Irunabar, Irungo bertsoaren bilgunea

Archive for the category “Bertsoak”

22 maiatza 2014

Irungo Eskolarteko I. Bertso Paper Lehiaketa: Zorionak sarituei!

Hilabete baino gehiago joan da Irungo Eskolarteko I. Bertso Paper Lehiaketan parte hartzeko epea amaitu zenetik, eta azkenik, hementxe ditugu sarituen izen-abizenak eta bertsoak. Hala ere, parte hartzaile guztiak eskertu eta zoriondu nahi zaituztegu ezer baino lehen. izan ere, 89 bertso sorta (edo bertso pare, hobeto esanda) jaso ditugu, eta epaileek komeriak ibili dituzte sarituak hautatzeko garaian.

Aurtengoan, Alaia Martinek eta Abel Zabalak bete dituzte epaile lanak, Gipuzkoako Bertsozale Elkartearen izenean lehenak, eta Irunabar, Irungo Bertsoaren Bilgunearenean bigarrenak. Hauxe izan da euren erabakia:

SARITUAK:

3. MAILAN (LH): Xabi Etxebeste 3F – Txingudi Ikastola

4. MAILAN (LH): Ane Zubieta 4A – Txingudi Ikastola

5.MAILAN (LH): Leire Arrieta 5D – Txingudi Ikastola

6.MAILAN (LH): Sara Padilla, Marina Sanchez, Leire Larrarte, Guillermo Gonzalez (El Pilar 6D)

DBH 1: Igauri Lopetegi – Txingudi Ikastola

Aipamen bereziak*:

-Alazne Bermudez (Dunboa 5B)
-Nerea, Natalia, Maialen, Alba, Serah (Belaskoenea 5+6)
-Nerea I, Eneritz M, Battogtokh, Andoni S (Elatzeta 6)
-Aimar Arana (Eguzkitza)
-Mireia, Aiala (Dunboa 5A)

* Aipamen berezia izan duten bertsoen egileek ere saria jasoko dute.

SARI BANAKETAK:

Sariak maiatzaren 27an banatuko dira, Irungo Amaia antzokian, arratsaldeko 18:00etatik aurrera, Gipuzkoako Bertsozale Elkarteak eta Irungo Udalak ikasturte amaieran antolatu ohi duten jaialdiaren amaieran. Jaialdi hau Bertsozale Elkartearen proiektua hezkuntza arautuan txeratzen duten ikastetxeetako ikasle eta gurasoei zuzendua izaten da.

Bestalde, Irunabarretik, parte hartzaile guztiak gonbidatu nahi zaituztegu Irungo Bertso Eskolen III. Egunean parte hartzera, Ekainaren 14an, Meaka auzoko Ola sagardotegian, arratsaldeko 17:00etatik aurrera. Bertan, Irungo bertso eskoletako kide, lagun eta familiekin arratsalde pasa polita egiteko aukera izango duzue, bertsoa protagonista nagusi izan ohi den ospakizunean.

Bai sariak eta bai aipamen bereziak jaso dituzuen parte hartzaileek izango duzue ZUEN BERTSOAK KANTATZEKO AUKERA, nola maiatzaren 27an Amaia Antzokian, hala ekainaren 14an, Ola sagardotegian, Irungo Bertso Eskolen III. Egunean.

Eskerrik asko guztioi, eta datorren ikasturtera arte!

 

 

 

Posted in Berriak,Bertsoak and tagged | Utzi iruzkina
21 maiatza 2014

BERTSOKANTAURI’14 maiatzaren 31an, Higeralde Landa Etxean

Maiatzaren 31an izango da aurten BERTSOKANTAURI, laugarren urtez jarraian.

Goizeko saioa, urtero bezala, Higeralde Landa-Etxean izango da (Hondarribia). Bertan, jatekoa, edatekoa, musika (DJ Aristi), txalapartariak (tu ku tun txalaparta taldea) eta bertso saioa Anjel Mari Peñagarikano eta Andoni Egañarekin; gaiak jartzen Koldo Emery ariko da.

