Irunabar, Irungo bertsoaren bilgunea

Archive for the category “Berriak”

26 maiatza 2015

Irungo Bertso Eskolen IV. Eguna, 2015eko ekainaren 13an.

Laugarren urtez jarraian Irunabarrek, Irungo Bertsoaren Bilguneak, Irungo Bertso Eskolen Eguna antolatuko du, amaitzear den ikasturteari behar bezala agur esan eta datorrenari begira jartzeko.

Ekainaren 13an izango da emanaldia, arratsaldeko 17:00etatik aurrera, Irungo Meaka auzoko Ola sagardotegian. Urtero bezala, frontoian izango da saioa eguraldia lagun izanez gero. Euria ari badu, aldiz, sagardotegi barruan egingo dugu. Beraz, eguraldia ez da aitzaki izango.

Irungo Bertso Eskola guztietako haur, gazte zein helduek hartu ohi dute parte bertsoaren festa honetan, eta aurtengoan, gonbidatu berezi moduan, Auntxa Trikitixa Eskolako eta Musika Eskolako lagunak ere arituko dira, Iñaki Aranagaren gidaritzapean, gure bertsoak soinu eta panderoz laguntzen.

Jaialdia eta gero, Irunabarrek gerturatzen den oro gonbidatuko du sagardotegian merendu legea egitera.

Anima zaitezte, ez zaizue damutuko.

TXINGUDIKO BERTSO ESKOLAKO HAURREN DEIALDIA:

INOIZ BERTSO ESKOLAKO PARTAIDE IZAN ZARETENONTZAT GONBIDAPEN BEREZIA:

Posted in Berriak,Bertsoak and tagged ,,, | Utzi iruzkina
25 maiatza 2015

Bertsokantauri’15 (2015-06-06): Peña eta Egaña, Hondarribiako Higeralde landa etxean

Aurten Ekainaren 6an izango da Bertsokantauri’15.

Urtero bezala, Anjel Mari Peñagarikano eta Andoni Egaña izango dira kantuan, Hondarribiako Higeralde nekazal turismoan goizez, eta Klink elkartean arratsaldez, bazkalosteko saioan.

Goizeko saioa irekia eta debalde izaten da, eta antolatzaileek txosna prestatu ohi dute, nahikoa jaki eta edarirekin. Giro ezin hobea topatuko du bertan bertsozaleak, eta antolatzaileek jakinarazi digutenez, baita ere sorpresaren bat edo beste. Klinkeko bertso-bazkarirako, ordea, tiketak erosi behar dira, eta 25 eroan dituzue dagoeneko salgai, bertsokantauri@hotmail.com helbidera mezua bidalita.

Anima zaitezte!

IMG-20150523-WA0000

Posted in Berriak and tagged ,,, | Utzi iruzkina
25 maiatza 2015

Irungo Eskolarteko II. Bertso Paper Lehiaketako irabazleen zerrenda

Hona 2014-2015 ikasturteko Irungo Eskolarteko II. Bertso Paper Lehiaketako irabazleen zerrenda. Zorionak irabazleei, eta MILA ESKER PARTE HARTZAILE GUZTIEI!

Lehen baino lehen plazaratuko ditugu parte hartzaile guztien bertsoak.

SARIDUNAK:

LEHEN HEZKUNTZA
LH 4:

  • Sari nagusia: Xabier Etxebeste Varela, Txingudi Ikastola.

LH 5:

  • Sari nagusia: Idoia Gonzalez, Ruben de la Fuente, Marla Granero, Iker Amantegi, El Pilar 5.A
  • Aipamena: Iraia, Miriam, Milena, Zuriñe, Dunboa 5. A

LH 6:

  • Sari nagusia: Irati Esandi, Eguzkitza ikastetxea.
  • Aipamenak:
    • Carla Martinez, Aida Justo. Dunboa, 6.A
    • Elena Romero, Irene Barreiro, Laura Cuadrado, Paula Magalhaes, Jon Martinez. Belaskoenea, 5.D­ eta 6.D

DERRIGORREZKO BIGARREN HEZKUNTZA:

  • 1º Saria: Igauri lopetegi, Txingudi Ikastola(DBH2)
  • 2º Saria: Peio Iriarte, Toki­ Alai – Gaztelu Zahar (DBH3­F)
  • 3oSaria: Osane Amiano Galdos, Toki­ Alai – Gaztelu Zahar (DBH1­C)
Posted in Berriak and tagged | Utzi iruzkina
25 maiatza 2015

Ekainaren 4an ikasturteko azken bertso gaua, Kabigorrin.

