Irunabar, Irungo bertsoaren bilgunea

Archive for the category “Berriak”

31 Mar 2015

Apirilaren 9an, Kabigorriko hurrengo bertso gaua

Hiru bertso gau eder eta bero ditugu oraindik gozatzeko ikasturtea bukatu aurretik, apiriletik ekainera bitarteko hirurak, hain zuzen ere. Apirilaren 9an, arratsaldeko 19:30etatik aurrera, Iñigo Ugarte irundarra, Maddi Sarasua itsasuarra, Patxi Castillo beratarra eta Unai Gaztelumendi añorgarra ariko dira bertsotan. Gotzon Aizpiolea irundarrak jarriko dizkie gaiak lau bertsolariei, eta Exteban Martiarena oiartzuarraren eskutik joango dira bat-bateko saioaren aurreko bertso jarriak.

This slideshow requires JavaScript.

Anima zaitezte! Eta kontuan hartu Kabigorrik saioa eta gero ederki asko afaltzeko aukera eskaintzen digula ostegunero.

Posted in Berriak,Bertso saioa and tagged ,,,,,, | Utzi iruzkina
31 Mar 2015

Korrikaren aldeko bertso-afaria ederki asko joan zen

Joan den martxoaren 14ean bertso-afaria antolatu genuen, Korrika 19 zela eta, Irungo AEKrekin eta Bidasoako EKTrekin elkarlanean. Bikain afaldu genuen bertara bildutako 60 lagun inguruk, sukaldari eta zerbitzari boluntarioen lanari esker. Afalondoan, omenaldia eskaini zien Irungo AEKk Brasil gozodendako Koldo eta Xoleri, erretiroa hartu berritan, urtetan egindako lana eskertzeko. Lore sorta, Ainara Maiaren olerkia, Egoitz Zelaiaren bertsoak eta bertaratutako guztion txaloak eta esker ona etxeratu zituen bikoteak. Ondoren, bertso saio ederraz gozatzeko parada izan genuen Iñigo Ugarte, Egoitz Zelaia, Gotzon Aizpiolea eta Abel Zabalaren bertsoei esker.

Hona larunbatean bildutako hainbat irudi:

This slideshow requires JavaScript.

Posted in Berriak,Bertso saioa,Kronikak and tagged ,,,,,,, | Utzi iruzkina
09 Mar 2015

“Hendaia Euskaraz”en estreinaldian bertsotan

Hendaia Euskaraz hilabetearen estreinaldia ospatzen zela eta, Txingudiko bertso eskolako Gotzon Aizpiolea eta Urko Casado Hendaiako Herriko Etxean aritu ziren bertsotan martxoaren 3an. Ekimenaren antolatzaileek aurten aisialdia hautatu dute lan-lerrotzat, eta honako leloa jarri hilabetez luzatuko duten ekintza multzoa biltzeko: “Aisialdiak, euskaraz aise!”, eta gaiaren bueltan aritu ziren Urko eta Gotzon.

 

This slideshow requires JavaScript.

Posted in Berriak and tagged ,, | Utzi iruzkina
22 Ots 2015

Irungo eskolarteko II. bertso paper lehiaketa

Abian da Irungo eskolarteko II. bertso paper lehiaketa, Gipuzkoako Bertsozale Elkarteak eta Irunabarrek elkarlanean antolatua, eta LHko bigarren eta hirugarren zikloetako eta DBH osoko ikasleei zuzendua.

Bertso sortak egiteko gai edo abiapuntu modura lau irudi eskainiko dizkizuegu aukeran. Beraz, lau irudietatik bat hautatu, eta zuen adinari dagokion bertso kopuruko sorta osatu behar duzue.

LHko ikaslea bazara, bi bertso edo lau kopla gehienez, nahi duzuen doinu eta neurrian.

DBHko ikaslea bazara, hiru bertso edo sei kopla gehienez, nahi duzuen doinu eta neurrian.

Bertso sortak banaka edo taldeka egin eta aurkez ditzakezue.

Azkenik, bertsoak formatu digitalean bidali behar dizkiguzue. Horretarako, propio sortu dugun txantiloia ordenagailura jaitsi, bertsoak bertan idatzi eta irungobertsopaperak@gmail.com helbide elektronikora bidali, artxiboaren izenean izen-abizenak, eskola eta maila adierazita.

Parte hartzaile bakoitzak nahi adina sorta bidal ditzake.

