Irunabar, Irungo bertsoaren bilgunea

Archive for the category “Berriak”

10 Ira 2014
1 Comment

Kabigorriko bertso gauak, bigarren urtez jarraian

Erne, bertsozaleok. Bigarren urtez jarraian, Kabigorriko bertso gauak ekimenari hasiera emango diogu urriaren 2an, lehen ostegunarekin. Izan ere, hileko lehen ostegunean izaten dira Irungo Kabigorri Bidasoaldeko Ateneoan (Peña kalea, 1), Bidasoaldeko zein inguruko eskualdeetako bertsolariekin osatutako bertso saio hauek. Arratsaldeko 19:30ak alderako deituak izaten dira, eta ordu eta erdiko iraupena izaten dute, gutxi asko. Orain arte, lau bertsolarik eta gai jartzaile batek osatu izan dute kartela, eta bertso-jaialdi formatu klasikoari eusteko joera izan den arren, Kabigorriko bertso gauek ez diete aterik ixten esperimentazioari eta bertsotarako formatu berritzaileagoei; horretarako, behar besteko lana eta ardura hartu eta hartara ausartuko diren gai jartzaile eta antolatzaileak behar, ordea (gonbidapen zabal gisa uler bedi, erronkari eutsi nahi liokeen edonorentzat).

Bestalde, aurtengoan, bertso jarriek ere tokia izango dute osteguneroko zitan. Bat-bateko saioen aurretik, bertso idatziak kantatuko dituzte Txingudiko bertso eskolako partaideek eta haien inguruko hainbat lagunek, txandan-txandan, beti ere. Ekimen honen helburu dira, batetik, eskualdean baztertu samarrik dugun bertsogintza molde honi keinu egin eta gozagarri aurkeztea, eta bestetik, Kabigorriko bertso gauak ekimenak irauten duen bederatzi hilabeteko tartearen bertso kronika modukoa osatzea; gure inguruari eta garaiari lotutako bertsozko testigantza bat biltzea, alegia.

2013ko urriko saioa

2013ko urriko saioa

Eskaintza egina dago, beraz. Kabigorrin espero zaituztegu, hilabetero ekaina bitarte, hileko lehen ostegunean. Urriaren 2ko saioan kantatuko duten bertsolarien berri, ahalik eta lasterren emango dizuegu. Bien bitartean, ongi bizi!

 

Posted in Berriak and tagged
10 Ira 2014

2014-2015 bertso ikasturte berria hastear da!

Ikasturtea hastear da Txingudiko bertso eskolan. Anima zaitezte eta azaldu lasai. Ateak zabalik daude.

HAUR ETA GAZTETXOAN TALDEA (16 urte arte):

  • Astelehenero bilduko dira Bidasoako EKT elkartean (Larretxipi kalea, 12), 18:30-etatik 20:00-etara.
  • Lehen eskola eguna: irailak 22
  • Informazio gehiago: 685 72 75 39 (Aitor) edo irunabar@gmail.com

BAT-BATEKO TALDEA I (adin mugarik gabe):

  • Irailaren 23an, asteartearekin, lehen bilera egingo dute zein astegunetan bildu erabakitzeko.
  • Talde hau ere 18:30etatik 20:00ak bitarte bildu ohi da Bidasoako EKT elkartean (Larretxipi kalea, 12).
  • Informazio gehiago: 669 36 35 89 (Egoitz) edo irunabar@gmail.com

BAT-BATEKO TALDEA II (adin mugarik gabe):

  • Ostegunero bildu ohi dira Jaizubiako elkartean, 19:30-etatik 21:30-etara.
  • Lehen eskola eguna: irailak 25
  • Informazio gehiago: 690 06 58 26 (Abel) edo irunabar@gmail.com

 

Txingudik badu bertso eskola
Hauxe da aurtengo plana:
bertsoei lotuz heldu mingaina
aske nahi dutenengana.
Baldin bazara horretarako
gogo pittin bat daukana,
ez bitan pentsa, aurtengoan bai,
hurbil zaitez guregana,
bertso eskola denon etxea
egin nahi dugunongana.

 

Posted in Berriak and tagged | Utzi iruzkina
14 Abu 2014

Moskuko Jaiak 2014 (abuztuaren 14tik, 17ra) bertsoz lepo

Gaur hasi dira Moskuko jaiak, eta egitarau betea eskainiko digute igandera bitarte. Bertsoari dagokionean, bertso-triki-poteoa izango da larunbat honetan, abuztuak 16, arratsaldeko 17:00etatik aurrera, herri bazkariaren ondotik. Arkaitz Oiarzabal “Xamoa” oiartzuarra, Egoitz Zelaia hendaiarra eta Aitor Errazkin irundarra ariko dira bertsotan.

