Irunabar, Irungo bertsoaren bilgunea

Archive for the tag “Irunero”

04 Mar 2025

“Hemendik ez da frantsesik joanen”. Makalo Jauregi Belokiren bertsoak, Iruneron.

HEMENDIK EZ DA FRANTSESIK JOANEN

Egilea: Makalo Jauregi Beloki

Doinua: Gure herriko bikariuak

Hemen jaitsi dezakezu

1)
Teilatupean estalgarritzat
jartzen zen hainbat latorri
jakinduria garatu ohi da
inork ez digu igorri
horra aurrean Lesaka dugu
eta han dago Baigorri
hemendik ez da frantzesik joanen
handik ez baita etorri.

2)
Artzain etxola gainean ere
zotal ta garo-hostorri
ardi lekuak dira Urepel
Aralar edo Aizkorri
ez diezaiogun gehitxo so egin
Bidasoaren ertz horri
hemendik ez da frantzesik joanen
handik ez baita etorri.

3)
Irun gainean hor San Martzial
Urruñan aldiz Sokorri
gauez zakua bizkarrean ta
korri hara, hona korri
zenbat istori entzun diogun
hamaika jende jatorri
hemendik ez da frantzesik joanen
handik ez baita etorri.

4)
Kattalingorri marigorringo
nahiz amona mantangorri
hizkuntza berak elkartzen gaitu
lur bera dugu jatorri
ez gara frantzes ez ta espainol
Kasu eman kontu horri
hemendik ez da frantzesik joanen
handik ez baita etorri.

5)
Horra Xalbador bost bertso xume
zure arrazoi sakon horri
herri zahar honek bere historian
pasa arren hainbat orri
gaur ere berdin esan behar, zuk
errana Egileorri
hemendik ez da frantzesik joanen
handik ez baita etorri.

Jarraian bertso-sorta entzungai Makalo Jauregi Beloki berak musikatuta:

Hemen jaitsi dezakezu

Iturria: https://irunero.eus/hemendik-ez-da-frantzesik-joanen/

Posted in Bertsoak and tagged , | Utzi iruzkina
03 Ots 2025

“Apustua”. Iker Altuna Albisuren bertsoak, Iruneron.

APUSTUA

Egilea: Iker Altuna Albisu

Doinua: Azken urteetan gure herrian

Bertso-sorta hau Arantxa Iturberen Apustua ipuinean oinarritua dago.

1)
Behinola elkar topatu zuten,
izango zen abuztua;
eta segidan azaleratu
elkarrekiko gustua.
Batak pauso bat aurrera eta
eskatu zion eskua;
besteak baietz erantzun zion,
ontzat hartuta jestua.
Bikote bat adostua,
erabat amorostua,
euren arteko harremana zen
eroa bezain estua;
eta, hain zuzen, horren froga da
egin zuten apustua.

2)
“Nik betirako maitatuko haut”
belarrira xuxurlatu,
“Bai zera! Noizbait aspertuko haiz!”
natural batez ukatu.
Apustua nork aipatu zuen
ezin dira gogoratu.
Azkenerako ideiarekin
ausartu ziren ausartu.
Tratua beti da tratu,
eta horrela finkatu:
batak betiko haustearena
bazuen deliberatu,
gero bestea oporretara
behar zuen gonbidatu.

3)
Helmuga ere adostu zuten:
Parisera, alafede!
Ironikoa irudituta,
hura aukeratu trebe.
Harremanaren kudeaketan,
zer indar eta botere!
Ez zuten uste hein horretara
ailegatzerik batere.
Bukaerak, mendez mende,
zeinen gogorrak, halere!
Eta beraiek kontu hutsal bat
bihurtzea zuten xede,
edo agian ez zuten uste
gertatzen ahal zenik ere.

4)
Hasierako emari hura,
ordea, behin zen agortu;
beste bide bat hobea zela,
bati zitzaionez otu.
Apustu hura zela medio,
zenbatetan zen harrotu?
Eta momentu horretan dudak
harengan ziren errotu.
Amai on bat nola lortu?
Hari denak nola lotu?
Bere burua bera deitzera
azkenean derrigortu:
“Parisera noiz joan nahi duzu?
Bidaia hau nire kontu.”

