Irunabar, Irungo bertsoaren bilgunea

10 Urr 2024

Ikasturtea hasi dugu, baina izen emateko aukera beti dago zabalik [2024-10-10]

Kaixo, bertsozale:

Ikasturteari ekin diogu jada, baina gogoan izan urte osoan zehar zabalik dagoela Txingudiko bertso-eskoletan izena emateko aukera. Bertsolaritzaren alderdi “guztiak” lantzeko moduko taldeak ditugu gurean: bat-batean aritzeko, aritzen ikasteko, trebatzeko, idatzizkorako, eskualdean bertsolaritza sustatzeko…

Oraingoz aktibo dauzkagun bertso-eskolak hauek dira:


1- Gazte eta heldu hasi berrien bertso-eskola: asteazken arratsaldeetan. Igauri Lopetegi da arduraduna.
2- Bat-batean I bertso-eskola: asteazken arratsaldeetan. Igauri Lopetegi da arduraduna.
3- Bat-batean II bertso-eskola: ostegun arratsaldeetan. Abel Zabala da arduraduna.

Hala ere, ez da baztertzen ikasturtean zehar beste talderen bat sortzeko aukera. Bertso-tailerra edo bertso jarriak lantzeko taldea esaterako.

Beraz, edozein dela ere bertsolaritzara hurbiltzeko buruan duzu(e)n manera, ez izan zalantzarik, eta idatzi irunabar@gmail.com helbide elektronikora. Gu geu jarriko gara zu(r)ekin harremanetan, eta hitz egingo dugu.

Jarraian Iruneroko urriko zenbakian argitaratua: https://irunero.eus/ikasturte-berria-bertsolari-hasiberri-zein-eskarmentudunentzat-ere-hasiko-da/

Posted in Berriak,Besterik and tagged | Utzi iruzkina
09 Urr 2024

“Ikaztegietatik Irunabarrera”. Jon Luzuriaga Iurramediren bertsoak, Iruneron.

IKAZTEGIETATIK IRUNABARRERA

Egilea: Jon Luzuriaga Iurramendi

Doinua: Trikitilariak omen gara

1)
Ez al da galdera ona
zer ote den zoriona?
Zer ote den zoriona
nola den putzu sakona
kontatu nahi nizueke
nola heldu naizen hona.
Nola heldu naizen hona
ez al da galdera ona?

2)
Haize freskoaren nahian
ibili nintzen garaian;
ibili nintzen garaian
aldaketaren bidaian,
Ikaztegietatik urrun
bukatu nuen Hendaian.
Bukatu nuen Hendaian
haize freskoaren nahian!

3)
Nahiz eta sinesten kosta
joan da egun mordoxka,
joan da egun mordoxka
hiru urte ozta-ozta
barnealdea utzirik
harrapatu nuen kosta.
Harrapatu nuen kosta
nahiz eta sinesten kosta!

4)
Izanaz nola damutu,
izenez ez dabil mutu,
izenez ez dabil mutu
beraz egin nion kuku
ia oharkabe nuen
Irunabar ezagutu.
Irunabar ezagutu
izanaz nola damutu!

5)
Beraz niretzat mesede
bai baitaukat aski fede,
bai baitaukat aski fede
baina izenak ze lege?
Irunetik badu zerbait
badu abarretik ere.
Badu abarretik ere
beraz niretzat mesede.

6)
Ez ote nabil honetan
balantzan eta orekan?
Balantzan eta orekan
hitzen esanahi gordetan
gozoa topatu nahian
nola erleak loretan,
nola erleak loretan
ez ote nabil honetan?

7)
Eta zaila da gelditzen
gurpila martxan hasi zen.
Gurpila martxan hasi zen
behin hona sartu bainintzen;
errima, doinu, neurrien
munstroa doa handitzen.
Munstroa doa handitzen
eta zaila da gelditzen.

8)
Beti zerbait baitaukagu
noizbait saio bat mokadu,
noizbait saio bat mokadu,
bertso idatzitik badu,
saio musikatuekin
zorioneko gara gu.
Zorioneko gara gu
beti zerbait baitaukagu.

9)
Zeinen leku egokia
asteroko biltokia.
Asteroko biltokia
emozioz diot ia
euskaraz eta bertsotan
izan dezagun tokia.
Izan dezagun tokia
zeinen leku egokia.

10)
Ez Marinak, ez Butronek,
ez Abadiako hormek,
ez Abadiako hormek,
ez Jaizkibeleko formek…
Txingudialdea horren
eder egiten du honek.
Eder egiten du honek
ez Marinak, ez Butronek!