Igandean, aldiz, bertso jaialdia izango da eguerdiko 12:00etatik aurrera. Bertan, Haritz Casabal pasaitarra, Julen Zelaieta beratarra eta Gotzon Aizpiolea irundarra ariko dira bertsotan; laugarren bertsolari bat ere izango da oholtzan, baina oraindik ez da nor izango den zehaztu. Gaiak jartzeaz Egoitz Zelaia hendaiarra arduratuko da.

moskuko jaiak 2014

Posted in Berriak,Bertso saioa and tagged ,,,,,, | Utzi iruzkina
01 Abu 2014

Abuztuaren 9an Txingudiko Bertso Eskolakoak Euskal Jiran kantari

Aurtengoan abuztuaren 8 eta 9rako deialdia egin dute Euskal Jirako antolatzaileek. Abuztuaren 9an, 11:45 aldera, Txingudiko Bertso Eskolako Egoitz Zelaia, Abel Zabala eta Aitor Errazkin ariko dira bertsotan, Euskal Jai pilotalekuan. Euskal Jirako kartela ekarri dugu hona, egitarauari erreparatu nahi dionarentzat.

euskaljira cartel 2014

 

Posted in Berriak,Bertso saioa and tagged ,,, | Utzi iruzkina
01 Abu 2014

Irun eta Oiartzungo bertsolariak Hondarribiko Txotx Egunean

Zortzi urte dira Hondarribiko Olagarro Kultur Elkarteak Sagardo Eguna antolatzen duela (aurtengoa, lehendabizikoz, Txotx Eguna izan bada ere). Uztailaren 26an izan da aurtengoa, larunbatarekin, eta orain artean Santiago kalean antolatu izan duten arren, 2014an Gipuzkoa plaza izan dute kupelen eta aldarrikapenen agertoki. Olagarrokoak Txingudiko bertso eskolarekin jarri ziren harremanetan, Txotx Egunari irekiera bertsotan emateko aukerarik izango ote zen galdezka, eta hantxe izan ziren kantuan Abel Zabala eta Aitor Errazkin irundarrak eta Exteban Martiarena oiartzuarra.

Horratx 2014. urteko Hondarribiko Txotx Eguneko argazki batzuk, Olagarroko lagunek bidaliak.

This slideshow requires JavaScript.

Posted in Berriak and tagged ,,,, | Utzi iruzkina
27 Eka 2014

Uztailaren 1ean 2 bertso saio Irunen

San Martzial eta San Pedro jaietako azken egunean bi bertso saio izango dira Irunen. Bata, Irungo Udalak goizeko 11:30etarako Santiago auzoko Euskal Jai pilotalekura deitua; bestea, Hazia Kultur Elkarteak jai herrikoiak aldarrikatzeko antolatua. Bigarren hau Peña kalean izango da, 13:30etatik aurrera.

Diseinua: Mikel Button

Diseinua: Mikel Button

Posted in Berriak and tagged ,,,, | Utzi iruzkina
10 Eka 2014

Irungo Bertso Eskolen III. Eguna, ekainaren 14an, Irungo Ola sagardotegian

Irunabarrek Irungo Bertso Eskolen Eguna antolatu du, hirugarrenez . Aurtengoan ere Ola sagardotegian jarri dugu hitzordua, arratsaldeko 17:00etatik aurrera. Bertaratu nahi duen bertsozale ororentzat irekia da Irungo Bertso Eskolen Eguna, eta ikasturte osoan zehar Irunen barrena hezkuntza ez formalaren eremuan antolatzen diren bertso eskoletan egindako lanaren hainbat lagin izango da entzungai: bertso jarriak, bertsotan oinarritutako ikuskizunak eta bat-bateko saioak, ordu eta erdi inguru iraun ohi duen saioan zehar tartekatuak guztiak.

Bertan parte hartuko duzuen bertso eskoletako kideei, izan herriko bertso eskoletakoak zein ikastetxetako bertso eskoletakoak, arratsaldeko 16:30etarako Olan egotea eskatzen dizuegu.

Bertan elkar ikusiko dugulakoan, segi ongi! Behealdean, aurreko edizioetan hartutako hainbat argazki.

This slideshow requires JavaScript.

 

Posted in Berriak,Bertso Eskolak Ikastetxeetan,Bertso saioa and tagged | Utzi iruzkina
29 maiatza 2014
1 Comment

Irungo Eskolarteko I. Bertso Paper Lehiaketako bertso guztiak

Hona hemen Irungo Eskolarteko I. Bertso Paper Lehiaketako bertso guztiak. Bejondeizuela, eskerrik asko denoi, eta datorren ikasturtera arte.

Irungo eskolarteko I. Bertso Paper Lehiaketa

 

Posted in Berriak,Bertsoak and tagged
29 maiatza 2014

Ekaineko Kabigorriko bertso gaua, ikasturteko azkena

Ekainaren 5ean izango da ikasturte honetako Kabigorriko azken Bertso Gaua, Kabigorri ostatuan bertan, nola ez, arratsaldeko 19:30etatik aurrera. Azken bertso saioko laukotea honako bertsolariek osatuko dute: Manolo Arozenak, Joxe Juan Oiarzabal “Gurdiya”-k, Juan Mari Lopezek eta Joxe Juan Zubieta “Etxabe”-k. Gai jartzaile lanetan Exteban Martiarena oiartzuarra ariko da.