5)
Bere partea kunplitu zuen,
ez zen horretan koldarra,
ahal bezain ongi borobiltzeko
harreman haren hondarra.
Aireportura ailegatu zen,
oso garaiz, tirri-tarra;
“Etorriko al zara zu ere?”
bere zalantza bakarra.
Jada zen ilunabarra.
Jo ote zion adarra?
Hegazkina ja airatu zela
jasoa zuen oharra,
eta garrasi bat bota zuen:
“Zeinen irabazle txarra!”

6)
Hainbeste urtez batera eta
ez zuen espero hala,
ez azaltzerik, eta beheraino
jaitsi zitzaion morala.
Eta halako batean urrun
ikusi zuen itzala;
berandu baina han etorri zen,
irribarrea zabala.
“Jada galdu dugu, ala?
Baina etorri naiz, ala!”
Besarkada bat eman elkarri,
garai zaharretan bezala,
gero gertatu zena bakoitzak
imajinatu dezala.

Iturria: https://irunero.eus/apustua/

Posted in Bertsoak and tagged , | Utzi iruzkina
03 Urt 2025

“Haur mintzoa”. Andoni Zelaia Otañoren bertsoak, Iruneron.

HAUR MINTZOA

Egilea: Andoni Zelaia Otaño

Doinua: Uso xuria errazu A

Hemen jaitsi dezakezu

1)
APAPA, goazen kalera,
APATXO, eseritzera,
PA, muxu goxo goxoa eman
zein maitagarria bera,
TATO, jaistea edo saltoa
PUNBA, erori lurrera.

2)
LO,LO, joatea ohera,
PIPI, txiza komonera,
API, AUPI ,lepoan hartu
orain goazen jolastera,
I,S,S,S, isiltzeko ordua denez
bihar jaiki gosaltzera.

3)
A,A,A,G, usain txarrekoa,
BAPO, aski da nahikoa,
TAS,TAS, ipurdian ematea
PLAST, eman zaplaztekoa,
PUPU, zauria mina ezina
KAS,KAS, hau kaskarrekoa.

4)
TAPA,TAPA, oinez edo,
FU,FU, sua dago bero,
PLISTI,PLASTA, bainatu uretan
horrela da egunero,
DAN,DAN, atea ozenki jo du
barnera sartzeko gero.

5)
TXIRRIST, egin dut irrista,
KRAK, hautsi da telebista,
TRAKATAN,TRAK, zaldiz zaldizka
TRINK,DRINK, irentsi dilista,
ARRE,ARRE, astoa bezala
lau hankan jarri da aita.

6)
TARRAT, jantzia puskatu,
KU,KU, nonbait ezkutatu,
KILI,KILI, kilimak egiten
lo dagoenean esnatu,
ZURRUT, edan edari goxoa
PLOST, zuzen putzuan sartu.

7)
TXITXI, haragi jatea,
MAMA, ura edatea,
ogitarteko goxoa denez
KOKOLO, txokolatea,
MEMELO, horra karamelua
dago azukrez betea.

8)
PUN,PUN, tiro eskopeta,
DILIN, DALAN, kanpai festa,
BURRUN,BURRUN, trumoia motorra
BOTA,BOTA, jo pilota,
TILIN,TOLON, zintzarria jarri
errazteko bilaketa.

9)
UAU, UAU, txakurrak UAU,
KIR,KIR, kilkerra dugu hau,
M,U,U, orroa behi hala zezen
B,E,E, ardi, katuak miau,
KUKURRUKUA, oilarrak jo du
PIO,PIO, txoritu nau.

Iturria: https://irunero.eus/haurren-mintzoa/

Posted in Bertsoak and tagged , | Utzi iruzkina
05 Abe 2024

“Jaiak”. Lorea Abejon Sunsundeguiren bertsoak, Iruneron.