Ekainaren 4erako dago deituta 2014-2015 ikasturteko azken bertso gaua, 19:30etan Irungo Kabigorrin, Bidasoaldeko Ateneoan. Manu Goiogana irundarra Lesakatik helduko diren Manolo Arozena, Juan Mari Lopez eta Joxe Juan Zubieta “Etxabe”rekin ariko da eta, era berean, guztiek egin beharko dute bertsotan Oihana Aranburu hondarribiarraren aginduetara, berak jarriko baititu gaiak, eta berak saioa aurkeztuko.

This slideshow requires JavaScript.

Bat-bateko saioaren aurretik, Urko Casado astigartarrak bertso berriak kantatuko ditu, saio hortarako propio jarriak, joan den urritik honako bertso gau guztietako ohiturari segika.

Eta saio ostean, bada, agian, ezustekoren bat edo beste, baina erne: ez pasatzen utzi Kabigorrin afaltzen geratzeko aukera paregabea.

Bejondeizuela, eta hurrengo ostegunera arte.

Posted in Berriak,Bertso saioa and tagged ,,,,,, | Utzi iruzkina
18 maiatza 2015

Toki Alai – Gaztelu Zaharren bertsotan

2015eko maiatzaren 13an Toki Alai-Gaztelu Zaharreko DBH2ko ikasleekin eman zuten goiz osoa Egoitz Zelaiak eta Aitor Errazkinek. Bertsolaritzaren eta bertsogintzaren berri eman zieten ikasleei, bai eta bat-bateko bertso saioa eskaini ere. Bertso Eskolako kide eta Toki Alaiko ikasle Peio Iriarte lagun izan zuten Egoitzek eta Aitorrek zenbait lan gauzatzeko garaian.

This slideshow requires JavaScript.

Ikasleek taldean ondutako bertsoak:

Lehen taldearen bertsoa:

Egunero sei ordu
goaz eskolara
goizetik gauera gu
ikasleak gara
zuzendaria dator
ene ze ikara!
Dirudi kartzela bat
aspergarria da.

Bigarren taldearen bertsoa:

Toki Alai eskola
ez dugu itzela
baina askoz txarrago
daukagu kartzela.
Beteta baitaukagu
beti zaintza gela
beste Irungo eskola
guztiak bezela!

Posted in Berriak,Bertsoak,Kronikak and tagged ,,, | Utzi iruzkina
18 maiatza 2015

Gipuzkoako Bertso Eskolen Eguna ospatu zen Irunen (2015-04-28)

Gipuzkoako Bertso Eskolen Eguna ospatu zen Irunen, joan den apirilaren 28an, igandearekin, Gipuzkoako Bertsozale Elkarteak eta Irungo Udalak elkarlanean antolatuta.

Txingudiko Bertso Eskolako ikasleak, zenbait guraso eta Irunabarreko hainbat kide ere bertaratu ginen, goizean zehar Uranzu pilotalekuan antolatzaileek prestatutako jolas eta tailerretan parte hartzera, batetik, eta bestetik, arratsaldean Amaia Kultur Zentroan jokatu zen Gipuzkoako Eskolarteko Bertsolari Txapelketako finalaz gozatzera.

Irunabarreko kiderik adintsuenak jarri zion txapela Iñigo Ibañez azpeitiarrari, gainera: Joxe Juan Oiarzabal “gurdiya”k.

Fernando de la Heraren argazkia, Diario Vascoren bertsio digitaletik erauzia.

Fernando de la Heraren argazkia, Diario Vascoren bertsio digitaletik erauzia.

 

Posted in Berriak,Kronikak and tagged ,,,,,,, | Utzi iruzkina
31 Mar 2015

Apirilaren 9an, Kabigorriko hurrengo bertso gaua

Hiru bertso gau eder eta bero ditugu oraindik gozatzeko ikasturtea bukatu aurretik, apiriletik ekainera bitarteko hirurak, hain zuzen ere. Apirilaren 9an, arratsaldeko 19:30etatik aurrera, Iñigo Ugarte irundarra, Maddi Sarasua itsasuarra, Patxi Castillo beratarra eta Unai Gaztelumendi añorgarra ariko dira bertsotan. Gotzon Aizpiolea irundarrak jarriko dizkie gaiak lau bertsolariei, eta Exteban Martiarena oiartzuarraren eskutik joango dira bat-bateko saioaren aurreko bertso jarriak.

