Hona hemen “JOXE MARI LOPETEGIREN BERTSOAK KALERIK KALE” ekimenaren laburpentxoa, 2016ko ekainaren 10ean bildutako irudi eta hotsekin osatutako ikus-entzunezko labur batean, bertso-tailerreko lagunen eskutik.
2016ko ekainaren 4an ospatu genuen Irungo bertso eskolen eguna, bosgarren urtez jarraian, Meaka auzoko Ola sagardotegian. Ehun lagun inguru bildu ginen, eta Txingudiko bertso eskolako talde guztietako partaideek eta Txingudi Ikastolako bertso-tailerreko haurrek hartu zuten parte.
Bertsoez gain, trikiti doinuek ere ederki bete zuten Ola, Auntxa trikiti Eskola eta Musika Eskolako ikasleen eskutik, Iñaki Aranaga irakasleak gidatuta.
Egun hartakoak laburtzen dituen ikus-entzunezko honekin batera, Txingudiko bertso eskolako haur eta gazteen taldeko zenbait ikaslek euren marrazki eta bertsozko kronika bidali digute (mila esker guztioi!):
Doinua: mila kilo zorion
Gure saioa hasteko neukan nik irrika arratsalde txukuna ta saio polita jende guztia joan da saioa ikusita txintxo-txintxo egon dira denak eserita.
June Caro Sagarzazu. 2016-06-06
Doinua: Astoa ikusi nuen
Hura apaindu genun pila bat bertsokin olan izandu zen hoi multzo bat jendekin Merendu bat egon zen janari askokin Olatik itzuli naiz gogo gehiagokin.
Aitor Labandibar Herrero. 2016-06-06
Doinua: Orioko balearenak
Ekainak 4 izan zen bertsoen eguna Olan elkartu ginen gu eta laguna Egun zoragarria ta oso txukuna hori da itzultzeko gogoa duguna!
Hai Trieu Alzaga Truong eta Osane Amiano Galdos. 2016-06-06
Ainize Lazkano Aizpiolea. 2016-06-06
Bete egin zen atzo Kabigorri. Aurreikusi bezala, bertso-tailerreko lagunak bertan izan ziren, eta haiek eman zioten hasiera saioari, Joxe Mari Lopetegiren “Semeak amari” bertso sorta kantatzeko gonbita eginaz bertaratutako jendeari. Ondoren, Oinatz Mitxelenak eta Eneko Sanchez gai jartzaileek hartu zuten saioaren gidaritza, eta umorez eta maisutasunez bertsolari sarda bat jarri zuten lanean. Umoretik joan zen saioa, eta entzuleak eskertu zuen hori. Kabigorriko mahaietan bazen, gainera, nahikoa pintxo goxo eta sagardo, Kabigorriren eta Irunabarren kontura joan zirenak. Eta halaxe igaro genuen arratsa, umore eta lagunarte ezin hobean.
Mila esker bihotz bihotzez Eneko eta Oinatzi, hartutako lan eta pazientzia eskergarengatik; Kabigorriri, gurekin jostatzen segi nahi izateagatik (esker bereziak Naroari, atzoko partez); eskualdetik kanpo gerturatu zineten bertsolari guztioi: Alaia Martin, Julen Zelaieta, Arkaitz Oiarzabal “Xamoa”, Patxi Castillo, Haritz Casabal eta Beñat Gaztelumendi. Eta, nola ez, zuri, entzule; zure babes, txalo, arreta eta irririk gabe, gureak ez luke zentzurik izango.
Jaso besarkada bana, eta urrira arte,
Irunabar, Irungo bertsoaren bilgunea
Apirilaren 16an hartu genituen Txingudi taldekook goierritarrak gurean, Irunabarrek (Irungo bertsoaren bilgunea), Antxeta Irratiak eta EKTk (Bidasoako Kultur Elkartea) elkarlanean antolatutako bertso-bazkarian. EKT elkartean antolatu genituen otordua eta saioa bera, eta Antxeta Irratiak bere 15. urteurrena dela eta programatutako urte osoko egitarauaren barnean txertatu genuen ekimena.
Eguerdiko 13:00etarako hasi zen jendea EKTra biltzen, ordurako elkartea girotzen hasiak baitziren Aritz Erasun eta Aitziber Arruabarrena trikitilariak.
60 bazkaltiarretik gora bildu zen azkenerako, eta 14:00ak jota hasi ginen bazkaltzen, Antxeta Irratiko, Irunabarreko eta EKTko bozeramaile banak ongi etorria egin eta Bertsotruk ekimenaren zein elkarte antolatzaileen arteko elkarlanaren berri eman eta segidan. 16:30ak pasatxo ekin zion lanari Abel Zabala irundarrak, saiorako gaiak prestatu eta egunean bertan saioa gidatzeko ardura hartua zuen Irunabarreko kideak, eta Goierri eta Txingudi taldeen izenean kantuan hastear ziren bertsolariak aurkeztu zizkien entzuleei: Mikel Tapia, Ane Beloki eta Odei Lopez Goierritik, eta Urko Casado, Manu Goiogana eta Aitor Errazkin Txinguditik.