JAIAK

Egilea: Lorea Abejon Sunsundegui

Doinua: Frantses euskaldun bat etorri zait I

Hemen jaitsi dezakezu

1)
Urtarrila da urte hasiera
lehenengo hilabetea,
honekin dator Donostiako
ta Azpeitiko jai betea,
ta hilaren 20an danborrak
auzo guztien atea,
ta eguerdian protagonistak
haurren danborren kolpea.

2)
Gehienetan inauteriekin
dator otsaila maitea,
Tolosakoa izan ohi da
benetan inportantea,
kaldereroekin hasten dira
urtero zartai kolpea,
ta bukatzeko urtero berdin
sardinaren erretzea.

3)
Hilabete honetako prota
hilaren 8a dela,
emakumeon egun handia
jai izan beharko zela,
eta aita denei Zorionak
19an gaudela,
ez da oso zaila asmatzen ere
martxoaz hari garela.

4)
Laugarrengo hilabete hontan
aste santua nagusi,
erlijiosoak prozesiora
ta gu oporretan jausi,
ta beste aldetik 25ean
opila eguna ikusi,
mendira goaz opilarekin
ta jateari ez utzi.

5)
Maiatza hastearekin batera
dugu jai arauduna,
langilearen eguna da ta
mundu osoan jai eguna,
hilaren 15ean urtero
baserri ospakizuna,
bi horiekin itxoin dezagun
hurrengo hilean daukaguna.

6)
Uda badator eta horrekin
datoz jaiak berehala,
ekaina dugu hilabete hau
hain maitea, espeziala,
San Juanak dira Hernanin noski
beti urtero bezala,
ta bukatzeko hain maite dugun
Irungo San Martziala.

7)
Hainbat zezen ta hainbat erraldoi
kalera irten txandaka,
bi horiekin nahikoa da
jakiteko uztaila dala,
Iruñan San Ferminak nagusi
zezenak dabiltz pasaka,
ta urtero berdin erraldoiak
Errenterian dantzaka.

8)
Bai Zeledon bai Marijaia ta
kañonazoa bestea,
uda betean hasiko dugu
kontzertuen ekitea,
haste hauetan badugu nahiko
parrandarako tartea,
hilabete hau beti dihoa aste
nagusiz betea.

9)
Txilibiitoak eta danborrak
jotzen hori harrotasuna,
Hondarribiko alardea da
benetan oso ezaguna,
hilak 8an izaten dela
hori da guk dakiguna,
hau da ze pena, bukatzen zaigu
udarak eman diguna.

10)
Pilar guztiei Zorionak
hilak 12a aipatuz,
hispanitatearen eguna
goardiazibilak omenduz,
gero dator mozorroen festa
Izutzeko mozorratuz,
azken eguna hogeita hamaika
Haloween festa ospatuz.

11)
Hasi dezagun hilabetea
festa egunez aparte,
hortxe dihoa lehenengo eguna
hilerrirako hartuz tarte,
hurrengo egunak lanean pasa
egun guztian jo ta ke,
ta azaroa deskantsa zagun
hurrengo hilabete arte.

12)
Badoa urtea ta honekin
opariak barra-barra,
eguberriak hemen ditugu
eta Olentzero zaharra,
bazkariz eta afariz lepo
ez da batere plan txarra,
urte berri on guztioi, denoi
ondo pasa Urte Zaharra!

Iturria: https://irunero.eus/jaiak/

Posted in Bertsoak and tagged , | Utzi iruzkina
31 Urr 2024

“Zerrendan”. Josu Laguardia Igiñitzen bertsoak, Iruneron.

ZERRENDAN

Egilea: Josu Laguardia Igiñitz

Doinua: Gure herri txiki hau da

Hemen jaitsi dezakezu

1)
Testamentu Zaharrean,
EXODO dago eskura,
Bertan idatzitakoa
gureganaino heldu da.
Sinai mendian, antza,
Yavhe jaitsi zen mundura,
Moisesi eskaini zion
aurrean zuen lur hura.
“Hemen izango duzue,
amestu duzuen uda.
Ez zaitezte bertakoez,
inolaz ere, arrangura.
Zuentzat dagoen guztia:
lurra, jakiak eta ura.
Hau da Jainkoak zuentzat
asmatutako lilura”.

