Irunabar, Irungo bertsoaren bilgunea

Archive for the tag “Oarso-Bidasoaldeko Hitza”

07 Eka 2024

“Gaur gaueko fauna”. Jon Luzuriaga Iurramendiren bertsoak, Bidasoko Hitzan.

GAUR GAUEKO FAUNA

Egilea: Jon Luzuriaga Iurramendi

Doinua: Estutzen ez bagaitu

1
Udan dena ez denez
izan arrauna
gaupasak egin ditut
hilero launa;
andre zein jauna
deskriba dezadan gaur
gaueko fauna!

2
Nahiz eta dantzarako
musika jarri
erritmoa jarriatzen
gabiltza larri…
Erakargarri
dantzatzen duenari
hamar puxtarri!

3
-Aspaldiko! Ez duzu
aurpegi txarrik!
Nahiz kalean topatu
sarri xamarrik
ez jo adarrik!
hitza trukatzen dugu
juergan bakarrik.

4
Astinduz instagramak
eta twiterrak
partekatzeko une
onak, ederrak
edo okerrak
dena grabatu nahi du
influentzerrak!

5
Begiratuz txokora
joan den bati,
beti ligatzen duen
hura izaki,
erdi lotsati,
nola egiten duen
inork ez daki!

6
Neretzako oreka
zailtzen ari da;
hark bikoitza edango
zuen guztira
baina begira,
estatuak gehiago
mugitzen dira!

7
Guztiekin hitz egin
behar derrigor
izan Logroño edo
izan Benidorm
pozik dabil hor
ba al da ezagutzen
ez duen inor?

8
Ezin bereizi gari
eta lastoa
nahiz eta umetan zen
formal askoa!
Gaur ze astoa!
Denon aurrean sartu
du arrastoa!

9
Kubatak edan ditu
baliran ura
begira horrek duen
mamu itxura;
nor ote hura?
pertsona zena zonbi
bat bihurtu da

10
Lujanbio denaren
ustearekin,
harroxko dagoenez
bertsotan ekin
edonorekin;
lepotik helduz gero
kontuz horrekin!

11
Ni ez naiz horrelako
pertsonen zale
Juliganak dabiltza
kalerik kale
-“Errealale!”
Lotarako garaia
dudan seinale!

12
Ibili naizen arren
erdi pailazo,
besteenak kontatu
nireez paso!
Ene amatxo,
noizbait esplikatuko
ditut akaso!

Iturria: https://bidasoa.hitza.eus/generoak/iritziak/hitza-irunabar-bertso-sorta-jon-luzuriaga-iurramendi/

Posted in Bertsoak and tagged , | Utzi iruzkina
27 Api 2024

“Hemen duzu nire sorta”. Rafa Rodrigo Perurenaren bertsoak, Bidasoko Hitzan.

HEMEN DUZU NIRE SORTA

Egilea: Rafa Rodrigo Perurena

Doinua: Hemen duzu nire sorta

1.
Hemen duzu nire sorta, zabaltzen dudan lehena
baliteke, baita ere, hau izatea azkena
ez da izango baikorra hartu dezakezu pena
gerorako ez baduzu galdu nahi itxaropena
ez irakurri gehiago hau da nire etsipena
begiratzen dut mundua ta dena da suntsipena
sortzen dugun hondamena bihurtu da eromena
nire ustez alferrik da itxoitea salbamena.

2.
Nonbaitera heltzen gara bukatzen da hor bakea
laguntza eman beharrean prestatzen dugu tankea
berdin zaigu besteen tripa gurea bada betea
txikitzen dugu, baita ere, biodibertsitatea
nahiz ta jakin gure ekintzak sortzen duela kaltea
berdin zaigu, hara joanda uzten dugu soilik kea
Itxita behar genuke ukan munduko atea
barkatu beharko duzu hain gordinik esatea.

3.
Gaur egungo egoera hobe da ez segitzea
ematen du nahi dugula mundu osoa erretzea.
Errudunak bilatzean, beti izango da bertzea
gizakion eragina, izadiaren galtzea
neurriei buruz mintzatzen da, behar dena da hartzea
hiri askoren patua, itsasoan itotzea
ez dugu ikasi zaintzen egoki gure etxea
hoberena litzateke Lurretik desagertzea.

4.
Esan nizun pesimista zela nire diskurtsoa
barkatu bihurtu bada barneratzeko dentsoa.
Belarriak dakuskigu, gertuegi da otsoa
munduko kudeaketan, gure nota: suspentsoa
begia jarri edonon, ta hor plastiko moltsoa
ez esan ongi doala gaur gure unibertsoa
horrelaxe dioena izaten da perbertsoa.
Ados ez bazara, entzun nahi nuke zure bertsoa.

Jarraian bertso-sorta entzungai Rafak berak sorta honentzat sortutako doinuarekin musikatuta:

Hemen jaitsi dezakezu

Iturria: https://bidasoa.hitza.eus/generoak/iritziak/rafa-rodrigo-perurena-hemen-duzu-nire-sorta/

Posted in Bertsoak and tagged , | Utzi iruzkina
23 Mar 2024

“Goizuetako misioa”. Iker Altuna Albisuren bertsoak, Bidasoko Hitzan.

