Irunabar, Irungo bertsoaren bilgunea

Archive for the tag “Zuhaitz Olazabal”

22 Ots 2026
1 Comment

Herriartekoaren lehendabizikoa, egina

Giro polita izan zen atzo Kabigorrin, Gipuzkoako Herriarteko Bertsolari Txapelketako bidasotarren lehendabiziko saioa zela eta. Saio bizia eta gustagarria; motza, aukeran. Hala iritzi zion bertaratutako hainbatek. Txingudi B aldea (Adrian Arruti Bernadet, Abel Zabala Elizazu eta Iñigo Ugarte Azurmendi) eta Basandrik (Oiartzun) (Kattalin Arabolaza Palomo, Egiar Otegi Torres eta Karlos Aizpurua Etxarte) aritu ziren kantuan; Anne Izagirre eta Aitzol Goikoetxea (Añorga) gai jartzen; eta epaile lenetan, aldiz, Zuhaitz Olazabal Susperregi (Txingudi), Karlos Ibarguren (Oiartzun) eta Amaia Izagirre (Añorga).

Epaileek hala erabakita, oiartzuarrentzat izan zen saioa. Zinez mila esker bertaratu zineten guztiei, eta, bereziki, Kabigorriko langile eta bazkide boluntarioei, eginiko harreragatik, eta, batez ere, saioaren ondotik eskainitako afariagatik.

Dena ongi bidean, martxoaren 12an, ostegunarekin ere, izango dugu taldekako txapelketaren hurrengo hitzordua. Bien bitartean, eskerrik asko guztioi beste behin ere eta izan ongi!

Posted in Kronikak and tagged ,,,,,
12 Ots 2026

Gipuzkoako Herriarteko Bertsolari Txapelketako bertso-saioa Kabigorrin [2026-02-19]

Kaixo, bertsozale.

Dagoeneko abian da Gipuzkoako Herriarteko Bertsolari Txapelketa, eta beraz, Kabigorriko bertso-saioa ere hemen da.

Kabigorriko lehen saioari otsailaren 19an, ostegunean, ekingo diogu 19:30ean hasita. Bertsotan, Irungo Txingudi B eta Oiartzungo Basandrik taldeak arituko dira. Kantuan Adrian Arruti Bernadet, Abel Zabala Elizazu, Iñigo Ugarte Azurmendi, Kattalin Arabolaza Palomo, Egiar Otegi Torres eta Karlos Aizpurua Etxarte ariko dira, gai jartzen berriz Anne Izagirre eta Aitzol Goikoetxea.

Gogoan izan Kabigorrik aukera ezin hobea eskaintzen duela behin saioa amaituta afaltzen geratzeko ere.

Bertan elkar ikusiko dugulakoan, ostegunera arte!

Posted in Berriak,Bertso saioa,Bertsoak and tagged ,,,,,,,, | Utzi iruzkina
25 Urt 2026
1 Comment

Badator Gipuzkoako Herriarteko Bertsolari Txapelketa

Badator Gipuzkoako Herriarteko Bertsolari Txapelketa, eta 2017ko hartan bezala, Txingudi A eta Txingudi B taldeak osatu ditugu eskualdean, txapelketan parte hartzeko.

Txapelketak hainbat fase izango ditu, eta eskualdeka antolatzea erabaki duten lehendabiziko honetan, talde bakoitzak bi saiotan kantatu beharko du.

Txingudi A taldearen lehen faseko saioak

  • Martxoak 12 > Txingudi A vs. Xenpelar (Orereta) > 19:30ean Kabigorrin (Irun) > [ Oroitzapenen kutxa [1] [2] [3] ]
  • Martxoak 6 > Bilintxi (Donostia) vs. Txingudi A > 20:00etan (Donostian)

Txingudi B taldearen lehen faseko saioak

  • Otsailak 19 > Txingudi B vs. Basandrik (Oiartzun) > 19:30ean Kabigorrin (Irun) > [ Oroitzapenen kutxa [1] [2] [3] ]
  • Martxoak 6 > Añorga vs. Txingudi B > (ordutegia zehazteke) (Añorgan)

Taldeen osaera:

Txingudi A:
Igauri Lopetegi Amostegi (bertsolaria)
Jon Luzuriaga Iurramendi (bertsolaria)
Manu Goiogana Bengoetxea (bertsolaria)
Jon Cia Insausti (gai-jartzailea)
Aitor Errazkin Vicente (epailea)

Txingudi B:
Abel Zabala Elizazu (bertsolaria)
Adrian Arruti Bernadet (bertsolaria)
Iñigo Ugarte Azurmendi (bertsolaria)
Andde Berasategi Goñi (gai-jartzailea)
Zuhaitz Olazabal Susperregi (epailea)

Informazio gehiago:

https://www.bertsozale.eus/eu/gipuzkoa/herriartekoa-2026/albisteak/57-talderekin-hasiko-da-herriartekoa

Posted in Berriak,Bertso saioa and tagged ,,,,,,,,,,,
10 maiatza 2023

“Gerra txikiak”. Zuhaitz Olazabal Susperreguiren bertsoak, Bidasoko Hitzan.