2)
Yavheren horiek entzunda,
zer nolako hotzikara!
Herzl-en ametsa, egun,
Netanyahuren ozkada.
Israel sortzea izan zen
Europaren lehen haitada.
Geroztik indarkeria,
Nakba eta intifada.
Palestinarrak kanpora,
urrutira, pikutara…
Hau da Europa aberatsak
jarri dizuen enboskada.
“Lurrik gabeko herria”,
lapurtutako lautada.
Palestinakoa zer da,
genozidio bat ez bada?

3)
Eskonbroz beterik dago
emankorra zen soroa.
Txikituak, etxe ondoko
erreka eta basoa.
Lorerik ez da ageri.
Ez da itzuli usoa.
Ura kutsatua dago,
gainera ez da nahikoa.
Amak faltan du senarra,
geroztik galdu du loa,
Semeak, irrifarrik ez…
irrifarra du itoa.
Nola berreraiki zerbait?
Nola berpiztu gogoa?
Sinesgaitza izan arren,
bizitza aurrera doa.

4)
“Ama, duela urte erdi bat,
belztu egin zen zerua.
DANBA hark astindu zuen
beste behin gure patua.
Ez da oraindik itzali
orduan piztu zen sua,
garbiketarik latzena
eragiteko sortua.
Ama, besarka nazazu,
nahasia dut barrua.
Atta erail zutenetik,
galdu egin dut burua.
Haren oroimenez, noski,
hartuko dut mendekua.
Hauxe da jarri didaten
ate bakar eta estua”.

5)
“Jamal, hauxe da attonak
aspaldi esaten zuena:
Duela mende bat edo
etorri zela zezena.
Pizti beltza eta adardun,
denetatik bortitzena,
bertakook adarkadez
hauts bihurtuko gintuena.
Etzazula ate hori pasa,
izan baitaiteke azkena.
Zu zara nire mundua,
mundu honetan dudan dena.
Lehenengo attona, gero
osaba eta atta hurrena…
Zu gabe galduko nuke
zutik mantentzen nauena”.

Iturria: https://irunero.eus/zerrendan/

Posted in Bertsoak and tagged , | Utzi iruzkina
09 Urr 2024

“Ikaztegietatik Irunabarrera”. Jon Luzuriaga Iurramediren bertsoak, Iruneron.

IKAZTEGIETATIK IRUNABARRERA

Egilea: Jon Luzuriaga Iurramendi

Doinua: Trikitilariak omen gara

1)
Ez al da galdera ona
zer ote den zoriona?
Zer ote den zoriona
nola den putzu sakona
kontatu nahi nizueke
nola heldu naizen hona.
Nola heldu naizen hona
ez al da galdera ona?

2)
Haize freskoaren nahian
ibili nintzen garaian;
ibili nintzen garaian
aldaketaren bidaian,
Ikaztegietatik urrun
bukatu nuen Hendaian.
Bukatu nuen Hendaian
haize freskoaren nahian!

3)
Nahiz eta sinesten kosta
joan da egun mordoxka,
joan da egun mordoxka
hiru urte ozta-ozta
barnealdea utzirik
harrapatu nuen kosta.
Harrapatu nuen kosta
nahiz eta sinesten kosta!

4)
Izanaz nola damutu,
izenez ez dabil mutu,
izenez ez dabil mutu
beraz egin nion kuku
ia oharkabe nuen
Irunabar ezagutu.
Irunabar ezagutu
izanaz nola damutu!

5)
Beraz niretzat mesede
bai baitaukat aski fede,
bai baitaukat aski fede
baina izenak ze lege?
Irunetik badu zerbait
badu abarretik ere.
Badu abarretik ere
beraz niretzat mesede.

