Irunabar, Irungo bertsoaren bilgunea
Archive for the category “Bertsoak”
Txingudiko Bertso Eskolako haur eta gazteak euskarari kantari
Txingudiko bertso eskolan hiru talde ari dira aurten, eta bideo honetan gazteenen taldeko lehen bertso-egitasmoa erakutsi nahi dizuegu. Aurten 15 lagun inguru ari dira gazteen taldean, eta Euskararen Nazioarteko Eguna zela eta, bertso sorta bat jartzea deliberatu genuen. Haurrak bost taldetan banatu, eta hortik aurrerako lan guztiak haurrek beraiek burutu zituzten.
Bertso sorta osatu bitartean, haur batzuek kale egin dute bertso eskolan, etxeko lanak edo eritasunak medio, eta bitarte horretan ere ikasle berriak batu zaizkio taldeari. Gora behera horiek guztiek apur bat mantsotu dute ikasleen lana, baina inolaz ere ez dira txapeldun guzti hauentzako traba izan eta, azkenerako, lortu dute urteko lehen egitasmoa arrakastaz bukatzea. Diogunaren froga, bideo honetan duzue.
Txingudi Ikastolako bertso tailerrekoak lanean
Ikasturteko lehen bideoa jaso dugu Txingudi Ikastolako bertso tailerreko haurren eskutik. Euskararen Nazioarteko Egunerako egindako bertsoen artean hautatutako baten gainean egindako lanaren emaitza da.
… erdi animali, erdi bertsolari …
Eguzkitza ikastetxeko bertso tailerreko ikasleek Iker Goñiren gidaritzapean grabatutako bertso sorta musikatua, antzeztua eta dantzatua, 2013-2014 ikasturtean egina.
Irungo Eskolarteko I. Bertso Paper Lehiaketako bertso guztiak
Hona hemen Irungo Eskolarteko I. Bertso Paper Lehiaketako bertso guztiak. Bejondeizuela, eskerrik asko denoi, eta datorren ikasturtera arte.
Irungo eskolarteko I. Bertso Paper Lehiaketa
Irungo Eskolarteko I. Bertso Paper Lehiaketa: Zorionak sarituei!
Hilabete baino gehiago joan da Irungo Eskolarteko I. Bertso Paper Lehiaketan parte hartzeko epea amaitu zenetik, eta azkenik, hementxe ditugu sarituen izen-abizenak eta bertsoak. Hala ere, parte hartzaile guztiak eskertu eta zoriondu nahi zaituztegu ezer baino lehen. izan ere, 89 bertso sorta (edo bertso pare, hobeto esanda) jaso ditugu, eta epaileek komeriak ibili dituzte sarituak hautatzeko garaian.
Aurtengoan, Alaia Martinek eta Abel Zabalak bete dituzte epaile lanak, Gipuzkoako Bertsozale Elkartearen izenean lehenak, eta Irunabar, Irungo Bertsoaren Bilgunearenean bigarrenak. Hauxe izan da euren erabakia:
SARITUAK:
3. MAILAN (LH): Xabi Etxebeste 3F – Txingudi Ikastola
4. MAILAN (LH): Ane Zubieta 4A – Txingudi Ikastola
5.MAILAN (LH): Leire Arrieta 5D – Txingudi Ikastola
6.MAILAN (LH): Sara Padilla, Marina Sanchez, Leire Larrarte, Guillermo Gonzalez (El Pilar 6D)
DBH 1: Igauri Lopetegi – Txingudi Ikastola
Aipamen bereziak*:
-Alazne Bermudez (Dunboa 5B)
-Nerea, Natalia, Maialen, Alba, Serah (Belaskoenea 5+6)
-Nerea I, Eneritz M, Battogtokh, Andoni S (Elatzeta 6)
-Aimar Arana (Eguzkitza)
-Mireia, Aiala (Dunboa 5A)
* Aipamen berezia izan duten bertsoen egileek ere saria jasoko dute.
SARI BANAKETAK:
Sariak maiatzaren 27an banatuko dira, Irungo Amaia antzokian, arratsaldeko 18:00etatik aurrera, Gipuzkoako Bertsozale Elkarteak eta Irungo Udalak ikasturte amaieran antolatu ohi duten jaialdiaren amaieran. Jaialdi hau Bertsozale Elkartearen proiektua hezkuntza arautuan txeratzen duten ikastetxeetako ikasle eta gurasoei zuzendua izaten da.
