Irunabar, Irungo bertsoaren bilgunea

26 maiatza 2017

Ekainaren batean, azken bertso-gaua: Txingudi I vs. Txingudi II

Bereziak izaten dira ikasturte amaierako bertso gauak, ezbairik gabe, eta berezia izan nahi du aurtengoank ere. Gipuzkoako Herriartekoan ibili dira  Txingudi I eta Txingudi II taldeak, beste 34 talde gehiagorekin lehian, baina lehen aldiz igoko dira bi taldeak batera oholtzara, jendeaurrean. Batera oholtzaratu? Aurrez aurre jarri? Nork daki? Izan ere, Irunabarren jirako hainbat lagun bildu da bi talde hauetara, Gipuzkoako Herriartekoan parte hartu eta antolakuntza lanetan laguntzeko, eta honakoan ere Adrian Arruti, Zuhaitz Olazabal, Mikel Garmendia eta Gotzon Aizpiolea aritu dira ekainaren 1eko saioak zer-nolakoa beharko lukeen pentsatzen. Eta zer izango den? Bada, hori bertaratzen direnek bakarrik jakingo dute. Kabigorrin hamaika ikusiak gara honezkero… Beraz, auskalo!

Azken bertso gaua izaki, Irunabarrek jatekoa eta edatekoa eskainiko die bertaratzen direnei, aurreko hiru ikasturte amaieretan eta zenbait egun berezitan egin bezalaxe. Joan da laugarren urtea, dagoeneko, hilabeteko lehendabiziko ostegunarekin bertso gauak antolatzen; urtean bederatzi bertso gau… Datorren ostegunekoa, beraz, hogeita hamaseigarrena: Txingudi I vs. Txingudi II. Hantxe izango gara zuen zain, plazer baduzue.

This slideshow requires JavaScript.

This slideshow requires JavaScript.

Posted in Berriak and tagged ,,,,,,,, | Utzi iruzkina
23 Api 2017

Maiatzeko Kabigorriko bertso-gaua [2017-05-04]: A. Zelaia, J.M. Lopez, M. Arozena eta I. Zelaia

Badator ikasturteko azken-aurreko bertso-gaua, Andoni Zelaia, Juan Mari Lopez, Manolo Arozena eta Iñaki Zelaia bertsolariak kantuan aditzeko aukera eskainiko diguna. Lau bertsolariei gaiak jartzen eta saio aurkezten, aldiz, Urko Casado ariko da, Txingudiko bertso-eskolako kide astigartarra. Bat-bateko saio aurreko bertso-jarriak Egoitz Zelaiaren eskutik helduko zaizkigu.

19:30etatik aurrera izango da saioa, eta ondoren, gogoan har ezazue Kabigorrik afaltzen geratzeko eskaintzen digun aukera paregabea.

Bertan ikusiko dugu elkar.

This slideshow requires JavaScript.

Posted in Berriak and tagged ,,,,,, | Utzi iruzkina
20 Api 2017

… Bertso guztien habia

Hona Taket Bertso Eskolako kideek eta Mungiako musikariek elkarlanean ateratako diska. 5 euroan dago salgai, eta gurean ere baditugu ale batzuk. Eskuratu nahi izanez gero, jarri harremanetan gurekin irunabar@gmail.com helbidera mezu bat bidalita.

Taketekoek ondutako lan honi buruz gehiago jakiteko:

http://www.bertsoa.eus/eu/bertsoa-albisteak-ficha.asp?idAlbistea=6498

http://www.bertsolari.eus/bertsolaritzaren-hemeroteka/bertso-guztien-habia-mungia/

http://www.hamaika.eus/tb/bideo/81047

http://www.kontaizu.eus/node/1569

Posted in Berriak and tagged | Utzi iruzkina
20 Api 2017

Txingudi II taldeko kideek Gipuzkoako Herriartekoan kantatutako hainbat bertso

Txingudi II taldeak Irungo Mendizaleak Elkarteak Larretxipi kalean duen lokalean hartu zuen “Ebie ai do” taldea, 2017ko martxoaren 3an, eta Andoainen kantatzera joan ziren 2017ko martxoaren 10ean. Hura eta gero, bigarren faserako sailkatu, eta Villabonako gaztetxean aritu ziren “Am…ona” taldearekin, lehenik, eta Hondarribiko Olagarro Kultur Elkartean hartu zuten “26 +” taldea, 2017ko apirilaren 8an. Hona lau saio horietan barrena Aitor Errazkinek, Egoitz Zelaiak eta Manu Goioganak ondutako ariketa eta bertsoaldi zenbait.