6)
Ez ote nabil honetan
balantzan eta orekan?
Balantzan eta orekan
hitzen esanahi gordetan
gozoa topatu nahian
nola erleak loretan,
nola erleak loretan
ez ote nabil honetan?

7)
Eta zaila da gelditzen
gurpila martxan hasi zen.
Gurpila martxan hasi zen
behin hona sartu bainintzen;
errima, doinu, neurrien
munstroa doa handitzen.
Munstroa doa handitzen
eta zaila da gelditzen.

8)
Beti zerbait baitaukagu
noizbait saio bat mokadu,
noizbait saio bat mokadu,
bertso idatzitik badu,
saio musikatuekin
zorioneko gara gu.
Zorioneko gara gu
beti zerbait baitaukagu.

9)
Zeinen leku egokia
asteroko biltokia.
Asteroko biltokia
emozioz diot ia
euskaraz eta bertsotan
izan dezagun tokia.
Izan dezagun tokia
zeinen leku egokia.

10)
Ez Marinak, ez Butronek,
ez Abadiako hormek,
ez Abadiako hormek,
ez Jaizkibeleko formek…
Txingudialdea horren
eder egiten du honek.
Eder egiten du honek
ez Marinak, ez Butronek!

11)
Nahiz nahikoa ez den sarri
deiadar eta aldarri,
deiadar eta aldarri
gabe lana da oinarri,
hemen esker on moduan
dozena bat bertso jarri,
dozena bat bertso jarri
nahiz nahikoa ez den sarri.

12)
Orain artean bezala
jarraitu nahi nuke hala.
Jarraitu nahi nuke hala
ez ote dugu normala,
maite dugun txoko honek
luzaro elkar gaitzala.
Luzaro elkar gaitzala
orain artean bezala!

Jarraian bertso-sorta entzungai Jone Garmendia Castañosek eta Jonek berak musikatuta:

Hemen jaitsi dezakezu

Iturria: https://irunero.eus/ikaztegietatik-irunabarrera/

Posted in Bertsoak and tagged ,, | Utzi iruzkina
09 Ira 2024

Ikasturte honetan ere bailarako hedabideekin elkarlanean ariko gara

Irunabarren helburuetako bat bertsoa inguruko hainbat txokotara helaraztea ere badenez, badira zenbait ikasturte bailarako hedabideekin elkarlanean ari garela.

Hasi berri dugun 2024/25 hau seigarren ikasturtea dugu Bidasoko Hitzarekin elkarlanean. Irailean hasi eta ekaina bitarte, hilero, eta hilabeteko azken ostiraletan, Txingudiko bertso-eskoletako kide batek bertso-jarriak argitaratuko ditu aipatutako aldizkariko papereko edizioan, eta egun gutxi batzuk igaro ondoren, eskuragarri izango duzue argitalpen hori bera baita bertsio digitalean ere. Nola ez, Irunabarren webgunera ere ekarriko ditugu bertso horiek guztiak.

Irunero aldizkariarekin hasitako elkarlana oraindik lehenagokoa da. Zortzigarren ikasturtez jarraian, Txingudiko bertso-eskoletako kideren baten bertso jarriek argia ikusiko dute hilero. Iruneroren kasuan, hilabete hasieran argitaratuko da elkarlanaren emaitza, eta kasu honetan ere paperezko edizioan zein bertsio digitalean egongo da ikusgai. Ikasturtea urria hasieran hasi eta ekainean amaituko da, eta Iruneroko sorta guztiak ere Irunabarren webgunera ekarriko ditugu.

Horretaz gain, osagarri modura, idatzitako sorta hauek musikatzen direnean ere eskuragarri izango dituzue webguneko argitalpenetan zein Ivoox-eko gure kanalean (harpidetu zaitezte!). Gero eta gehiago zarete elkarlan hauetako bertso-sortaren bat musikatzera animatu zaretenak. Ikasturte honetan ere animatuko bazinate plazer handiz jasoko genituzke zuek musikatu eta kantatutako bertso-sortak irunabar@gmail.com helbidean.