Bestalde, Irunabarretik, parte hartzaile guztiak gonbidatu nahi zaituztegu Irungo Bertso Eskolen III. Egunean parte hartzera, Ekainaren 14an, Meaka auzoko Ola sagardotegian, arratsaldeko 17:00etatik aurrera. Bertan, Irungo bertso eskoletako kide, lagun eta familiekin arratsalde pasa polita egiteko aukera izango duzue, bertsoa protagonista nagusi izan ohi den ospakizunean.
Bai sariak eta bai aipamen bereziak jaso dituzuen parte hartzaileek izango duzue ZUEN BERTSOAK KANTATZEKO AUKERA, nola maiatzaren 27an Amaia Antzokian, hala ekainaren 14an, Ola sagardotegian, Irungo Bertso Eskolen III. Egunean.
Eskerrik asko guztioi, eta datorren ikasturtera arte!
BERTSOKANTAURI’14 maiatzaren 31an, Higeralde Landa Etxean
Maiatzaren 31an izango da aurten BERTSOKANTAURI, laugarren urtez jarraian.
Goizeko saioa, urtero bezala, Higeralde Landa-Etxean izango da (Hondarribia). Bertan, jatekoa, edatekoa, musika (DJ Aristi), txalapartariak (tu ku tun txalaparta taldea) eta bertso saioa Anjel Mari Peñagarikano eta Andoni Egañarekin; gaiak jartzen Koldo Emery ariko da.
Gainera, aurtengoan, zozketa antolatuko dute Higeralden. Txosnan kontsumitutako jaki edo edari bakoitzeko zenbaki bat banatuko dute, eta goizeko bertso saioa eta gero egingo dute zozketa, Higeralden bertan:
1.go saria: gau bat Higeralde Landa Etxean, gosari eta guzti.
2. saria: Etxeko jaki eta edariarekin osatutako saskia.
Higeraldeko goizeko zita libre da bertaratu nahi duen ororentzat, bertso bazkarirako sarrera erosten dutenentzat zein erosten ez dutenentzat. Hala ere, antolakuntzako kideek mesedez eskatzen dizuete autoz igotzen zaretenoi, “kanpotiro”-ko parkina balia dezazuen, eta autoak Higeralderaino ez igotzea. 350 m besterik ez daude “kanpotirotik” Higeraldera.
Higeralden amaitu ostean, bertso bazkaria izango da Hondarribiako Klink Elkartean. Bazkarirako sarrerak 25 € balio du. Erreserbak bertsokantauri@gmail.com helbide elektronikoan egin ditzakezue, zuen izen abizenak, harremanetarako telefono bat eta zenbat lagun izango zareten argi eta garbi adieraziz (antolatzaileak jarriko dira zuekin harremanetan gero, diru-txartelen trukea egin edo hitzartzeko). Bestela, sarrerak 605 74 64 80 (Ander) telefonora deituta ere har daitezke.
Hona iazko irudiekin antolatzaileek prestatutako promozio bideoa.
Ikasle “onak eta “txarrak”
Txingudiko bertso eskolako gaztetxoen taldekoek burututako ariketa duzue honakoa. Mahaian jarrita sei lagun eta bakarra gaia: ezkerretik hasita lehendabiziko hirurak ikasle “txarrak” zarete; beste hirurak, aldiz, ikasle “onak”.
Irungo eskolarteko I. bertso-paper lehiaketa
Idatz itzazu bi bertso nahi duzun neurri eta doinuan post honetara ekarri ditugun lau argazkietatik bat gaitzat hartuta. Doinuaren izena zehaztea ezinbestekoa da. Ondoren, bidal iezazkiguzu bertsoak irunabar@gmail.com helbide elektronikora, argi eta garbi adieraziz zein diren zure izen-abizenak, eskola eta maila.
Anima zaitezte, sari politak baitaude irabazleentzat!
Oinarriak:
Txingudi Ikastolako bertso tailerrak
Lan eskerga egiten ari da Haitzol Olaiz irakasle oiartzuarra Txingudi Ikastolako bertso tailerretan. Lehen Hezkuntzan eta Derrigorrezko Bigarren Hezkuntzan talde bana ateratzea lortu du eta bistan da gogor bezain gustura ari direla lanean.
Zorionak denoi!
Azken erantzunak
Gipuzkoako Herriarte…(e)k Txingudi A taldea aurrera, Gip… bidalketan Urko Etxebeste(e)k Txingudi A taldea aurrera, Gip… bidalketan Gipuzkoako Herriarte…(e)k M-28, egun betea Donostian eta… bidalketan
Irunabar, Irungo bertsoaren bilgunea 