Martxoaren 10ean bi hitzordu ditugu txinguditarrok, Gipuzkoako Herriartekoa dela eta. Txingudi I taldeak Azkoitira egin beharko du; eta Txingudi II-k, aldiz, Andoainera. Hementxe dituzue bi saioen berri ematen duten kartelak.
Eta hona orain arteko bi saioetako hainbat argazki:
Abel Zabala irundarra, Izarne Zelaia donostiarra, Xabi Maia elizondoarra eta Eneko Fernandez lesakarra ariko dira kantuan. Aitor Errazkin irundarrak jarriko dizkie gaiak, eta Xabier Isasi Txingudiko Bertso Eskolako bertso-tailerreko kidearen eskutik helduko zaizkigu bat-bateko saio aurreko bertso jarriak. 19:30etan hasiko da saioa. Saioa eta gero, beti bezala, Kabigorrin afaltzen geratzeko aukera aparta izango dugu.
Anima zaitezte!
Ederki pasa genuen Gipuzkoako Herriartekoa dela eta eskualdeko lehendabiziko zitan. Hona saioaren kronika ofiziala:
Gipuzkoako Herriartekoaren baitan, Txingudi bailarako “Txingudi II” eta Goierriko “Ebie ai do!” taldeak aritu dira, otsailaren 18an, Irungo Mendizaleak Elkartean. 30 bat lagun bildu dira, tartean Goierritik gerturatutako bertsozaleak, eta giro onean joan da saioa. “Txingudi II”-tik Aitor Errazkin, Manu Goiogana eta Egoitz Zelaia aritu dira bertsotan, eta “Ebie ai do!”-ren ordezkari, Aitor Irastorza, Odei Lopez eta Gemma Urteaga. Adrian Arruti eta Mikel Garmendia aritu dira gai-jartzaile, eta Zuhaitz Olazabal, Eneko Sanchez eta Mikel Urteaga epaile lanetan.
Umoretsu abiatu da buruz burukoa. Agurrean, goierritarrek ironia handiz zirikatu dituzte Txingudiko bertsolariak, Xalbadorren heriotza, Olentzero joan zaigu edota Mayonesa doinuen erritmora. Bidasoaldeko hirukoteren leloak berriz, kantari jarri du publikoa: Oh, oh, oh, euri azpian naiz ari, euri azpian kantari. Epaimahaiak nabarmendutako lanen artean izan da, esaterako, Manu Goiogana eta Aitor Irastorzaren buruz burukoa, hamarreko txikian: internet bidez ezagutu dute elkar, eta lehenengoz elkartu dira. Etxeko hirukoteak koplaka egindako ariketa ere azpimarratzekoa, Tolosako inauterietara zein mozorro eraman erabaki beharraz. Eta berdin bakarkakoak, bai Urteagarena, auzoan kamerak jarri dituztela-eta, bai Goioganarena, Elikagaien Bankura lehenengoz joan den herritarraren rolean. Erabilitako doinuetan bertsolariek egindako ahalegina ere eskertzekoa da.
Ordu eta hogei minutu inguru iraun du saioak eta epaileek 17 puntu eman dizkiote “Txingudi II” taldeari eta 7 “Ebie ai do!” taldeari.
Datorren larunbatean izango da Gipuzkoako Herriartekoa dela eta eskualdeko lehendabiziko bertso-zita, 2017ko otsailaren 18an, hain zuzen ere. Txingudi II eta “Ebie ai do” taldeak ariko dira buruz buru, Irungo Mendizaleak Elkarteak Larretxipi kalean duen lokalean (Zokueta jatetxea zena). Arratsaldeko 19:00etan hasiko da saioa, eta sarrera doan izango da. Txingudi II taldetik Aitor Errazkin, Egoitz Zelaia eta Manu Goiogana ariko dira bertsotan, eta, “Eurie ai do”-tik, berriz, Gemma Urteaga, Aitor Irastorza eta Odei Lopez.
Bertsolariek egin beharreko lanak honakoak izango dira.
Anima zaitezte.
Gipuzkoako Herriartekoa antolatu dugu elkarlanean Gipuzkoako hainbat bertso-eskolak, bertso-taldek eta Gipuzkoako Bertsozale Elkarteak. Ekimenari buruzko informazioa http://www.bertsozale.eus/eu/gipuzkoa/herriartekoa helbidean duzue. 38 taldek hartuko dugu parte guztira, eta tartean, Txingudiko Bertso Eskolaren jiran sortutako bi: Txingudi I eta Txingudi II
Bertsolariak: Abel Zabala, Iñigo Ugarte eta Andoni Zelaia
Epaileak: Beñat Elosegi eta Gotzon Aizpiolea
Gai jartzaileak: Oinatz Mitxelena, Igauri Lopetegi eta Peio Iriarte
Ordezkariak: Laida Oronoz eta Oihana Aranburu
Bertsolariak: Aitor Errazkin, Manu Goiogana, Zuhaitz Olazabal eta Egoitz Zelaia
Epailea: Eneko Sanchez
Gai jartzaileak: Mikel Garmendia, Adrian Arruti eta Xabier Isasi
Ordezkariak: Joxeja Zabalo eta Mikel Garcia
Joango gara saioen berri ematen, jada gainean ditugu eta!
