Kabigorriko martxoko bertso gaua [2018-03-01]
Martxoaren 1ean izango da hurrengo bertso gaua. Honako honetan, Maialen Akizu urretxuarra, Aitor Sarriegi beasaindarra, Izarne Zelaia donostiarra eta Aitor Errazkin irundarra ariko dira kantuan, Mikel Garcia kazetari irundarraren esanetara. Saioa 19:30etan hasiko da. Lehenik, Txingudiko bertso eskolako bertso tailerreko kideek bertso jarriak kantatuko dituzte, eta ondoren hasiko da bat-bateko saioa.Orain bost urte Kabigorrik eta Irunabarrek bertso-gauak antolatzeari ekin genionetik, 42. saioa izango da martxoko hau. Eta 45.a izango da ikasturte honi amaiera emango dion ekaineko saioa. Martxoko lehen hamabostaldiko Irunero aldizkariaren zenbakiak emango digu xehe-xehe, erreportaje zabal baten bidez, elkarlan honen inguruko informazioa.
Gogoan izan saioa amaitutakoan bertan afaltzeko aukera paregabea eskaintzen digula Kabigorrik.
Anima zaitezte!
Irunabar, Irungo bertsoaren bilgunea 