11)
Nahiz nahikoa ez den sarri
deiadar eta aldarri,
deiadar eta aldarri
gabe lana da oinarri,
hemen esker on moduan
dozena bat bertso jarri,
dozena bat bertso jarri
nahiz nahikoa ez den sarri.

12)
Orain artean bezala
jarraitu nahi nuke hala.
Jarraitu nahi nuke hala
ez ote dugu normala,
maite dugun txoko honek
luzaro elkar gaitzala.
Luzaro elkar gaitzala
orain artean bezala!

Jarraian bertso-sorta entzungai Jone Garmendia Castañosek eta Jonek berak musikatuta:

Hemen jaitsi dezakezu

Iturria: https://irunero.eus/ikaztegietatik-irunabarrera/

Posted in Bertsoak and tagged ,, | Utzi iruzkina
03 Urr 2024

“Korrika urtea”. Aiora Fagoaga Izaren bertsoak, Bidasoko Hitzan.

KORRIKA URTEA

Egilea: Aiora Fagoaga Iza

Doinua: Zeru altuan zegoen jaunak

Hemen jaitsi dezakezu

1)
Euskal Herrian galdetu ezkero
zer da zuretzat Korrika?
Maitea dugun gure hizkuntzak
bi urtetik behin duen zita.
Bertan doanak aldiro uzten du
errepidean birika.
Korrikak beti eragiten du
bizipoza ta irrika.

2)
Ibilbidean mapa ikusi
ta egin dugu gogoeta;
makiltxo baten emango dio
euskarak herriari buelta.
Eguna hurbilduz dijoa eta
gu gaude pozez beteta,
erne ibili, prestatu zaitez,
hortxe dator furgoneta.

3) 23. Korrika
hemen hasiko dela entzun,
jarraian denok sentitu gara
berezi eta zortedun.
Elkartu ezagun, familiako,
bikotekide zein lagun.
Gure herrian hasiko da ta,
gozatu dezagun, Irun!

4)
Lagunekin hitz egiten hasi
eta gehiengoek lana,
horixe baita denek duguna
egunerokoan zama,
ordutegia aldatu nahi dut,
Korrikak horra narama,
eguna hurbiltzen hasi da eta
zein da zuk daukazun plana?

5)
Hiri hontako euskaldunontzat
bai pozgarria berria!
Eguna hurbilduz dijoan ahala,
ezin ezkuta irria.
Euskarak hemen izan dezake
bultzada, udaberria,
behingoagatik dagoelako,
Irunez harro herria.

6)
Hasiko da ta, den-denak erne
denok piztuta antena.
Hitz egin dute, eman digute,
korrika hasteko baimena.
Gaur hala ere berdin-berdin du
lehenengo ala azkena,
hemendik hasi eta badoa
Euskal Herrian barrena.

7)
Euskal Herrian barrena hortxe,
hartuz edozein karrika.
Herrietako txoko guztitan
piztuaz bai bere txispa.
Bi urte luzez itxoin ta gero,
pasatu zaigu irrista.
Hurrengora arte, aio pelaio,
beste bat arte, Korrika!

Iturria: https://bidasoa.hitza.eus/generoak/iritziak/hitza-irunabar-bertso-sorta-aiora-fagoaga/

Posted in Bertsoak and tagged , | Utzi iruzkina
10 Ira 2024

Txingudiko bertso-eskoletako Manu Goiogana Bengoetxea Gipuzkoako Bertsolari Txapelketan [2024-09-10]

Kaixo, bertsozale:

Larunbatean, irailaren 14an, hasiko da Gipuzkoako Bertsolari Txapelketa. 2024ko ekitaldian Irunabar, Irungo bertsoaren bilguneak kudeatzen dituen Txingudiko bertso-eskoletako Manu Goiogana Bengoetxea irundarrak hartuko du parte. Goioganak irailaren 15ean izango du lehen saioa, Lasarte-Orian.

Animo eta zorte on!

Posted in Besterik and tagged , | Utzi iruzkina
09 Ira 2024

Ikasturte honetan ere bailarako hedabideekin elkarlanean ariko gara

Irunabarren helburuetako bat bertsoa inguruko hainbat txokotara helaraztea ere badenez, badira zenbait ikasturte bailarako hedabideekin elkarlanean ari garela.

Hasi berri dugun 2024/25 hau seigarren ikasturtea dugu Bidasoko Hitzarekin elkarlanean. Irailean hasi eta ekaina bitarte, hilero, eta hilabeteko azken ostiraletan, Txingudiko bertso-eskoletako kide batek bertso-jarriak argitaratuko ditu aipatutako aldizkariko papereko edizioan, eta egun gutxi batzuk igaro ondoren, eskuragarri izango duzue argitalpen hori bera baita bertsio digitalean ere. Nola ez, Irunabarren webgunera ere ekarriko ditugu bertso horiek guztiak.