Gainera, aurtengoan, zozketa antolatuko dute Higeralden. Txosnan kontsumitutako jaki edo edari bakoitzeko zenbaki bat banatuko dute, eta goizeko bertso saioa eta gero egingo dute zozketa, Higeralden bertan:

1.go saria: gau bat Higeralde Landa Etxean, gosari eta guzti.

2. saria: Etxeko jaki eta edariarekin osatutako saskia.

Higeraldeko goizeko zita libre da bertaratu nahi duen ororentzat, bertso bazkarirako sarrera erosten dutenentzat zein erosten ez dutenentzat. Hala ere, antolakuntzako kideek mesedez eskatzen dizuete autoz igotzen zaretenoi, “kanpotiro”-ko parkina balia dezazuen, eta autoak Higeralderaino ez igotzea. 350 m besterik ez daude “kanpotirotik” Higeraldera.

Higeralden amaitu ostean, bertso bazkaria izango da Hondarribiako Klink Elkartean. Bazkarirako sarrerak 25 € balio du. Erreserbak bertsokantauri@gmail.com helbide elektronikoan egin ditzakezue, zuen izen abizenak, harremanetarako telefono bat eta zenbat lagun izango zareten argi eta garbi adieraziz (antolatzaileak jarriko dira zuekin harremanetan gero, diru-txartelen trukea egin edo hitzartzeko). Bestela, sarrerak 605 74 64 80 (Ander) telefonora deituta ere har daitezke.

Hona iazko irudiekin antolatzaileek prestatutako promozio bideoa.

 

Posted in Berriak,Bertsoak and tagged ,,, | Utzi iruzkina
17 Api 2014

Ikasle “onak eta “txarrak”

Txingudiko bertso eskolako gaztetxoen taldekoek burututako ariketa duzue honakoa. Mahaian jarrita sei lagun eta bakarra gaia: ezkerretik hasita lehendabiziko hirurak ikasle “txarrak” zarete; beste hirurak, aldiz, ikasle “onak”.

Posted in Bertsoak,Besterik and tagged , | Utzi iruzkina
19 Ots 2014
2 Comments

Irungo eskolarteko I. bertso-paper lehiaketa

Idatz itzazu bi bertso nahi duzun neurri eta doinuan post honetara ekarri ditugun lau argazkietatik bat gaitzat hartuta. Doinuaren izena zehaztea ezinbestekoa da. Ondoren, bidal iezazkiguzu bertsoak irunabar@gmail.com helbide elektronikora, argi eta garbi adieraziz zein diren zure izen-abizenak, eskola eta maila.

4 argazkiak_irungo eskolarteko lehenengo bertso paper lehiaketaAnima zaitezte, sari politak baitaude irabazleentzat!

Oinarriak:

Posted in Berriak,Bertso Eskolak Ikastetxeetan,Bertsoak and tagged ,
08 Ots 2014

Txingudi Ikastolako bertso tailerrak

Lan eskerga egiten ari da Haitzol Olaiz irakasle oiartzuarra Txingudi Ikastolako bertso tailerretan. Lehen Hezkuntzan eta Derrigorrezko Bigarren Hezkuntzan talde bana ateratzea lortu du eta bistan da gogor bezain gustura ari direla lanean.

Zorionak denoi!

Posted in Bertso Eskolak Ikastetxeetan,Bertsoak and tagged , | Utzi iruzkina
18 Abe 2013

Aurten ere Gibeletako aiton-amonekin

Aurten ere, Euskararen Nazioarteko Eguna medio, deia jaso genuen Gibeletako eguneko etxera joan eta bertso-saioa egiteko. Iñigo Ugarte eta Manu Goiogana bertaratu ziren bertsotara, iaz bezalaxe. Aurtengoan, baina, bertsolarien azken agurrekin “kantuak” amaitu baziren ere, “kontuek” ez zuten etenik izan. Izan ere, Aitziber Martiarenak eta bertako entzuleen artean ziren lau amonak (Lourdesek, Mª Luisak, Ferminak eta Paulak) egun hartako kronika osatzeari ekin zioten eta bidali egin digute; irakurtzea merezi duen kronika, ezbairik gabe. Gibeletako eguneko etxeko monitorea da Aitziber, eta bertako aiton-amonekin hainbat ekintza dinamizatzen jarduten du. Bejondeizula, Aitziber; besarkada handi bat, mila esker eta urte askoan!