 

Posted in Bertsoak and tagged ,,,,,, | Utzi iruzkina
14 Api 2017

Txingudi I taldeko kideek Gipuzkoako Herriartekoan kantatutako hainbat bertso

Txingudi I taldeak Irungo Hazia Elkarte Kulturalean hartu zuen Ereñotzuko Taldea, 2017ko martxoaren 3an, eta Azkoitiara kantatzera joan ziren 2017ko martxoaren 10an. Hona bi saio horietan barrena Abel Zabalak, Iñigo Ugartek eta Andoni Zelaiak ondutako ariketa eta bertsoaldi zenbait.

 

Posted in Bertsoak and tagged ,,,, | Utzi iruzkina
13 Api 2017
3 Comments

JOXE MARI LOPETEGIREN ITURRITIK BERTSOTAN – Kantaldia (bideoa)

Blog honetan adierazi genuen bezala, 2016ko urriaren 22an izan zen Joxe Mari Lopetegi bertsolari irundarraren omenez antolatu genuen kantaldia; orduko grabazioa publiko egiteko, ordea, gaurko eguna hautatu dugu: Espainiako II. Errepublika aldarrikatu zen egunaren bezpera, eta Joxe Mari Lopetegi zenaren eguna, 1875eko apirilaren 13an jaio baitzen, Irunen, orain dela 142 urte.

Post honekin itxitzat ematen dugu, momentuz, Txingudiko Bertso Eskolako Bertso-tailerreko kideek 2016ko urrian Joxe Mari Lopetegi bertsolari irundarra eta haren obra ezagutzera emateko abiatutako ekitaldi sorta. Mila esker bihotz-bihotzez bidelagun izan zareten guztioi.

Kantaldiari buruz, hona Argia aldizkariko zuzendari Estitxu Eizagirrek bere blogean idatzitakoak. Mila esker, Estitxu, beste behin ere (Estitxuk “Joxe Mari Lopetegi: Irungoa, errepublikarra eta bertsolaria” artikulua idatzia zuen, aurrez, Argian bertan, 2005. urtean).

Posted in Berriak,Bertso saioa,Bertsoak,Kronikak and tagged ,,,,
20 Mar 2017

Igauri Lopetegi irundarra Gipuzkoako Eskolarteko txapelketan

Orioko Gure-Etxea Elkartean jokatu zen kanporaketan (2017-03-17) aritu zen kantari Igauri Lopetegi irundarra, eta finalerako sailkatzerik lortu ez zuen arren, saioa eta gero gustura zen irundarra egindako lanarekin. Lopetegirekin batera, honako bertsolariak aritu ziren kantuan: Gontzal Belategi Zubia, Andoni Mujika Izagirre, Ane Peñagarikano Leiva, Julene Iturbe Epelde, Gartxot Ramirez Saralegi, Peio etxabe Arregi eta Ekain Lopez Fraile.

Posted in Besterik and tagged , | Utzi iruzkina
19 Mar 2017

Apirileko Kabigorriko bertso-gaua [2017-04-06]

Apirilaren 6an izango da, ostegunarekin, 2016-2017 ikasturteko 7. bertso-gaua. Gotzon Aizpiolea irundarraren esanetara ariko dira Urko Casado astigartarra, Iñigo Ugarte Gaintxurizketakoa, Odei Barroso urruñarra eta Maialen Akizu urretxuarra. Bertso jarriak, ordea, Uxue Larrukert irundarraren eskutik helduko zaizkigu. Saioa Kabigorri Bidasoaldeko Ateneoan izango da saioa, hilabeteko lehenengo ostegunero bezalaxe, arratsaldeko 19:30etatik aurrera. Saioa eta gero, afaltzen geratzeko aukera bikaina izaten da Kabigorrin. Anima zaitezte!