Lanak bidaltzeko epea: Apirilak 17

Talde antolatzailekook jarriko gara sarituekin harremanetan epaimahaiak erabakia hartu ostean, eta blog honetan bertan emango dugu lehiaketako emaitzaren berri, bai eta aurkeztutako lan guztiak ikusgai jarriko ere, iaz egin genuen modu berean. Epaimahaia Gipuzkoako Bertsozale Elkarteko kide batek, Irunabarreko beste batek eta bertsogintzari lotutako Bidasoaldeko hirugarren batek osatuko dute.

Zorte on guztioi, animatu eta parte hartu!

Posted in Berriak and tagged | Utzi iruzkina
16 Urt 2015

Txingudi Ikastolako bertso tailerrekoak lanean

Ikasturteko lehen bideoa jaso dugu Txingudi Ikastolako bertso tailerreko haurren eskutik. Euskararen Nazioarteko Egunerako egindako bertsoen artean hautatutako baten gainean egindako lanaren emaitza da.

Posted in Berriak,Bertsoak and tagged ,,, | Utzi iruzkina
29 Abe 2014

Urteko lehendabiziko bertso gaua 2015-01-08

2015eko urtarrilaren 8an izango da Kabigorriko hurrengo ostegunetako bertso-gaua, urteko lehendabizikoa.

Urko Casado astigartarra, Julen Zelaieta beratarra, Jon Martin oiartzuarra eta Nerea Ibarzabal markinarra ariko dira bertsotan, Karlos Aizpurua gai jartzaile oiartzuarraren aginduetara. Bertso idatziak Beñat Elosegi irundarrak jarriak izango dira.

Anima zaitezte, eta gogoan izan, zaio ostean afaltzeko aukera ezin hobea eskaintzen digula Kabigorrik. Ez aukerarik galdu!

This slideshow requires JavaScript.

Posted in Berriak,Bertso saioa and tagged ,,,,,,, | Utzi iruzkina
15 Abe 2014

Gibeletako eguneko zentroan bertsotan

Aurtengoan ere bertsotan aritu dira Manu Goiogana eta Iñigo Ugarte Gibeletako eguneko zentroan. Bertako aiton-amonek prestatu zituzten gaiak eta ariketak bertsolarientzat, Aitziber Martiarena egoitzako langilearen laguntzaz, joan den hiru urtetan ohitura bilakatu den moduan.

2014-12-03 12.39.44

Posted in Berriak,Bertso saioa and tagged ,,, | Utzi iruzkina
17 Aza 2014
1 Comment

Manu Goioganak irabazi du 2014ko San Andres Bertso Paper Lehiaketa

Hamasei urtetik gorakoetan lehen saria Manu Goiogana irundarrak irabazi du (300 euro eta txapela) eta bigarrena, berriz, Aimar Goenaga eibartarrak (250 euro eta plaka). Eta hamasei urtetik beherakoen artean, lehen saria Iturburuko Malen Suarezek jaso du (txapela eta liburua) eta bigarrena Arrateko Andra Mari ikastetxeko Pablo Santosek (plaka eta liburua). Irabazleek …eta kitto! Euskara Elkarteak antolatutako “Bat-batean, munduko musikekin bertsotan” San Andres bertso-jaialdian jasoko dute saria eta bertan bertso irabazleak abestu beharko dituzte. Jaialdia azaroaren 23an (domekan) izango da, Portaleko areto nagusian eta saioan, Oskar Estanga eta Jon Martin bertsolariek samba, sona, tangoa eta bestelako doinuekin inprobisatuko dute. Sarrerak astelehenean ipini ziren salgai Sagar Bitza, Kultu eta Depor tabernetan, 6 eurotan. Saioa arratsaldeko 18.30etan hasiko da, baina aurretik, 18.00etan, San Andres bertso-paper lehiaketako sariak banatuko dira.

Testua eta argazkia: …eta kitto! Euskara Elkartearen web gunetik hartuak (lotura hemen).

DESIRA GOSE
Doinua: Gaur gurutzatu gara

1)
Bistaratu denean
ilargi zurbila
itxi dut kremailera,
lotu zapatila.
Gosea da desira
baten kiribila
Noan, zitara garaiz
iritsi nadila,
Bihotza asetzeko
menuaren bila

2)
Elkar topatu dugu,
berriro, Izaro,
eta irri bat egin
didazu emaro.
Aske zabiltza, alai,
gustura zeharo,
mahai gaineko ura
baino gardenago
eta nire bihotza
egarriak dago

3)
Lehen galdera “Kaixo,
zelan doa dena?”
elkarrizketa sortu
duen ekimena.
Hitzez hitz sortzen joan
gara ondorena;
ogi puska bat zara,
pertsona onena,
nire etxeko labean
egosiko dena!