Saio gustagarri askoa egin zuten bertsolariek, eta entzulearen txaloak eta irriak lortu zituzten, ez gutxitan. Gaiei dagokienean, bertsolariek umoretik jo zezaten prestatua zituen Zabalak, eta hala egin zuten bertsolariek, aukera izan zuten guztietan. Bertsolariek ofizio bana burutzeko aukera izan zuten, eta, gainerakoan, hiru, lau eta sei lagunen artean burutu beharreko ariketei egin zieten aurre. Ia ordu eta hiru laurdeneko saioa eta gero, bertsolariak, antolatzaileak eta entzuleak, denak gustura. Lagun zahar eta berriak agurtu, elkartea jaso, erratza pasa, kontuak egin eta argiak itzali genituen, neke eta nahigabe punttuaz, baina datorren urtean berriz ere “Bertsotruk” berpiztuko dugun esperantzarekin.
Irunabarretik esker bereziak eman nahi dizkiegu Bertsotruk egitasmoak iraun duen bitartean laguntza eskaini diguten lagun guzti-guztiei eta saioetara hurbildu diren entzule guztiei, eta bereziki Joxeja Zabalo jarraitzaile sutsu eta eragile nekaezinari eta Julen Zelaieta bertsolari beratar prestuari. Biba zuek!
Martxoaren 10ean eman zitzaion hasiera Hendaia Euskarazi, herriko etxean ospatu ekitaldian. Txingudiko Bertso Eskolako Andoni Zelaiak “Bertso Tailerrean” ondutako bertso sorta kantatu zuen, Aitor Errazkin bertso eskolako kidea eta Hendaiako musikari prestu bat gitarrarekin laguntzaile izan zituela.
HENDAIA EUSKARAZ
2016-III-11
Ekitaldian parte hartuaz
bertsozko lehen urratsa
gertutasuna adieraziz
kenduko dugu arantza.
Hitz jokoekin margotutako
eguna nola arratsa
beste urtetan bezala aurten
martxoak hartzen du martxa.
Beraz, Hendaian euskararentzat
banderaren igoera,
hura maitatu ta erabili
beraren parte baikera.
beste hizkuntzak hor daude baina
gurea bultza aurrera,
euskaraz bizi nahi duenak
izan dezala aukera.
Eguneroko bizitza duina
gure eskutan hartzea,
zer ederrago gure herrian
gure hitzak mintzatzea.
Gerta daiteke zabarkeriaz
gure altxorra galtzea;
gauza normala izan behar du
guk euskaraz bizitzea.
Mundu globala zein den handia
txikiak behar arreta…
Euskal Herria bere ttikian
berari gure apeta.
Hiru hizkuntza daude Hendaian
hori ez da berriketa!
Bertsoen bidez egiten dugu
euskararen ariketa.
Entzuteko zain gure hizkuntza
anitz balitz, hala bedi.
Baikor jarrera eskua luza
elkarri laguntzen segi.
Eguneroko solas txikiak
itxaron gabe gehiegi,
euskararekin jantzi daitezen
Bidasoaren alde bi.
Zorte on opa hendaiatarrei,
berotzen doa giroa.
Alaitasunez bizi dezagun
oraina eta geroa.
Udaberria kax-kax atea
joka duen urtaroa
euskararentzat hilabete hau
izan bedi oparoa.
2016ko martxoaren 13an Gasteizko taldearekin saioa egin zuten Txingudikoek. Iñigo Ugarte, Abel Zabala eta Aitor Errazkin aritu ziren Txinguditik, eta Asier Otamendi, Felipe Zelaieta eta Xabier Rico Gasteizko Kakiturri taldetik. Goxo asko hartu zituzten gasteiztarrek txinguditarrak, eta hamabost bat lagunen aurrean egin zuten saioa Kakiturri elkartean; gasteiztarrek elkarte horren izena hartu dute taldea izendatzeko, bertan egiten baitute bertso-eskola, asteazkenero. Saioaren kronika Felipe Zelaietaren eskutik.
Otsailaren 20an, Legorretako gaztetxean kantatu zuten Manu Goioganak, Urko Casadok eta Aitor Errazkinek, Txingudiko Bertso Eskolakoak, hirurak. Goierritik Aitor Irastorza, Gema Urteaga eta Odei Lopez aritu ziren. Gureak aski pozik itzuli ziren, bai Odeiek soziedadean prestatutako afari goxoagatik, bai harrera egin zietenekin eta kantulagun izan zituztenekin primeran moldatu zirelako ere. Irunabarrek oso balorazio positiboa egin du Bertsotruk ekimenak orain artean emandakoaz.
“Gustora zeuden elatzetako kideak saio amaieran; eta ez zen gutxiagorako, bikain atera baitzen elkarteko zuzendaritza berriak egindako apustua.