GERRA TXIKIAK

Egilea: Zuhaitz Olazabal Susperregui

Doinua: Naparruatik ardo karraio A

Hemen jaitsi dezakezu

1)
Zein polita den hiru umeren
begietako dirdira
baina itsustu daitekeena
adi jarrita begira.
Eguneroko bizitzan dauden
gertakarien harira
irabazteko zailenak beti
gerra txikienak dira.

2)
Gurean behintzat ohiko dira
purrusta eta protesta
denon oihuez etxea dugu
dezibelioz gainezka.
Ingurukoek hala diote:
horren arraroa ez da!
Beraz, nahi dugun lasaitasuna
ezinezkoa da, ezta?

3)
Ez, ez eta ez izaten dugu
erantzun ohikoena,
uste al dute modu horretan
lortuko dutela dena?
Baina eurengan nork ernatu du
errebeldiaren sena
jada zainetan baitaramate
kontra egitearena?

4)
Otorduetan ere liskarrak
jakiekin egunero,
dutxa garaian euren aldetik
borondaterik balego!
Negar zotinka hasten zaizkigu
lotara esan ezkero
umeak bizi poza direla
salduko digute gero.

5)
Aratz handia dugunez dena
egin nahi du bere kasa,
Izarrek dio bera ez dela
guk uste bezain eskasa.
Zazpi eta bost urte dituzte,
sakon hartzen dut arnasa…
handiusteko ume hauekin
asmatzen ez da erraza.

6)
Iraitzek bere jolas berria
behingoz albora dezala,
bi urterekin eskalatzea
noiztik dugu ba normala!
Besotik helduz, entzun maitea
jaitsi hortik berehala
baina zergatik begiratzen dit
behiak trenari bezala?

7)
Nahiz sarri dantzan jartzen gaituzten
despistatzen garenean
bizitza eder egiten duten
gauzak dira azkenean.
Gerra txikiez kexatu arren
ongi gaude gehienean
elkar goxatuz eta gozatuz
aukera sortzen denean.

Iturria: https://bidasoa.hitza.eus/generoak/iritziak/hitza-irunabar-bertso-sorta-3/

Jarraian bertso-sorta entzungai Makalok musikatu eta kantatuta:

Hemen jaitsi dezakezu
Posted in Bertsoak and tagged , | Utzi iruzkina
01 Api 2021

Landetxako VI. Bertso Saioa

Aurten ere antolatu dute bertso saioa Landetxako Auzo Elkarteko kideek. Martxoaren 13an izan zen saioa, arratsaldeko 17:00etan. Alaia Martin eta Jon Maia aritu ziren bertsotan, eta Zuhaitz Olazabalek jarri zizkien gaiak.

Saioa zuzenean eskaini zuten internet bidez, eta honako loturan duzue ikusgai: https://youtu.be/J4E-SLgpvZg

Posted in Besterik and tagged ,,, | Utzi iruzkina
12 Urr 2020

2020ko Xilabako Bertsulari Txapelketa aurrera doa

Kaixo, bertsozale:

2020ko Xilabako Bertsulari Txapelketa aurrera doa eta Txingudiko Bertso Eskoletako kideak ere bai. Irailaren 19an egin zuten lehen saioa Hiriburun. Orduan Irati Alcantarilla eta Egoitz Zelaia aritu ziren eta hurrengo faserako sailkatzeko adina puntu eskuratu zituzten. Bi aste beranduago, Ainhoan aritu zen Iker Altuna eta honek ere saio ederra erdietsi zuen. Hurrengo kanporaketan izango da bera ere.

Final herenak asteburu honetan hasiko dira, urriaren 17an, Senperen. Bertan arituko da kantuan Irati Alcantarilla. Iker Altuna eta Egoitz Zelaia saio berean egokitu dira, urriaren 24an, Sohütan.

Bestalde, Epaile taldean dauzkagu Zuhaitz Olazabal eta Abel Zabala. Lehen kanporaketan biak aritu ziren epaile lanetan, bigarren honetan, ordea, Zuhaitz Olazabal arituko da, eta Abel batuko zaio aurrerago berriz.

Animo, denei eta zorte on!

Berri eguneratuak https://www.bertsozale.eus/eu/xiberoa-lapurdi-baxenabarre/xilaba-2020 webgunean.