Hona hemen pasa den ikasturtean argitaratu eta musikatutako zenbait bertso-sorta:

  • “Hemen duzu nire sorta”, Rafa Rodrigo Perurenak 2024ko apirilean Bidasoako Hitzan argitaratu eta Rafak berak musikatutako bertso-sorta:
Hemen jaitsi dezakezu
  • “Eskolatik jasotzeko”, Manu Goiogana Bengoetxeak 2024ko marxoan Iruneron argitaratu eta Makalo Jauregi Belokik musikatutako bertso-sorta:
Hemen jaitsi dezakezu
  • “Ibaitik itsasora”, Igauri Lopetegi Amostegik 2023ko azaroan Bidasoako Hitzan argitaratu eta Peio Etxeberriak musikatutako bertso-sorta:
Hemen jaitsi dezakezu

Posted in Berriak,Bertsoak and tagged ,,,,,,, | Utzi iruzkina
06 Eka 2024

“UDAL(ER)TZAINAK”. Abel Zabala Elizazuren bertsoak, Iruneron.

UDAL(ER)TZAINAK

Egilea: Abel Zabala Elizazu
Doinua: Konstituzio gaizto horrekin

1-Martxoko lehen egun hoietan
sinatu zen dekretua
zurrumurruek hala zioten
ez zelako sekretua
udaltzain oro pistolen jabe
ote da ba azertua?
batzuek armen bidez jarri nahi
digute errespetua.

2-Garai batean udaltzain askok
pistola zuten aparte
hori zelako ertzainekiko
diferentziaren parte
Erkoreka ta bere lagunek
berrikuntza hau dakarte
ez dutelako pakerik izan
nahi dutena lortu arte.

3-Nahiz EAE-ko zenbait herritan
pistolarik ez zuten nahi
PLES eta ERNE sindikatuak
salaketa jartzeko gai
auzitegiak eskaerari
nola erantzun zion bai
azkenerako Jaurlaritzak prest
du dekretua nolanahi.

4-Garai bateko kontua dugu
serenoaren figura
haien ondoren aguazil danak
palangana bat burura
txilibitua ta borrarekin
trafikoaren ardura
orain lekutan geratu zaigu
lehengo udaltzaingo hura.

5-Agintekeriz sobran dabilen
hainbat ta hainbat agente
bular aldea puztu antzean
lepo gainekoa tente
gizatasuna alboratuta
prepotentzia dexente
tristea dugu ibili beharra
pertsonaia hauen menpe.

6-Buruan daukat ikusitako
argazkia, imajina
kalesaltzaile batzuen aurka
nolako eraso gordina
txakur ta guzi jazarpenean
hankaperatzeko grina
noren aginduz darabilkite
gisa hortako dotrina.

7-Udaltzain batek zer behar duen
ongi pentsatzen jarrita
zintzotasunez zaindu ditzala
jendea eta karrika
euskararekin armatzen hasi
pistolak bazter utzita
praktika txarrak ez daitezela
behin ta berriz errepika.

8-Manteroekin gogor dabiltza
Bilboko kaleetan zehar
migratzaileak jazartzen ere
zer enpeño ta zer indar
zaurgarriekiko jokabidean
asko dago hobetzear
lehen ere nahiko ertzain badago
gehiago ez dugu behar. (Bis)

Iturria: https://irunero.eus/udalertzainak/

Posted in Bertsoak and tagged , | Utzi iruzkina
03 maiatza 2024

“Quebrantahuesos”. Jon Luzuriaga Iurramendiren bertsoak, Iruneron.

QUEBRANTAHUESOS

Egilea: Jon Luzuriaga Iurramendi
Doinua: Hobe sartzea soldadu

1
Entrenatzea izan
da neure birusa
guztia baitzen buru
gogorkeri hutsa,
bikoteak ere ez
nau gehiegi bultza,
ta bizikletarekin (bis)
nolako dirutza.