This slideshow requires JavaScript.

GIBELETAKO EGUNEKO ETXETIK JASOTAKO KRONIKA, EUSKARAREN EGUNEKO BERTSO SAIOARI BURUZ:

Euskararen Eguna ospatzeko bertso saioa modu polita iruditu zitzaien aitona-amonei.

Paulak Manu bertsolaria ezagutzen zuen bere bizilaguna eta ia-ia familiakoa baita.

Fermina guztiz txundituta geratu zen: “No se el vasco pero me encantó y me sorprendió como leían el papel con la palabra escrita y enseguida echaban un verso. En la plaza de mi pueblo, en Idiazabal, durante las fiestas solía haber bertsolaris, y me gustaba ir aunque no entendiese.

Mª Luisa berriz, bertsolari familiakoa dugu; bere Aitona Juan Ignacio Riverak, Oiartzungo jaietan abestu ohi zuen. Aitona-amonek gazteleratik euskarara itzultzeko lana egin behar izan zuten bertsolariei hitz solteak eman aurretik. Eta horretan, Mª Luisa oso abil ikusi genuen, adibidez, palvoron/auxkeia edo crisis/mixeria.

Paula aspaldidanik oso bertsozalea dugu; ez du inoiz hutsik egiten Uztailaren 1eko Irungo Baserritar egunean egiten den bertso kantaldira. Gogoan du oraindik, Albisturreko Baxerri bertsolaria kartzelara eraman zutela Francoren garaian euskaraz abesteagatik.

Lourdesek, nahiz eta aitortu ez dela oso bertsozalea, oso gustura egon zela aipatu digu. Gogoratuz, irribarrea ahoan zuela, polboroi eta Rajoy hitzekin burututako bertsoa: aurten polboroi asko jateko aukera handirik ez dugula izango Rajoyri esker murrizten doazen pentsioekin.

Lauei –Lourdes, Mª Luisa, Fermina eta Paulari— bertsolari ezagunen izenak aipatzerakoan, honako hauek etorri zaizkie burura lehenbailehen: Lizaso, Egaña, Txirrita, Peñagarikano eta Lujanbio. Bertsolaritza txapelketaren finala gertu dugun honetan, Paulak argi du Maialen Lujanbio irabaztea gustatuko zitzaiola, emakumeak ere bertso munduan paper polita egin dezaketela erakusteko.

Hurrengo urtean, Euskararen Eguna ospatzeko ez dute zalantzarik izan lau emakumeek: “Etor daitezela berriz ere, guri arratsalde entretenigarri bat igarotzera”.

Gibeletako eguneko etxeko Lourdesek, Mª Luisak, Ferminak, Paulak eta Aitziber monitoreak ondutako testua.

Posted in Berriak,Bertsoak,Kronikak and tagged ,,,, | Utzi iruzkina
11 Abe 2013

Nola eskuratu Gure berts(i)oa?

‘Gure berts(i)oa’-ren promozio bideoaren antzekoa jarri dugu martxan, salmenta puntuak eta diskoa eskuratzeko bideak argitu nahi dituena. Arazorik edo zalantzarik izanez gero, jarri gurekin harremanetan blog honen bidez edo irunabar@gmail.com posta elektronikora mezua bidalita.

Posted in Berriak,Bertsoak and tagged , | Utzi iruzkina
05 Abe 2013
2 Comments

Hemen da ‘Gure berts(i)oa’!

‘Gure berts(i)oa’ irundarrak bertso kantari biltzen dituen CD bikoitza da. Duela urte bete baino gehiago hasi ginen proiektu honetan lanean, eta gaur arratsaldean, abenduak 5, izango omen dugu esku artean. 10 euroan salduko dela, jendearentzat eskuragarri jartzeko ahalegin guztiak egingo ditugula, eta aurkezpen bideoa. Besterik ezin dizuegu aurreratu, oraingoz.