Gogoan izan saio ostean afaltzen geratzeko aukera paregabea eskaintzen duela Kabigorrik.

This slideshow requires JavaScript.

Tira ba, bertsozale, honenbestez, 2013-2014 ikasturteari dagozkion Kabigorriko Bertso Gauak ekainaren 5ean amaituko dira. Hala ere, urrian bueltan izango gara berriz, ikasturte berri bati bertsoz ekiteko asmoz.

Egia esan, antolatzaileok zinez eskertuta gaude Irungo eta inguruetako bertsozaleok ekimen honi eman diozuen babesagatik. Herritik sortua herriari eskaini nahian abiatu ginen abentura honetan, eta zuen partetik errespetua, esker ona, eta jarrera eredugarria erruz jaso izana plazer handi bat izan da. Bejondeizuela eta eskerrik asko, bihotzez.

Eskerrak ere Kabigorri Ostatuari hilero bere goxotasunera biltzeko aukera emateagatik, eta behin epelera bilduta, eman digun tratu zoragarriarengatik.

Eskerrak ere ekimen honetan modu batean zein bestean parte hartu duzuen bertsolari, gai jartzaile zein laguntzaile guztioi. Eta esker bereziak Patxi eta Juleni, saio guztiak grabatzera etortzeagatik.

Ostegunera arte, beraz, bertsozale; eta amaitzeko, gorago aipatutako kontutxo bat berretsi besterik ez: urrian bueltan izango gaituzue.

Izan ongi!

Posted in Berriak,Bertso saioa and tagged ,,,,, | Utzi iruzkina
22 maiatza 2014

Irungo Eskolarteko I. Bertso Paper Lehiaketa: Zorionak sarituei!

Hilabete baino gehiago joan da Irungo Eskolarteko I. Bertso Paper Lehiaketan parte hartzeko epea amaitu zenetik, eta azkenik, hementxe ditugu sarituen izen-abizenak eta bertsoak. Hala ere, parte hartzaile guztiak eskertu eta zoriondu nahi zaituztegu ezer baino lehen. izan ere, 89 bertso sorta (edo bertso pare, hobeto esanda) jaso ditugu, eta epaileek komeriak ibili dituzte sarituak hautatzeko garaian.

Aurtengoan, Alaia Martinek eta Abel Zabalak bete dituzte epaile lanak, Gipuzkoako Bertsozale Elkartearen izenean lehenak, eta Irunabar, Irungo Bertsoaren Bilgunearenean bigarrenak. Hauxe izan da euren erabakia:

SARITUAK:

3. MAILAN (LH): Xabi Etxebeste 3F – Txingudi Ikastola

4. MAILAN (LH): Ane Zubieta 4A – Txingudi Ikastola

5.MAILAN (LH): Leire Arrieta 5D – Txingudi Ikastola

6.MAILAN (LH): Sara Padilla, Marina Sanchez, Leire Larrarte, Guillermo Gonzalez (El Pilar 6D)

DBH 1: Igauri Lopetegi – Txingudi Ikastola

Aipamen bereziak*:

-Alazne Bermudez (Dunboa 5B)
-Nerea, Natalia, Maialen, Alba, Serah (Belaskoenea 5+6)
-Nerea I, Eneritz M, Battogtokh, Andoni S (Elatzeta 6)
-Aimar Arana (Eguzkitza)
-Mireia, Aiala (Dunboa 5A)

* Aipamen berezia izan duten bertsoen egileek ere saria jasoko dute.

SARI BANAKETAK:

Sariak maiatzaren 27an banatuko dira, Irungo Amaia antzokian, arratsaldeko 18:00etatik aurrera, Gipuzkoako Bertsozale Elkarteak eta Irungo Udalak ikasturte amaieran antolatu ohi duten jaialdiaren amaieran. Jaialdi hau Bertsozale Elkartearen proiektua hezkuntza arautuan txeratzen duten ikastetxeetako ikasle eta gurasoei zuzendua izaten da.

Bestalde, Irunabarretik, parte hartzaile guztiak gonbidatu nahi zaituztegu Irungo Bertso Eskolen III. Egunean parte hartzera, Ekainaren 14an, Meaka auzoko Ola sagardotegian, arratsaldeko 17:00etatik aurrera. Bertan, Irungo bertso eskoletako kide, lagun eta familiekin arratsalde pasa polita egiteko aukera izango duzue, bertsoa protagonista nagusi izan ohi den ospakizunean.

Bai sariak eta bai aipamen bereziak jaso dituzuen parte hartzaileek izango duzue ZUEN BERTSOAK KANTATZEKO AUKERA, nola maiatzaren 27an Amaia Antzokian, hala ekainaren 14an, Ola sagardotegian, Irungo Bertso Eskolen III. Egunean.

Eskerrik asko guztioi, eta datorren ikasturtera arte!

 

 

 

Posted in Berriak,Bertsoak and tagged | Utzi iruzkina

Post Navigation

← Older Entries
Newer Entries →