4)
Elkarrizketak segi
duenez primeran
ohartzerako gaude
etxeko harreran.
Muxu bat ematean
lehenengo aukeran
gure mingainak ia
joan dira hegan
helize forma duten
makarroien eran.

5)
Gose grina begitik
ahoratzen bada
nola jan gura beste
baina zerbait laga?
Berriz ere hasi da
zimurtzen izara!
entsaladan dauden bi
urazen gisara
gu ere hostoz hosto
biluztuko gara!!

6)
Begiak distiratsu,
masailak melenga;
mingainak plazererantz
aurkitu du xenda.
Erantzi dugunean
gure azken prenda
zure_haragi xamurrez
ase nahi nuen ba
ahoan urtu ordez
ahoa urtzen da.

7)
Sagar eta udare
puskak ditugula
marrubi zaporea
nola disimula,
mazedonia goxo
batentzat formula.
Bion belarritara
“mmm” azken xuxurla
esanaz jandakoa
gustatu zaigula!!

8)
Desioa zegoen
maitasunaren zain,
pasiotik jan dugu
irriz hasteko lain.
Lasaitutako gorputz,
mindutako ezpain,
bihotza asetzean
gure goseaz gain
digestioa egin
behar dugu orain.

Manu Goiogana Bengoetxea

Posted in Berriak and tagged ,,
27 Urr 2014

Kabigorriko bertso gauak; azaroak 6, osteguna

Azaroaren 6an izango da hurrengo Kabigorriko bertso gaua, hileko lehen ostegunarekin batera, ohitura den moduan. Honako honetan, Eneritz Zabaleta baionarrak, Alaia Martin oiartzuarrak, Aitzol Barandiaran ataundarrak eta Aitor Errazkin irundarrak kantatuko dute, Urko Casado astigartarraren esanetara. Saioa arratsaldeko 19:30etan hasiko da Egoitz Zelaiaren bertso jarriekin. Segidan, bat-bateko saioa osatuko dute arestian aipatu lau bertsolariek, eta saioa eta gero, dakizuen bezala, afaltzen geratzeko aukera paregabea eskaintzen du Kabigorrik, beraz, aprobetxatu.

This slideshow requires JavaScript.

Posted in Berriak,Bertso saioa and tagged ,,,,,, | Utzi iruzkina
26 Ira 2014

Urriaren 2an Goiogana, Murua, Aizpurua eta Casabal Kabigorrin

Aupa, bertsozale.

Iragarri bezala, bigarren aldiz jarraian, eta urriaren 2an hasita, Kabigorriko bertso gauez gozatzen hasteko aukera izango dugu berriz. Aurreko ikasturtean bezalaxe, hilabeteko lehendabiziko ostegunean izango dira saioak, arratsaldeko 19:30etatik aurrera, Irungo Peña kaleko Kabigorri Bidasoaldeko Ateneoan.

Urriaren 2an Manu Goiogana irundarra, Xumai Murua baionarra, Oier Aizpurua zarauztarra eta Haritz Casabal antxotarra ariko dira bertsotan, Abel Zabala irundarrak ondutako gaiei kantari. Saioaren aurretik, eta bigarren edizio honetako saio guztietarako aurreikusia dagoen gisan, Txingudiko Bertso Eskolako edo haren jirako lagunen batek bertso berriak kantatuko ditu, aldiro egunerokoak iradoki dezakeenari jarriak. Aitor Errazkin irundarra izango da lan horri eusten lehena, “Bertso berriak, 2014-2015 bertso ikasturte berriari jarriak” sortarekin.

This slideshow requires JavaScript.

 Besterik ez, lagunok. Egina dizuegu eskaintza, eta ea iazko saio guztietan denon artean sortu genuen giro goxo, eder eta errespetuzkoari eusten diogun aurtengoan ere. Elkarren arrimuan, ziur baietz. Eta gogoan izan saioa eta gero afaltzen geratzeko Kabigorrik eskaintzen duen aukera aparta; probatu duenak ederki daki.

Jaso besarkada bero bat,

Irunabar

Posted in Berriak,Bertso saioa and tagged ,,,,,, | Utzi iruzkina

Post Navigation

← Older Entries
Newer Entries →