Irunabar, Irungo bertsoaren bilgunea

Archive for the tag “Aitor Errazkin”

25 Api 2018

Hartu Hitza herri ekimenarekin bat, beste behin ere

Irunabar, Irungo bertsoaren bilguneko eta Txingudiko Bertso Eskolako lau kide aritu ziren apirilaren 21ean Hartu Hitza herri ekimenak antolatutako sinadura bilketan kantari: Xabier Isasi, Andoni Zelaia, Manu Goiogana eta Aitor Errazkin.

Andoni Zelaia
Aitor Errazkin eta Manu Goiogana
Aitor Errazkin eta Manu Goiogana
Txalapartariak
Manu Goiogana

Hona sinadura bilketa egun horretarako Xabier Isasik eta Andoni Zelaiak propio ondutako bertso-sortak:

 

BERTSO BERRIAK, ANDONI ZELAIAK 2018ko APIRILAREN 21erako JARRIAK:

1.- Zure ahala sinadurakin

iritsi da atarira

asmo jatorra gailendu bedi,

agertu zure dizdira

elkar lanaren ahaleginean

fruituak helduko dira

gure bidea egin daiteke

ondorengoei begira

 

2.- Zure eskutan dagon arkatzak

orain badu garrantzia

egun batean ez da lortuko

behar da pazientzia

modu isilean egiten dugu

eskubide irrintzia

agintariek jakin dezaten

herritarron iritzia.

 

3.- Euskal Herria nazio duina

Europa aldamenean

herri bezala nola soseguz

eta gure izenean

zenbat bilkura, zenbat harreman

iritsi da azkenean

gure etxea etxeago da

erabaki nahi denean.

 

4.- Erabakia orain da hemen

eta galdera gardenak

buruak dantzan, ideiak ketan

zer eskatzen du barrenak

bakarka nola kolektiboan

iristen diren lorpenak

ongi etorriak izango dira

bakoitzaren ekarpenak.

 

5.- Beraz zutikan jarrita dago

askatasunan bandera

behatz puntekin ukitzen dugu

pizkundearen sorrera

errespetua dugu aurrena

denok eskubide bera

erantzuna da bakoitzarena

denona, berriz, galdera.

 

6.- Txikitasunak handitzen duen

elkarlana herrigintza

garenak gara, garen bezala

ta ikuspegi anitza

sendian nola, auzoan berdin

ingurukoekin mintza

azaroaren hemezortzian

irundarrena da hitza.

 

 

 

 

 

HARTU HITZA IRUNEN

Egilea: Xabier Isasi
(Doinua: Intsumiso egin naiz.)

1
Kalera atera gara
sinadura bila
Moskun eta Anakan
bildu dugu pila
Gehiago nahi dugu ta
jo deia-ezkila
zurearekin baietz
lortu hiru mila

2
Bertan bizi garela
edonork badaki
Irabaziko dugu
lubakiz lubaki
Galtzak urratuz gero
jarri adabaki
Bertan bizi nahi dugu
bertan erabaki

3
Irunen hartu hitza
bete enparantza
erabaki nahi dugu
gure gobernantza
mesfidantza baztertu
gora esperantza!
Libre izango gara
ez izan zalantza

4
Sinadurak biltzeko
piztu dugu lehia
Herriak bizi nahi du
bere epopeia
norberaren asmoa
nork bere ideia
Herriak egin beza
bozkarako deia

6
Demokrazian beti
herria da lehena
guretzat nahi duguna
erabakimena
Irunen jarria da
egun handiena
azaroak dadukan
hamazortzigarrena

6
Irunek jasan zuen
eraso bortitza
faxistek bota nahian
Gernikan haritza
gero jarri ziguten
muga gaindigaitza
muga bakarra bedi
herriaren hitza

7
Independentzia da
batzuen gurari
beste batzuek, berriz,
lotu Espainiari
bakoitzak kasu egin
bere asmoari
baina ez egin uko
askatasunari

8
Kalera atera gara
sinadura bila
Moskun eta Anakan
bildu dugu pila
Gehiago nahi dugu ta
jo deia-ezkila
zurearekin baietz
lortu hiru mila.

 

 

 

 

 

 

Posted in Besterik and tagged ,,,, | Utzi iruzkina
04 Api 2018

Txingudi-Aramaio bertsotruk(e)a (2018-04-20), katea auzoan

Bertsotruk dinamika dela eta, Txingudi eta Aramaioko taldeen arteko bertso trukea antolatu dugu apirilaren 20rako, ostiralarekin. Katea auzoko pintxo-potean emango diogu hasiera saioari, eta Elatzeta elkartean antolatuta dagoen afalostean segida emango, bertso saio formatuan.

Afariaren kostua 12 euroren bueltan izango da. Afaritara eta ondorengo bertso saiora etorri nahi baduzue, deitu edo mezua bidali 685 72 75 39 telefono zenbakira, apirilaren 16a baino lehen, zenbat lagun izango zareten zehaztuz.