Gainean dugu dagoeneko otsaileko bertso-gaua ere. Aitor Errazkin irundarra, Aitor Albistur oreretarra, Aitor Sarriegi beasaindarra eta Arkaitz Oiartzabal “Xamoa” oiartzuarra ariko dira bertso kantuan, Egoitz Zelaia hendaiarraren aginduetara.
Saioa arratsaldeko 19:30etan hasiko da, Bidasoaldeko Kabigorri Ateneoan. Gogoan izan afaltzen geratzeko aukera paregabea eskaintzen duela Kabigorrik.
Izaten dira ba abenduko egun hotzak. Abenduaren hamarra ere halaxe etorri zen, hotz. Erlaitz Mendi Elkartea txukuntzeko geratu ziren Irunabarreko kide batzuk, eta aperitifak eskaintzen duen goxoarekin berotzen hasi zen eguna.
Oilaskoa, orburuak eta entsaladak bere erritmoa behar omen dute, eta beraien erritmoan ere heldu ziren Zarauzko bertsolariak eta beraien jarraigoa. Epelera hurbiltzen joan ahala, hitz jarioa ere hotzetik epelera igaro zen.
Ordu biak ttanko eta jendea ere Erlaitz Mendi Elkartera iristen hasi zen. Ohartzerako berrogei lagun-edo izango ginen. Mahaiaren itzulian ezarri ziren gehienak, plateren aurrean. Horrelaxe hasi zen bazkari legea. Gosea berdintzeko adinako jana bazen, bederen.
Bertsotarako unea, usaian bezala, kafearekin batera heldu zen. Seikote majoa eta saioa ere bertsotan egiteko prestatu zuen Adrian Arrutik. Bere lehen saioa zuen aurkezle bezala, eta estreinaldiak ez badira ere beti gozoak izaten, goxoan aritu zen Adrian. Gaiak jartzerako orduan, agian, bertsolariek patxada gehiago eskertuko zuten, baina dena egoki joan zen.
Zarauztarrek, Fede eta Urbietaren ahotik sendotasuna erakutsi zuten eta Markelen ideia eta moduek bikain osatu zuten hirukotea. Ez zitzaien ez umorerik, ez sakontasunik falta izan.
Txinguditik ere, hirukote polita zegoen prest kanturako. Andonik bertsotan aspaldi egin zuen jaunartzea, edo agian, bertso-hartzea erran behar genuke. Aspaldi plazak eta jardunak utzirik, berriz ere itzuli zen jende aurrera, beraz, bigarren bertso-hartzea balitz bezala har genezakeen. Errazkinek dotorezia ageri zuen bertso bakoitzean, eta Gotzonek zuhurtzia.
Seikoteak ale ederrak utzi zituen entzule geundenon gozagarri, ideia originalak entzuteko parada izan genuen, eta teknikoki ongi osaturiko lanak. Ezin gehiago eskatu, beraz.
Izaten dira ba abenduko egun hotzak. Ba, sutondorik beroenean bezain goxo izan ginen gu Irungo Erlaitz Mendi Elkartean. Mila esker denei.
Egoitz Zelaia
Abenduaren 10ean Txingudi-Zarautz lagunarteko “bertso-desafioa” jokatuko da, bertso-bazkari formatuan, Irungo Peña kaleko Erlaitz Elkartean, eta 14:00etatik aurrera.
Zarauztik Aitor Urbieta, Beñat Jauregi “Fede” eta Markel Eizagirre ariko dira bertsotan, eta Txinguditik, aldiz, Gotzon Aizpiolea, Andoni Zelaia eta Aitor Errazkin. Gai jartzaile lanetan Adrian Arruti ariko da.
Irunabarreko kideok arduratuko gara otordua prestatzeaz, eta bazkaltzera etorri nahi duzuenok zenbat izango zareten jakinaraztea beste lanik ez duzue izango. Otordurako txartel bakoitzak 15 euro balio du. Etorri nahi duzuenok, mezua bidali edo deitu honako bi telefono zenbakietara:
690 065 826 (Abel) edo 669 366 589 (Egoitz)
Eta gure posta elektroniko helbidera ere idatz dezakezue: irunabar@gmail.com
Anima zaitezte eta izena eman!
Hemen dituzue irakurtzeko moduan 2015-2016 ikasturtean Kabigorriko berts-gauetako bat-bateko saioen aurretik Irunabarreko hainbat kide eta lagunek ondu eta kantatutako bertso-sortak.
 | Urko Etxebeste(e)k Txingudi A taldea aurrera, Gip… bidalketan |
 | Gipuzkoako Herriarte…(e)k M-28, egun betea Donostian eta… bidalketan |
| Txingudi A taldea Oa…(e)k M-28, egun betea Donostian eta… bidalketan |
Irunabar, Irungo bertsoaren bilgunea 