This slideshow requires JavaScript.

Anima zaitezte! Eta kontuan hartu Kabigorrik saioa eta gero ederki asko afaltzeko aukera eskaintzen digula ostegunero.

Posted in Berriak,Bertso saioa and tagged ,,,,,, | Utzi iruzkina
31 Mar 2015

Korrikaren aldeko bertso-afaria ederki asko joan zen

Joan den martxoaren 14ean bertso-afaria antolatu genuen, Korrika 19 zela eta, Irungo AEKrekin eta Bidasoako EKTrekin elkarlanean. Bikain afaldu genuen bertara bildutako 60 lagun inguruk, sukaldari eta zerbitzari boluntarioen lanari esker. Afalondoan, omenaldia eskaini zien Irungo AEKk Brasil gozodendako Koldo eta Xoleri, erretiroa hartu berritan, urtetan egindako lana eskertzeko. Lore sorta, Ainara Maiaren olerkia, Egoitz Zelaiaren bertsoak eta bertaratutako guztion txaloak eta esker ona etxeratu zituen bikoteak. Ondoren, bertso saio ederraz gozatzeko parada izan genuen Iñigo Ugarte, Egoitz Zelaia, Gotzon Aizpiolea eta Abel Zabalaren bertsoei esker.

Hona larunbatean bildutako hainbat irudi:

This slideshow requires JavaScript.

Posted in Berriak,Bertso saioa,Kronikak and tagged ,,,,,,, | Utzi iruzkina
09 Mar 2015

“Hendaia Euskaraz”en estreinaldian bertsotan

Hendaia Euskaraz hilabetearen estreinaldia ospatzen zela eta, Txingudiko bertso eskolako Gotzon Aizpiolea eta Urko Casado Hendaiako Herriko Etxean aritu ziren bertsotan martxoaren 3an. Ekimenaren antolatzaileek aurten aisialdia hautatu dute lan-lerrotzat, eta honako leloa jarri hilabetez luzatuko duten ekintza multzoa biltzeko: “Aisialdiak, euskaraz aise!”, eta gaiaren bueltan aritu ziren Urko eta Gotzon.

 

This slideshow requires JavaScript.

Posted in Berriak and tagged ,, | Utzi iruzkina
22 Ots 2015

Irungo eskolarteko II. bertso paper lehiaketa

Abian da Irungo eskolarteko II. bertso paper lehiaketa, Gipuzkoako Bertsozale Elkarteak eta Irunabarrek elkarlanean antolatua, eta LHko bigarren eta hirugarren zikloetako eta DBH osoko ikasleei zuzendua.

Bertso sortak egiteko gai edo abiapuntu modura lau irudi eskainiko dizkizuegu aukeran. Beraz, lau irudietatik bat hautatu, eta zuen adinari dagokion bertso kopuruko sorta osatu behar duzue.

LHko ikaslea bazara, bi bertso edo lau kopla gehienez, nahi duzuen doinu eta neurrian.

DBHko ikaslea bazara, hiru bertso edo sei kopla gehienez, nahi duzuen doinu eta neurrian.

Bertso sortak banaka edo taldeka egin eta aurkez ditzakezue.

Azkenik, bertsoak formatu digitalean bidali behar dizkiguzue. Horretarako, propio sortu dugun txantiloia ordenagailura jaitsi, bertsoak bertan idatzi eta irungobertsopaperak@gmail.com helbide elektronikora bidali, artxiboaren izenean izen-abizenak, eskola eta maila adierazita.

Parte hartzaile bakoitzak nahi adina sorta bidal ditzake.

Lanak bidaltzeko epea: Apirilak 17

Talde antolatzailekook jarriko gara sarituekin harremanetan epaimahaiak erabakia hartu ostean, eta blog honetan bertan emango dugu lehiaketako emaitzaren berri, bai eta aurkeztutako lan guztiak ikusgai jarriko ere, iaz egin genuen modu berean. Epaimahaia Gipuzkoako Bertsozale Elkarteko kide batek, Irunabarreko beste batek eta bertsogintzari lotutako Bidasoaldeko hirugarren batek osatuko dute.

Zorte on guztioi, animatu eta parte hartu!

Posted in Berriak and tagged | Utzi iruzkina

Post Navigation

← Older Entries
Newer Entries →