Aramaiotik Xabi Igoa, Manex Agirre eta Paula Amilburu ariko dira bertsotan, eta Txinguditik, aldiz, Iñigo Ugarte, Irati Alcantarilla eta Aitor Errazkin. Gaiak jartzen Adrian Arruti irundarra ariko da.

Bertsotruk dinamikak orain bitarte utzi dituen hainbat irudi:

Txingudi – Gernika (2018)
Txingudi – Gernika (2018)
Txingudi – Algorta
Txingudi – Algorta
Txingudi – Zarautz
Txingudi – Zarautz. Argazkilaria: Manu Goiogana
Zarautz – Txingudi
Zarautz – Txingudi
Zarautz – txingudi
Zarautz – Txingudi
Txingudi – Goierri
Txingudi – Goierri
Goierri – Txingudi
Bertsotruk: Txingudi – Kakiturri (2012-12-12)
Txingudi – Kakiturri
Helduen Bertso Eskolen Eguna (Agurain)
Helduen Bertso Eskolen Eguna (Agurain)
Helduen Bertso Eskolen Eguna (Agurain)
Posted in Berriak,Bertso saioa and tagged ,,,,,,,,, | Utzi iruzkina
06 Mar 2018

2018ko Herri galdeketaren aldeko sinadura bilketan kantari

Irungo Hartu Hitza taldea hiriko hainbat tokitan sinadura bilketa egiten jardun zuen martxoaren 3an, talde horrek berak 2018. urteko azaroan gauzatu nahi duen herri-galdeketaren alde. Irunabarreko Aitor Errazkin eta Egoitz Zelaiak bertsotan hartu zuten parte egun hartako kale-animazioan, beste hainbat eragile eta taldetako partaiderekin batera.

Posted in Berriak and tagged ,, | Utzi iruzkina
06 Mar 2018

Bertso berriak, Kabigorriko bertso gauei jarriak

Txingudiko Bertso Eskolako Bertso tailerreko Xabier Bengoetxea, Iñaki Portugal, Xabier Isasi, Andoni Zelaia eta Aitor Errazkinek elkarlanean ondutako sorta da Irunero aldizkariaren 320 zenbakian argitaratutako bertso-sorta.

 

Egilea: Txingudiko Bertso Eskolako bertso tailerreko kideak

Doinua: Oihan beltzean zoinen eder den

 

 

Zuen aurrera bertso tailerra:

bosten proiektu komuna;

nagusi gabe eratu gara

sormena dugu jarduna.

Ba al dakizu Iruneroren

irakurle euskalduna,

zer demontre den Kabigorriko

hileko lehen osteguna?

 

Hilero bertso saio bat bertan.

Hasieran, sinesgaitza.

Batek lokala jarri, besteak

antolakuntza lan gaitza.

Eta bost urte dira gozatzen

paregabeko eskaintza:

Kabigorri ta Irunabarren

elkarlanaren emaitza.

 

Bat batekoak dira saioak

aurretik, bertso papera

beti bertako bertsolari bat

kantuz direnen artera

gaiak ontzeko eskualdeko

gai jartzaileak topera

kabiak ez du gutxi eskaintzen,

eta debalde, gainera.

 

Bidasoaldeko Ateneoa

beti abegi jario

egarri eta gose handi zein

txikien erremedio

entzule oro adi, isilik

errespetua medio

hitz neurtuari neurri-neurriko

babesa ematen dio.

 

Esperimentu kabi ere bada,

ta ez edonolakoa!

Musika-tresnak lagun badira,

magia bezalakoa!

Bertako doinu zein atzerriko,

bat-batekoan gakoa.

Eskualdeko probalekurik

emankorrenetakoa.

 

“Belarribizi” edo “ahoprest”

ongi etorria zara

leku bat duzu Kabi gorrian

etorri gure plazara

etxean legez baietz sentitu

senide baten gisara

zaletasunak batzen gaituen

famili txikia gara.

 

Ez du axola ofizioak

albaitero edo artzain

hargin, arotza, langile soila,

emagin edo abeltzain

mugazain edo mugalaria

osagile zein erizain

hilaren lehen ostegunero

bertan izango gara zain.

Posted in Berriak,Bertsoak and tagged ,,,,,, | Utzi iruzkina
25 Ots 2018

Aitor Errazkinen “burujabetzari” bertso-sorta, Hartu Hitzaren sinadurak biltzeko agerraldian

http://bidasoa.hitza.eus/2018/02/19/50-aurpegi-herri-galdeketa-hauspotzeko/

Aitor Errazkin Irunabar eta Txingudiko Bertso Eskolako kideak urtarrilean Irunero aldizkarian argitaratutako “Burujabetza” bertso-sorta kantatu zuen Amaia Kultur Zentroko gela txikian, Iker Eizagirre “Xufik” gitarrarekin lagunduta, Hartu Hitza ekimenak egin agerraldian, 2018an Irunen burutu nahi den herri galdeketa dela eta.