Posted in Berriak,Bertsoak and tagged ,
03 Abe 2013

Euskarari kantari Eguzkitzatik

Gustura ari dira lanean Eguzkitzako bertso-eskolako gaztetxoak, Iker Goñi bertsolari donostiarraren babesean. Ikasturteko lehen emaitza gisa bertso-sorta ezin egokiagoa bidali digute, Euskararen Nazioarteko Eguna ospatzen dugun honetan.

Bertso Eskolan lanean
egin dugu, azkenean,
kopla sorta bat nahi dunarentzat
Euskararen Egunean.

1.- Behar genioke eutsi
erabiltzen baita gutxi,
munduko hizkuntza ederrena
ez dezagun galtzen utzi.

2.- Lehenengo gauza arreta,
bigarrena, arnasketa,
euskaraz bizi nahiko genuke
gure hizkuntza da eta.

3.- Ikastolan urtez urte,
nahiz gurasoek ez uste,
euskararekin eta euskaraz
jolastu nahiko genuke.

4.- Euskara, adinak adin,
osasuntsu egon dadin,
ez dakienak ikas dezala
ta dakienak hitzegin.

5.- Ez dezan gaizki usaindu
denok behar dugu zaindu.
Gure hizketak gorpuzten du ta
gure bertsoek apaindu.

6.- Maite dugunez euskara,
gure inguruan, hara:
urte osoko egun bakoitza
Euskararen Eguna da.

7.- Bakoitzak bere gunean
ta dagokion unean,
hitzegin beza ta ez bakarrik
Euskararen Egunean.

This slideshow requires JavaScript.

Posted in Bertso Eskolak Ikastetxeetan,Bertsoak and tagged ,,, | Utzi iruzkina
14 Abu 2013

Moskuko jaietan ere bertsotan

Gaur hasiko dira Moskuko Jaiak. Hemen dituzue jaietako kartela eta egitaraua, ekintzez gainezka. Parte hartzera animatu eta ongi pasa!

MOSKUKO JAIAK 2013 - KARTELA

Bertsoei dagokienean, larunbatean, abuztuak 17, BERTSO-TRIKI-POTEOA izango da eta igandean, hilak 18, eguerdiko hamabietan, BERTSO SAIOA Uxue Alberdi, Fredi Paia, Hodei Barroso eta Manu Goiogana bertsolariekin.

MOSKUKO JAIAK 2013:

ASTEAZKENA 14
19.00 paseo historikoa auzotik MERTXE TRANTXEren eskutik
20.30 jai haiserako pregoia IÑAKIren eskutik
20.50 AMAIA LAINONen poesia KAXA
21.30 kontzertua: THE BIG BAND THEORY

OSTEGUNA 15
16.00 mus txapelketa
17.00 haur jolasak
18.30 haurrentzako txokolatada
21.30 Jam Session-a plazan

OSTIRALA 16
17.00 arropa eta artisau azoka herrikoia
19.00 joko ez olinpikoak: txingak……sari ikusgarriekin
20.30 kontzertua: CAPSULA · MATXURA · MUSHROOM CAFFEINE

LARUNBATA 17
10.00 pala txapelketaren finalerdi eta finala frontoian
13.00 euskal dantzak KEMEN dantza taldearen eskutik
14.00 bazkari herrikoia
17.00 bertsotrikipoteoa auzoko tabernetatik 
19.00 BONBERENEAKO TXARANGA
21.30 kontzertua: ZAKILLERS · LAS CULEBRAS · JOSEBA IRAZOKI

IGANDEA 18
12.00 bertsolariak: UXUE ALBERDI – ODEI BARROSO – FREDI PAIA – MANU GOIOGANA
17.00 sardinada eta brotxeta bejetak
17.30 joko ez olinpikoak: toka, zaku lasterketa…sari ikusgarriekin
20.00 kontzertua; AINARA LEGARDON kabigorrin
22.00 kontzertua: ESTORNUDO NUKLEAR txosnan

Posted in Berriak,Bertsoak and tagged ,,, | Utzi iruzkina

Post Navigation

← Older Entries
Newer Entries →