Posted in Berriak,Bertsoak and tagged ,,,,, | Utzi iruzkina
19 Ira 2020

Xilaba martxan, Txingudiko Bertso Eskoletako kideak bertan direla

Kaixo, bertsozale:
2020ko Xilaba Bertsulari Txapelketa iritsi da eta Txingudiko Bertso Eskoletako kideak bertan izango dira.
Gaur, irailak 19, egingo dute lehen saioa eta bertan arituko dira Irati Alcantarilla urruñarra eta Egoitz Zelaia hendaiarra bertsotan. Bestalde, Zuhaitz Olazabal eta Abel Zabala kideak arituko dira epaile lanetan.Saioa Hiriburun izango da arratsaldeko 17:00etan. 


Berri gehiago https://www.bertsozale.eus/eu/xiberoa-lapurdi-baxenabarre/xilaba-2020/albisteak/abian-da-xilaba-2020-bertsulari-txapelketa webgunean.


Zorte on, laukote!!

Posted in Bertso saioa and tagged ,,,, | Utzi iruzkina
31 maiatza 2020

“Ikastolara itzulera”. Zuhaitz Olazabal Susperreguiren bertsoak, Oarso-Bisoaldeko Hitzan

Ikastolara itzulera

Doinua: ‘Oraindik hango oihartzun hots bat’
Egilea: Zuhaitz Olazabal Susperregui

1.
“Ikastolara joan nahi dut aita
beste askoren moduan
bi hilabete pasa ondoren
etxe barruan guduan”.
Nahiz eta hori dugun semea
aspaldi hontan buruan
Besteen esku gaudela beti
ohartzen gara orduan.

2.
Ikastetxeak irekitzea
erabaki zen Parisen.
Protokolo bat oinarrizkoa
betetzeko ezarri zen.
Eta orain zer egingo dugu?
ez dugu berdin sentitzen
onartzeak ez al gaitu denok
goitik behera zipriztintzen?

3.
Sistema honen joko arauak
barneratzen direnean
jende askoren iritzietan
beldurra dagoenean.
Ikastola bat irekitzea
ona al da azkenean?
Segurtasuna eskubideen
gainetik jartzen denean?

4.
Halakoetan kudeaketak
nola egin bageneki
erabakiak ez bihurtzeko
haserre iturri beti.
Zauriak sortu eta zabalduz
doaz emeki-emeki
ez dugulako adosten jakin
ateak nori ireki.

5.
Mezu uholde amaigabeek
galtzen dute balorea,
hauen atzean norbere nahia
baldin badago gordea.
Ikastolara edo etxean
ez dakit zer den hobea
baina umeek zer behar duten
nork pentsatu du ordea?

6.
Inposaketa berri gehiegi
Ikastola baterako
baliagarri izan litezke
nahiz ez jakin zertarako.
Bete edo ez gaixorik inor
behintzat ez da aterako
argi baitago guzti hau ere
ez dela hainbesterako.

7.
Denbora luzez egon ondoren
denon begiradapean
batzuk etxean besteak berriz
ikastolan bapatean.
Ea lehenbailehen batzen ditugun
umeak ume artean
ikastolako geletan eta
etxe ondoko parkean.

Iturria: https://bidasoa.hitza.eus/generoak/iritziak/zuhaitz-olazabal-susperregi-ikastolara-itzulera/

Posted in Bertsoak and tagged , | Utzi iruzkina
20 Urt 2020

5. urtez jarraian, Landetxako bertso bazkaria [ 2020-03-07]

5. urtez jarraian, Landetxako bertso bazkaria. 2020ko martxoaren 7an, Landetxako auzo elkartean. Informazio guztia kartelean duzue.

Posted in Bertso saioa and tagged , | Utzi iruzkina
20 Urt 2020

Hainbat bertsolari eta Gari Garaialde argazkilaria, Parean Berdintasun Elkartearekin elkarlanean: Emakume Migratzaile (AK) Artean

Batetik edo bestetik Irunera iritsitako 8 emakumeren testigantzak jaso dituzte Parean Berdintasun Elkarteko kideek, eta eskualdeko hainbat bertsolarik, Irunabar, Irungo bertsoaren bilgunearen bidez, testigantza horiek guztiak bertsotan jarri dituzte.

This slideshow requires JavaScript.

Abel Zabala Elizazu, Egoitz Zelaia Perez, Urko Casado Usandizaga, Manu Goiogana Bengoetxea, Adrian Arruti Bernadet, Beñat Elosegi Ortiz de Zarate, Zuhaitz Olazabal Susperregi eta Aitor Errazkin Vicenteren bertsoak bildu ditu Parean elkartearen egitasmoak eta hainbat hedabidek zabaldu du ekimenaren berri:

https://irunero.eus/emakume-migratzaileen-ikuspuntua-aztergai-parean-elkarteak-antolatutako-hurrengo-erakusketan/

https://antxetamedia.eus/news/emakume-migratzaileak-artean-izeneko-erakusketa-au/

Irungo aniztasunari aitortza

 

Posted in Besterik and tagged ,,,,,,,,,, | Utzi iruzkina

Post Navigation

← Older Entries