Posted in Bertsoak and tagged ,, | Utzi iruzkina
24 Ots 2018

Kabigorriko martxoko bertso gaua [2018-03-01]

Martxoaren 1ean izango da hurrengo bertso gaua. Honako honetan, Maialen Akizu urretxuarra, Aitor Sarriegi beasaindarra, Izarne Zelaia donostiarra eta Aitor Errazkin irundarra ariko dira kantuan, Mikel Garcia kazetari irundarraren esanetara. Saioa 19:30etan hasiko da. Lehenik, Txingudiko bertso eskolako bertso tailerreko kideek bertso jarriak kantatuko dituzte, eta ondoren hasiko da bat-bateko saioa.Orain bost urte Kabigorrik eta Irunabarrek bertso-gauak antolatzeari ekin genionetik, 42. saioa izango da martxoko hau. Eta 45.a izango da ikasturte honi amaiera emango dion ekaineko saioa. Martxoko lehen hamabostaldiko Irunero aldizkariaren zenbakiak emango digu xehe-xehe, erreportaje zabal baten bidez, elkarlan honen inguruko informazioa.

Gogoan izan saioa amaitutakoan bertan afaltzeko aukera paregabea eskaintzen digula Kabigorrik.

Aitor Sarriegi (Beasain)
Aitor Errazkin (Irun)
Maialen Akizu (Urretxu)
Izarne Zelaia (Donostia)

Anima zaitezte!

Posted in Berriak,Bertso saioa and tagged ,,,,,, | Utzi iruzkina
22 Urt 2018

Manu Goiogana eta Aitor Errazkin Irungo Txingudi Ikastolan

Euskararen eguna dela eta, Manu Goiogana eta Aitor Errazkin Txingudi Ikastolan aritu ziren bertsotan, 2017ko abenduaren 1ean, Lehen Hezkuntzako 6. mailako ikasleek jarritako ariketa eta gaiei erantzuten.

Posted in Bertso saioa,Kronikak and tagged ,, | Utzi iruzkina
03 Urt 2018

Aitor Errazkin Vicenteren “Burujabetzari” bertso sorta, Iruneron.

Irunerok Aitor Errazkinen “Burujabetzari” izeneko bertso sorta argitaratu du bere 316. zenbakian.

[Txingudiko bertso eskolako kideen bertsoak Irunero aldizkarian]

 

 Burujabetzari

Posted in Bertsoak and tagged , | Utzi iruzkina
26 Abe 2017

2018ko lehendabiziko bertso gaua urtarrilaren 4ean

Urtarrilaren 4ean izango da urteko lehendabiziko bertso gaua, eta bertan ariko dira Iñaki Zelaia, Julen Zelaieta, Aimar Karrika, Andoni Zelaia eta Abel Zabala. Gaiak jartzen Aitor Errazkin ariko da, eta bat-bateko saioaren aurreko bertso jarriak, aldiz, Adrian Arrutiren eskutik helduko zaizkigu.

Aimar Karrika (Auritz)
Julen Zelaieta (Bera)
Andoni Zelaia (Hendaia)
Abel Zabala (Irun)
Iñaki Zelaia (Hernani)

Gogoan izan saioa eta gero afaltzeko aukera paregabea eskaintzen digula Kabigorrik. Bertan elkar ikusiko dugulakoan, urte berri on denoi.

Posted in Berriak,Bertso saioa and tagged ,,,,, | Utzi iruzkina
06 Abe 2017

Egoitz Zelaia eta Aitor Errazkin, Hondarribian, euskararen nazioarteko egunean

Blaganek eta Hondarribiko Udalak elkarlanean antolatutako egitarauari bertsotan eman zioten hasiera Aitor Errazkin eta Egoitz Zelaiak Itsas Etxea aretoan.

“Egun garrantzitsua gaurkoa, azken hilabeteetan argazkien mosaikoa osatzen ibili gara “itxeki euskarari” leloarekin, eta gaur izan da lan horren aurkezpena, nazioarteko euskararen egunarekin bat eginda. Jende asko hurbildu da Itsas Etxera antolatu dugun ekitaldian parte hartzera. Lehenengo zatian Udaletxeko zinegotziek mezua irakurri dute eta “Euskara munduan, besteen ahotan” dokumentala ikusi dugu. Ondoren Aitor Errazkin eta Egoitz Zelaia bertsolariek bigarren zatiari hasiera eman diote, San Jose Ikastetxeko eta Ama Guadalupekoa ikastetxeko ikasleek prestatutako bideoak ikusi ditugu, Talaiako DBHko ikasleek “beti euskaraz cup song” abestu dute eta Talaia batxilergoko ikasleek musika emanaldia eskaini digute. Momentu horretan mosaikoa osatzeko jaso ditugun argazki guztiak banan bana pantailan ikusteko aukera izan dugu, guztira 700 argazki jaso dira! Lastima denak mosaikoan sartu ezin izana! Bidalitako argazki guztiak kontuan hartuz sarien zozketa bat egin da, eta abestien bidez saioa bukatu dugu. Ondoren, kalejiran, mosaikoa jarrita dagoen lekuraino hurbildu gara eta han abestuz ekitaldia amaitutzat eman da.” (Blagan, 2017)

Posted in Berriak,Kronikak and tagged ,,, | Utzi iruzkina

Post Navigation

← Older Entries
Newer Entries →