Azken urteetako gabeziari aurre egin eta Elatzeta elkarteak dinamika propio indartsua izan behar duela hausnartu ondoren, bide horretan, bertso bazkaria antolatu zuten otsailak 20an, Alaia Martin eta Julio Sotorekin.
Elkartea jendez lepo, giro bikaina, goi mailako bi bertsolari eta antolatzaileen ilusio eta gogoak osagai nahikoak egun ederra aurretik genuela ohartzeko.
Eta hala izan zen: bazkari itzelaren ondoren, arratsalde bikaina pasa baikenuen Alaia eta Juliori esker. Gozatu ederra hartu genuen bertan geunden ume, gazte zein helduek. Umorea eta goxotasuna nahasturik saio borobila osatu zuten bi bertsolariek. Bertsolariak eta entzulegoa, gustora.
Pozgarria da halako ekimena horrenbeste mimoz antolatzea. Bertsolaria eta bertsozalea pozik uzten dituen horietakoa. Eta onena, hurrengo urtean ere, dena ongi bidean, otsailaren hirugarren asteburuan, hitzordua izango dugula Landetxan.
Mila esker, Elatzeta.”
Zuhaitz Olazabal,
Irunabarreko kide eta saioko gai-jartzailea.
Martxoaren 11n Aretxabaletan kantatu zuen Peio Iriarte irundarrak, 2016ko Gipuzkoako Eskolarteko Txapelketan. Lehendabiziko parte hartzea izan du Peiok, Txingudiko Bertso Eskolako kideak. 60-70 lagunen aurrean kantatu zuten bertsolariek Murualde elkartean. Saioa eta gero, oso pozik zen Peio egindako lanarekin, aberasgarritzat hartzen du Aretxabaletako esperientzia, eta ikasten jarraitzeko motibazioa eman diola esan digu.
Era berean, Irunabarretik, bereziki eskertu nahi dugu azken hilabete parean Arkaitz Oiarzabal “Xamoak” Peiori emandako laguntza guztia, bai eta Egoitz Zelaia (Peioren irakaslea), Abel Zabala eta Igauri Lopetegi ere, saioaren egunean berean Peio Aretxabaletara lagundu izanagatik.
Mila esker eta zorionak guztioi!
Peioren saio amaierako agurra:
Aurreko post batean adierazi bezala, Txingudi taldekook Gasteizko Kakiturri eta Goierri taldeko goierritarrekin joan-etorriko saioak egingo ditugu, Bertsotruk ekimenean parte hartzeak horretara lotzen gaituenez. 2015eko abenduaren 12an izan berri da gure estraineko elkarretaratzea, eta Kakiturri taldeko lagunak etxera gonbidatuta burutu dugu, bertso-bazkari formatuan. Eguerdiko 12:30etarako Irunen ziren Kakiturriko lagunak, eta bazkaltzeko ordura bitarte poteoan ibili ginen haiekin, bai eta pixkana taldeari batzen joan zitzaizkion bailarako hainbat bertsozalerekin ere. Irungo Erlaitz Mendi Elkartean jarria genuen zita, eta, azkenerako, 30 lagun inguru elkartu ginen bazkaritarako. Otordua prestatzeko ardura eta saioko antolakuntza guztia Irunabarreko kideok hartu genuen gure bizkar (bazkalostean bertsotan aritzeko lanak hartuta zituen Iñigo Ugarte barne).
Bazkalostean, eta arratsaldeko 17:00ak jota, Gotzon Aizpiolea irundarrak hartu zuen hitza saioa aurkezteko eta gai-jartzaile lanak betetzeko. Kantuan jarri zituen Juan Mari Juaristi, Alberto Martinez Kortabitarte “Betto” eta Xabier Lopez de Santiago Kakiturritik, eta Egoitz Zelaia, Iñigo Ugarte eta Abel Zabala, Txinguditik.
Ordu eta erdi inguruko saio umoretsua osatu zuten sei bertsolariek, hainbat ariketa motari aurre egin behar izan ziotelarik, eta bertaratutako jendeak atsegin handiz hartu zituen otordua, bertako lagun-giroa, bertso-saioa, noski, eta baita, guri hala iruditu zitzaigun, behintzat, bertsotruk egitasmoa bera ere.
Irunabarreko partaideok gure eskerrik beroenak luzatu nahi dizkiegu Kakiturri taldeko kideei beren jarrera eta esker onagatik, Betti-Gotti Euskara Kultur Taldeari soinu-ekipoa uzteagatik, Irungo Erlaitz Mendi Elkarteko zuzendaritzari, txoko goxo horren ateak zabaltzeagatik, eta saioaren antolakuntzan modu batera nahiz bestera parte hartu zenuten guztioi.
| Abuztuaren 14tik 17r…(e)k Moskuko Jaiak 2025 bidalketan | |
 | 150 urte Joxe Mari L…(e)k JOXE MARI LOPETEGIREN ITURRITI… bidalketan |
 | Anonimoa(e)k Irabazi asmorik gabeko I. Bert… bidalketan |
Irunabar, Irungo bertsoaren bilgunea 