This slideshow requires JavaScript.

 

Posted in Bertso saioa,Besterik and tagged ,,,,, | Utzi iruzkina
19 Mar 2017

Gipuzkoako Herriartekoa: “Txingudi II” – “26 +”, Hondarribiko Olagarro Elkartean [2017-04-08]

 Gipuzkoako Herriarteko bigarren faseko saioa izango da Hondarribiko Olagarro Kultur Elkartean, 2017ko apirilaren 8an.

14:00etan izango da bazkaria, eta bazkaldu eta gero, Txinguditarrek (Manu Goiogana, Egoitz Zelaia eta Aitor Errazkin) eta Tolosaldekoek (Iñigo Gorostarzu, Adur Gorostidi eta Txomin Azpiroz) eskainiko duten bertso-saioa izango da. Sarrerak 15 €an izango dira. Izena ematearekin nahikoa izango da. Sarrerak egunean bertan kobratuko zaizkie bazkaltiarrei.

Sarrerak eskuratzeko, irunabar@gmail.com helbide elektronikoan edo 690 065 826 telefono zenbakian.

Bi taldeek egin beharko dituzten ariketak, honakoak:

  • Hasierako agurrak
  • Binaka (talde bakoitzeko kide bat), “Iparragirre abila dela” doinuan, hiruna bertso, gaia emanda.
  • Binaka (talde bakoitzeko kide bat), zortziko txikian, hiruna bertso, gaia emanda.
  • Binaka (talde bakoitzeko kide bat), hamarreko txikian, hiruna bertso, gaia emanda.
  • Bakarka (talde bakoitzeko kide bat), bina punturi erantzun.
  • Bakarka (talde bakoitzeko kide bat), gaia emanda, bina bertso.
  • Binaka (talde bakoitzeko kide bat), abiapuntu bat emanda, puntutan saioa egin,  sei bertso osatu arte.
  • Taldeka, pertsonaia bat emanda, bi kide pistak ematen eta hirugarrena asmatzen.
  • Taldeka, gai librean, koplatan, bederatzi kopla egin arte, eta trikitiaren laguntzaz.
  • Amaierako agurrak

Anima zaitezte!

Posted in Berriak,Bertso saioa and tagged ,,,,,,,,,, | Utzi iruzkina
19 Mar 2017

Txinguditarrak aurrera Gipuzkoako Herriartekoan

Txingudi I eta Txingudi II taldeak Gipuzkoako Herriartekoan parte hartzen ari dira, eta behin lehen fasea amaituta, Txingudi II taldeak aurrera egitea lortu du. Bigarren faseko lehendabiziko zita Villabonan izango dute txinguditarrek, apirilaren 2an. Bigarrena, aldiz, Hondarribian, Tolosaldeko 26+ taldeari etxean harrera egitea egokitu zaielarik. Apirilaren 8ko saioa Hondarribiko Olagarro elkartean izango da, bertso-bazkari formatuan. Txartelak 15 euroan izango dira salgai. Erosi nahi izanez gero, idatzi irunabar@gmail.com helbide elektronikora, edo hots egin (edo mezua bidali) 685 72 75 39 telefono zenbakira.

Herriarteko lehen faseari buruzko xehetasun gehiago jakiteko:

http://www.bertsozale.eus/eu/gipuzkoa/herriartekoa/albisteak/herriartekoko-lehen-faseko-azken-saioetan-ere-giro-bikaina

Txingudi II taldeak “Amm…ona” eta “26 +” taldeak izango ditu aurrez-aurre:

 

Posted in Besterik,Kronikak and tagged ,,, | Utzi iruzkina

Post Navigation

← Older Entries
Newer Entries →