aurka.

Horren ondotik, Balantxa donostiarren eta Basandrik oiartzuarren arteko norgehiagoka izan zen, 12:30ean hasita, eta Balantxakoek egin zuten aurrera. Saio eder askoak izan ziren goizeko biak ala biak. Bertsolari guzti guztiek kantatu zituzten ale gogoangarriak.

Horiek horrela, Balantxa eta Txingudi A taldeek egin zuten aurrera, eta arratsaldeko 19:30ean Añorgako zineman jokatzekoa zen “Eskualdeko” finalerako sailkatu. Finalean, estu-estu, eta talde bien artean oso saio ederra osatu ondotik, Txingudi A taldeak Txapelketan aurrera egitea hobetsi zuten epaileek. Zorionak Igauri, Jon eta Manu! Eta zorte on aurrerantzean!

Eskerrik asko bihotz-bihotzez Txapelketa honen lehendabiziko fasean zehar talde guziek zuon herrietan egin diguzuen harreragatik, eta bereziki, Bilintxi eta Balantxakoei; inor gutxi izan da orain arte gurekin zuek bezain eskuzabal. Eskerrik asko beste behin ere eta sarri arte; laster izango dugu elkarren berri.

Eta amaitzeko, eskerrik asko zeuri ere, Abel, egun guztian zehar argazkiak biltzen aritzeagatik. Bejondeizula.

Posted in Kronikak and tagged Aitor Errazkin,Gipuzkoako Herriarteko Taldekako Txapelketa 2026,Igauri Lopetegi,Jon Luzuriaga,Manu Goiogana

13 Mar 2026

Giro polita atzo Kabigorrin, Txingudi A eta Xenpelar taldeek eskainitako bertso-saioan

Gipuzkoako Herriarteko Taldekako Txapelketa dela eta, bertso-saioa izan zen atzo Kabigorrin. Txingudi A eta Xenpelar taldeko bertsolariak aritu ziren buruz buru, Jon Cia gai-jartzailearen agindupean. Eskerrik asko gerturatu zineten guztioi, eta esker mila bihotzez, beste behin ere, Kabigorriko bazkide eta langileoi. Maider Ugarte eta Uxue Kriado arduratu ziren saioko irudiak biltzeaz, eta Xabi Maiak ere bidali dizkigu bereak. Eskerrik beroenak, zuoi hiruroi ere.