Nahiz ez den momentua
dena aitortzeko
zenbat sakrifizio
hona etortzeko!

2
Azkar abiatu naiz
lehen metrotan zehar,
lautada pasa berri,
aldapak hastear
nagoela ditut (ez
dut besterik behar!)
giharrak huts hutsik ta (bis)
birikak lehertzear.

Irten orduko jota
ote nago seko?
Forman ez al nengoen
hona etortzeko?

3
Somporten kaxkarra da
neure dinamika
arnasa hartzeko ez
zait falta lanik ta;
taupadek dirudite
ia dinamita,
ziklista al naiz edo (bis)
txerri bietnamita?

Ez dut gehiegi falta
hemen itotzeko,
hobe nuen dopatu
hona etortzeko!

4
Marie Blanquen zirenak
kopetako tantak,
Portaleten dira ja
amets txar galantak:
Batetik kalanbreak,
bestetik karranpak
porlan zakuen gisan (bis)
ditut neure hankak.

Ze miseria malda
xahar bat igotzeko,
nork esan ote zidan
hona etortzeko?

5
Halakoren batean
iritsi naiz, zinez,
Sabiñanigoraino
neure ahaleginez.
Bizitzari gaurko min,
indar ta ezinez
hamar bat urte kendu (bis)
dizkiot gutxi(e)nez.

Inongo arrazoirik
ez dut harrotzeko,
neuri berriz ez esan
hona etortzeko!

Iturria: https://irunero.eus/quebrantahuesos/

Jarraian bertso-sorta entzungai. Ahotsa Jone Garmendia Castaños-ena da, eta musika Imanol Mendizabal Larrea-rena:

Hemen jaitsi dezakezu
Posted in Bertsoak and tagged ,,, | Utzi iruzkina
02 Api 2024

“Bertso berriak, emantzipatu ezinari jarriak”. Igauri Lopetegi Amostegiren bertsoak, Iruneron.

BERTSO BERRIAK, EMANTZIPATU EZINARI JARRIAK

Egilea: Igauri Lopetegi Amostegi
Doinua: Iturengo arotza

1)
“Parodia eguna”
nolako aukera
guk Hondarribiari
hartzeko tankera.
Joan ginen jantzita
eskale antzera,
han kantatutakoak
nator kontatzera:

2)
“Herri hontan da etxe
adina biztanle.
Baina etxeen jabe
zenbait diruzale,
gazteok utzi nahian
ez etxe, ez kale.
Sartu beharko gera
guztiok eskale!

3)
Guretzako ze etxe,
ze etxebizitza?
Mila euro hilean
merkeenaren giltza…
Gaitzerdi soldatakin
helduko balitza!
Gaur egungo gazteak
holaxe gabiltza.

4)
Ta nahi badugu izan
etxe baten jabe,
ez gaitu abalatzen
deabruak eztare.
Nola egingo dugu,
ba, etxetik alde,
lurraren prezioa
zeruaren pare?

5)
Nora joan pentsatuz
guk gure artean,
gurasoek etxetik
bidali artean,
herri hontan non bizi
gaitezke bakean?
Baten bat ya bizi da
txalupa batean!

6)
Inmobiliariaz
kalea gainezka.
Nahiz zenbaitek agertu
horrekiko kezka,
geldi egonda alferrik
da beti protesta,
hau konponduko duen
alkaterik ez da.

7)
Hondarribiarena
nolako zoria:
Salgai bizimodua,
salgai historia,
turistentzako berde,
gorri ta horia…
Ez al da hori herri
baten parodia?”

8)
Hondarribia kasu
ta Irun erantsi,
Inauteriak joanda
hau ezin ahantzi.
Auzi hau nahi badugu
nolabait ebatzi,
ikusten ez dutenei
maskarak erantzi!

Iturria: https://irunero.eus/bertso-berriak-emantzipatu-ezinari-jarriak/

Posted in Bertsoak and tagged , | Utzi iruzkina

Post Navigation

← Older Entries
Newer Entries →