Euskararen eguna dela eta, Manu Goiogana eta Aitor Errazkin Txingudi Ikastolan aritu ziren bertsotan, 2017ko abenduaren 1ean, Lehen Hezkuntzako 6. mailako ikasleek jarritako ariketa eta gaiei erantzuten.
Urtarrilaren 20an, larunbatarekin, emango diegu hasiera 2017-2018 ikasturteko Bertsotruk ekimeneko bertso trukeei. Ikasturte honetan Gernika-Lumoko eta Aramaioko bertso eskoletako kideekin egokitu zaigu txinguditarroi bertso trukean aritzea, eta Gernika-Lumokoak etxean hartuta emango diogu hasiera aurreko bi ikasturteetan hain emankor gertatu zaigun ekimenari.
Horretarako, bertso-bazkaria antolatu dugu Irungo Lakaxita gaztetxean. Bazkaldu eta gero Irati Alcantarilla, Igauri Lopetegi, Manu Goiogana eta Abel Zabala txinguditarrak kantuan entzuteko aukera izango dugu, Koldo Gezuraga, Aitor Zarraga eta Asier Galarza Gernika-Lumoko bertso eskolako kideekin batera. Gai jartzaile eta antolakuntza lanetan Irunabarreko kideak arituko gara, Lakaxitako lagunekin elkarlanean.
Otorduari 13:30ean emango diogu hasiera, eta txartelak 15 euroko prezioa izango du (10 euro kobratuko zaie 20 urtetik beherako zein langabetuei).
Bertso saioaren ondotik kontzertuak izango dira iluntzean hasi eta ordu txikietara bitarte; egun-pasa polita egiteko aukera izango dugu, beraz.
Bertso saiorako sarrerak erreserbatzeko deitu edo idatzi mezu bat (sms, Whatsapp zein Telegram) 685 72 75 39 telefono zenbakira. Izena emateko azken eguna urtarrilak 18 izango da, osteguna.
Anima zaitezte.
Irunerok Aitor Errazkinen “Burujabetzari” izeneko bertso sorta argitaratu du bere 316. zenbakian.
[Txingudiko bertso eskolako kideen bertsoak Irunero aldizkarian]
Urtarrilaren 4ean izango da urteko lehendabiziko bertso gaua, eta bertan ariko dira Iñaki Zelaia, Julen Zelaieta, Aimar Karrika, Andoni Zelaia eta Abel Zabala. Gaiak jartzen Aitor Errazkin ariko da, eta bat-bateko saioaren aurreko bertso jarriak, aldiz, Adrian Arrutiren eskutik helduko zaizkigu.
Gogoan izan saioa eta gero afaltzeko aukera paregabea eskaintzen digula Kabigorrik. Bertan elkar ikusiko dugulakoan, urte berri on denoi.
Blaganek eta Hondarribiko Udalak elkarlanean antolatutako egitarauari bertsotan eman zioten hasiera Aitor Errazkin eta Egoitz Zelaiak Itsas Etxea aretoan.
“Egun garrantzitsua gaurkoa, azken hilabeteetan argazkien mosaikoa osatzen ibili gara “itxeki euskarari” leloarekin, eta gaur izan da lan horren aurkezpena, nazioarteko euskararen egunarekin bat eginda. Jende asko hurbildu da Itsas Etxera antolatu dugun ekitaldian parte hartzera. Lehenengo zatian Udaletxeko zinegotziek mezua irakurri dute eta “Euskara munduan, besteen ahotan” dokumentala ikusi dugu. Ondoren Aitor Errazkin eta Egoitz Zelaia bertsolariek bigarren zatiari hasiera eman diote, San Jose Ikastetxeko eta Ama Guadalupekoa ikastetxeko ikasleek prestatutako bideoak ikusi ditugu, Talaiako DBHko ikasleek “beti euskaraz cup song” abestu dute eta Talaia batxilergoko ikasleek musika emanaldia eskaini digute. Momentu horretan mosaikoa osatzeko jaso ditugun argazki guztiak banan bana pantailan ikusteko aukera izan dugu, guztira 700 argazki jaso dira! Lastima denak mosaikoan sartu ezin izana! Bidalitako argazki guztiak kontuan hartuz sarien zozketa bat egin da, eta abestien bidez saioa bukatu dugu. Ondoren, kalejiran, mosaikoa jarrita dagoen lekuraino hurbildu gara eta han abestuz ekitaldia amaitutzat eman da.” (Blagan, 2017)
2017-2018 ikasturtean abiatutako elkarlana medio, hilabetero bertso sorta bat idazten du Irunabarren bueltako lagunen batek Iruneron argitaratzeko, hamabostean behin Irunen euskara hutsean argitaratzen den hamabostekarirako, hain justu ere. Abenduan, Manu Goiogana Bengoetxearen txanda izan da: “Zure ordenean“.