Irunero aldizkariarekin hasitako elkarlana oraindik lehenagokoa da. Zortzigarren ikasturtez jarraian, Txingudiko bertso-eskoletako kideren baten bertso jarriek argia ikusiko dute hilero. Iruneroren kasuan, hilabete hasieran argitaratuko da elkarlanaren emaitza, eta kasu honetan ere paperezko edizioan zein bertsio digitalean egongo da ikusgai. Ikasturtea urria hasieran hasi eta ekainean amaituko da, eta Iruneroko sorta guztiak ere Irunabarren webgunera ekarriko ditugu.

Horretaz gain, osagarri modura, idatzitako sorta hauek musikatzen direnean ere eskuragarri izango dituzue webguneko argitalpenetan zein Ivoox-eko gure kanalean (harpidetu zaitezte!). Gero eta gehiago zarete elkarlan hauetako bertso-sortaren bat musikatzera animatu zaretenak. Ikasturte honetan ere animatuko bazinate plazer handiz jasoko genituzke zuek musikatu eta kantatutako bertso-sortak irunabar@gmail.com helbidean.

Hona hemen pasa den ikasturtean argitaratu eta musikatutako zenbait bertso-sorta:

  • “Hemen duzu nire sorta”, Rafa Rodrigo Perurenak 2024ko apirilean Bidasoako Hitzan argitaratu eta Rafak berak musikatutako bertso-sorta:
Hemen jaitsi dezakezu
  • “Eskolatik jasotzeko”, Manu Goiogana Bengoetxeak 2024ko marxoan Iruneron argitaratu eta Makalo Jauregi Belokik musikatutako bertso-sorta:
Hemen jaitsi dezakezu
  • “Ibaitik itsasora”, Igauri Lopetegi Amostegik 2023ko azaroan Bidasoako Hitzan argitaratu eta Peio Etxeberriak musikatutako bertso-sorta:
Hemen jaitsi dezakezu

Posted in Berriak,Bertsoak and tagged ,,,,,,, | Utzi iruzkina
08 Abu 2024

Txingudiko bertso-eskolak: 2024-2025 ikasturtea. Izen-ematea abian.

Azken ikasturteetan bezalaxe, datorrenean ere hainbat talde izango dira Txingudiko bertso-eskolan, 2024ko urritik aurrera: haur, nerabe eta gazteentzako bertso-eskolak, hasiberrientzako bertso-eskolak, bertso-tailerra, bat-bateko jardunerako taldeak, …

Izena emateko, edo informazioa behar baduzu, idatzi lasai asko irunabar@gmail.com posta elektronikora eta gu geu jarriko gara zuekin harremanetan.

Anima zaitezte eta zabaldu mezua.

Posted in Berriak,Besterik and tagged | Utzi iruzkina
08 Abu 2024

Moskuko jaiak 2024

Kaixo, bertsozale:

2024an ere Moskuko jaiak egongo dira eta aurten ere, egitarau zabal eta aberats baten baitan, bertso-saioa antolatu du Irunabar, Irungo bertsoaren bilguneak, Moskuko jai batzordeko kideekin elkarlanean.

Bertso-saioa, ostegunean izango da, abuztuaren 15ean. Plazan izango da, arratsaldeko 19:30ean. Adrian Arruti gai-jartzailearen esanetara ariko dira kantuan Oihana Bartra santutxuarra, Nerea Elustondo legazpiarra, Libe Goenaga getariarra eta Irantzu Idoate hazpandarra.

Posted in Berriak,Bertso saioa and tagged ,,,,, | Utzi iruzkina
08 Abu 2024

Euskal Jirako bertso-saioa [2024-08-03]

Kaixo, bertsozale:

Aurten Igauri Lopetegi, Aitor Mendiluze eta Aitor Sarriegi aritu dira bertsotan pasa den larunbatean, abuztuaren 3an, Urdanibia plazan. Oholtzan aritzeaz gain, auzoko taberna ezberdinetan zehar aritu dira.

Posted in Berriak,Bertso saioa and tagged ,,, | Utzi iruzkina
17 Uzt 2024

“Onbuaren itzalak” figuranteak behar ditu Hondarribian, 2024-08-03an, 9:00etan.

Onbuaren itzala filmatzen ari dira dagoeneko, eta 80 figurante inguru behar dituzte 2024ko abuztuaren 3an Hondarribiko herriko etxeko areto nagusia betetzeko. Filmaketan parte hartzeko prest dagoenak 653 71 56 64 telefono zenbakira deitu behar du, eta bertan emango dizkiote jakin beharreko guztien gaineko azalpenak.