Abenduko Kabigorriko bertso gaua hilaren 14an izango da, behin abenduko zubia pasata, ostegunarekin, eta arratsaldeko 19:30etatik aurrera, beti bezala.
Bertso saio musikatua izango da, eta bertsotan Beñat Gaztelumendi (Añorga), Alaia Martin (Oiartzun), Nerea Ibarzabal (Markina-Xemein) eta Manu Goiogana (Irun) ariko dira; guztiak Haritz Casabalen (Pasai Antxo) aginduetara eta Antton Aranburu eta Beñat Urteaga musikarien erritmora.
Gogoan izan Kabigorrik afaltzen geratzeko aukera paregabea eskaintzen duela. Plazer baduzue, bertan ikusiko dugu elkar.
Hilabetero bertso eskolako kideren batek idatziko ditu bertsoak Iruneron, 2017-2018 ikasturtean zehar. Azaroa Egoitz Zelaiaren txanda izan da.
ESPAINIA
Bertsoak: Egoitz Zelaia
Doinua: Kideari (Mikel Urdangarin)
1.
Kuba, Antillak, India,
Puerto Rico, Kanbodia,
Haiti, Ekuador, Burgia,
Jamaika, Oman, Mahdia,
Peru, Panama, Indonesia,
Portugal, Iran, Santa Luzia,
Guatemala, Bolibia,
Tunez, Angola, Timor, Sahara,
Uruguai, Brasil, Txile, Granada,
Puerto Rico, Kolonbia.
2.
Nork ez zituen ikusten
Argentina odolusten,
besteen sakela husten
eta beraiena puzten?
Guinea, Antigua eta Barbuda,
Maroko, Bahamak, Taiwan, Aruba,
erraz jantzi eta biluzten.
Turkiar Irlak eta Kaikos,
Algeria, Tetuan, Tanger, Barbados, …
odolez hartu zituzten.
3.
Mexikok zuen ondare
ia guziaren jabe
egin eta dohakabe
orain ere harro daude.
Venezuela ere hor dago,
edo Trinidad eta Tobago,
Paraguai, Somalian pare.
Euren bandera, eta soldadu,
Espainiak ez du gerrarik galdu
odolik isuri gabe.
4.
Historiak gogoeta
eragiten du tarteka.
Katalunia dela eta,
dela Irak, dela ETA.
Hauen kasuan Espainiako
monologoak ez duelako
egiten elkarrizketa.
Beti antzera amaitzen dugu
inpotentzia-nekez mukuru
eta kaleak beteta.
5.
Nahiz ta batzuk gogor ari
presionatzen aspaldi
hel diezaion hitzari
eusten dio bereari
burua zurrun, eskuak estu.
Lehendik handia den horrek ez du
izan nahi bat eta handi.
Alferrik dira hainbeste saio
maiz itsasoa eskaintzen zaio
urik nahi ez duenari.
6.
Orain predikuz prediku
zapaltzaile izpiritu
haren odol esplizitu
hura nola defenditu?
Hurbilekoak, zein indigenak,
anikilatu zituen denak.
Ez zuen deus deskubritu.
Onartu gabe behin hildakoak,
oraindik ere, egindakoak
ospatu egiten ditu.
7.
Nonbait, behar den unean,
hitza dagokizunean,
neurtzen zara berunean
eta ez begirunean.
Historia maiz dugu testigu
zer garen berak erraten digu
gure argi-ilunean,
eta zuk argi bezain burutsu
maite zaitzagun eskatzen duzu
gorroto gaituzunean.
| Txingudi A taldea Oa…(e)k M-28, egun betea Donostian eta… bidalketan | |
 | Giro polita atzo Kab…(e)k Gipuzkoako Herriarteko Bertsol… bidalketan |
| Zita bikoitza Gipuzk…(e)k Herriartekoaren lehendabizikoa… bidalketan |
Irunabar, Irungo bertsoaren bilgunea 