Antolatzaileek zabaldu duten irudia

Segidan, antolatzaileek zabaldu duten testua:

“Arratsalde on lagun hori.
Oraingo honetan eskeintza-eskaera bat egitera natorkizu.
Segurozko gaia honetaz zerbait entzuna izango duzula azken hilabete hauetan
Horrela ez bada orain bidaltzen dizudan imajinaren bidez berri izango duzu.
Motx motxean agertu nahi dizudana da, zuretaz-zuetaz gogoratu naizela honen berri ematerakoan. Zure-zuen beharra izango bai du Euskal kultur ekintza honetarako Patxi Biskert Tasio filmako aktoreak, orain esku artean eta grabaketa lan aurreratuan Hondarribian Abuztuaren 3an egitera dijoan grabaziorako.
80-90 pertsonaren beharrean aurkitzen da Hondarribiko UDAL ARETO NAGUSIA entzulez bete ahal izateko.
OMBUREN ITZALA Pellomari Otaño bertsolari izanduaren bizitzaz izango den filmaz ari gara.
Denon arte lortzeko saioan buru belarri sartuta gaude. Ta gaude esaten dut, zurekin ere kontatu nahi bai dugu AUZOLANEAN aurrera eramanez bukatu nahi dugulako.
Karteltxoarekin obeto irudikatuko duzulakoan, zure deiaren zai gelditzen gara.
Animatuko zarelakoan-zaretelakoan agur eta ongi etorri bero bat.
Deitu tfno honetara
653715664
Eta mila esker aurreratuak.
Ez utzi azken ordu arte mesedez.”

Posted in Berriak and tagged , | Utzi iruzkina
02 Uzt 2024

“Iñigo Muguruza”. Makalo Jauregi Belokiren bertsoak, Bidasoko Hitzan.

IÑIGO MUGURUZA

Egilea: Makalo Jauregi Beloki

Hemen jaitsi dezakezu

Doinua: Agur sagar beltzeran

1)
Mila bederatzirehun
Larogei ta lauan
Haize berriren batek
Astindu gintuan
Rocka Ska jauziak
Argiak fokuan
Kitarra-apalarekin
Koroak kantuan
Iñigo Muguruza
Zaitut akorduan.

2)
After-boltxebike ta
Azken guda dantza
Kolpez kolpe datozkit
Izenburu saltsa
Urte luzeetan nun nahi
Zenbat kontradantza!
Kortaturen indarra
Piper eta gatza
Iñigo zure eskua
Hain zen aberatsa!.

3)
Kortatutik “Delirium”
Ta negu gorrira
Borreroak dituen
Milaka-aurpegira
Galindo ta enparau
Nolako mugida
Zuen irudimenak
Bazuen dizdira
Iñigo zu ez zinan
Iñoiz erretira.

4)
“Joxe Ripiau” “Sagarroi”
“Lurra”, “Hiru leike”
Beste lau izenburu
Ene! Nola leike
Musika pasioa
Musika egite
Eta jaso zenitun
Beste hainbat konbite
Zinena zinelako
Guk zaitugu maite.

5)
“Bizitza triste eta
Ederra” zenion
“Karpe diem” “Gabriela”
Entzun genizkion
Erritmo kutxakorrak
Sortzen zitzaizkion
Bide amaigabeetan
“Manresan” “Laudion”
Ke arteko gaupasak
Milaka zorion.

Doinua: Ai Margarita

6)
Zure Aurrera gatoz-Kantatzera Margarita
Bertsolari ta zale-Ai zer kuadrila polita
Iñigo ez al zaude?- bazter batetik irrika
Ea gustatzen zaizun-gure arteko lirika
Gure jolasa hau da-batak bestea zirika
Ragamufin eta Ska-kantari eta jauzika.

7)
Ai Margarita…….
Janis joplin, Bob Maley-Laboa ta Maurizia
Iñigoren alboan-konplizitate bizia
Gure artean dabil-zuek guretzat utzia
Karpe diem da hemen-gure lema Nagusia
Bizirik dago zuek-sortutako extasia.
Ai Margarita……

Jarraian bertso-sorta entzungai Makalok berak musikatuta:

Hemen jaitsi dezakezu

Iturria: https://bidasoa.hitza.eus/generoak/iritziak/hitza-irunabar-bertso-sorta-makalo-jauregi/

Posted in Bertsoak and tagged , | Utzi iruzkina

Post Navigation

← Older Entries
Newer Entries →