GOIZUETAKO MISIOA

Egilea: Iker Altuna Albisu

Doinua: Manuel Narruk atzo esan dit B

Hemen jaitsi dezakezu

1) Zorionez gu nola gabiltzan
bizimodu hain librean,
hemen dena da posible eta
dena dugu posible han.
Lerroburu hau erreala da,
ez dut aurkitu airean:
“Txintxetak eta iltzeak daude
Goizuetako bidean”.

2) Hainbat ziklistek salatu dute,
garaia da ohartzeko,
errepidean norbait ibili
da jartzen hamaika zepo.
Nik ez dakit ba, baina jendea
dago aspertuta seko,
batek denbora librea hori
egiten igarotzeko.

3) Askok gurpila zulatu zuten
pasa orduko stopa,
eta segidan ulertu zuten
eratutako konplota.
Ondorioa argia dugu,
eta ez al du inporta?
Nonbait gorroto handia dago
txirrindularion kontra.

4) “Nire aurrean ziklista bat, dios!
Sorpresa desatsegina!
Hura lehenbailehen aurreratzeko
egin behar ahalegina!”
Errepideko esperientzia
ez litzateke berdina,
bizi honetan beti presaka
ibiliko ez bagina.

5) Presaren erruz istripu latza
izaten baita askotan,
zenbat ziklista hil ote dira
azkenengo urteotan?
Helburua ez izanagatik
hastea norgehiagokan,
gorrotoa guk behar genuke,
norbaitek izatekotan!

6) Diskurtsoetan diskurtso hau da,
nire ustez, erregea:
“Trafiko-arau guztiak hausten
ziklista dugu trebea!”
Mito faltsuak gezurtatzea
da bertso hauen xedea,
salbuespenak ez duelako
inoiz egiten legea.

7) Esan nahi nuen hori, aizue,
esan ote dut argiro?
Problematika hauek zabaltzen
segituko dut aldiro.
Ai! Usabiaga jauna, ETBn,
azal ezazu geldiro:
Euskal Herriko errepidean
gehiegitan ez da giro!

8) Bizikidetza erronka dela
sarri askotan diogu;
nolanahi ere, hitz horrek ditu
gurean hainbeste zoru.
Errepideko elkarbizitza
nahi baldin bada konpondu,
arazoari denok batera
heldu beharko diogu.

Iturria: https://bidasoa.hitza.eus/generoak/iritziak/hitza-irunabar-bertso-sorta-iker-altuna-albisu/

Posted in Bertsoak and tagged , | Utzi iruzkina
27 Ots 2024

“Trenaren gainbeherari jarriak”. Andoni Agirre Arabolazaren bertsoak, Bidasoko Hitzan.

TRENAREN GAINBEHERARI JARRIAK

Egilea: Andoni Agirre Arabolaza

Doinua: Naparruatik ardo karraio A

Hemen jaitsi dezakezu

1.-
Nik ikusiek martxan jartzean
pentsamenduen gurpila,
barruko senak agindu zidan
idazten hasi nendila.
Gaur bat edonon hasi liteke
zaldi hobearen bila;
azken aldian herren baitabil
Norteko ferrokarrila.

2.-
Gu bizi garen mende berriko
hamaseigarren urtean
estudiante sartu nintzen ni,
urrun, Bizkaiko partean.
Gaintxurizketan trenbide-lanak
hasi berriak artean,
apenas ezer aurreratu da
ordutik orain artean.

3.-
Hamaika aldiz ikusia naiz,
Landetxakoa izaki,
fedea nola itzaltzen zaion
geltokian zain den bati.
Amore eman edo zain segi
sarri ezin erabaki;
tren zaharra horra noiz helduko den
Jaungoikoak’e ez daki.

4.-
Lanak medio lehen agindua:
“Bi trenbideetan bat itxi!”
Orduz geroztik gure auzoan
ezin gara lasai bizi.
Jandako hitzak pilatuz beste
jandako hainbeste hitzi,
hor behar zuten hamar trenetik
zortzi ez dira iritsi.

5.-
Zer gertatzen da besterik gabe?
Mundu honetan ezer ez;
zerbait gertatu dadin baldintzak
ezarri ohi dira aurrez.
Gaur egunean nola daukagun
gure tren zaharra negarrez
laurogei urte atzera joanda
ulertu daiteke errez.

6.-
Begira jarri Euskal Herriko
trenbide zaharren mapari;
Urolan, Deban zein Bidasoan
trenak baziren ugari.
Haiek ixteko asmo gaiztoaz
bazen zenbait agintari;
esaten zuten: “Trenez ez dabil
behar beste bidaiari!”

7.-
Baina ixteko zio gorderik
hobe ez utzi aparte:
automobilen etorrera zen
trenbide haientzat kalte.
Errepideak eraikitzeko
ze antsia ta ze arte;
etorkizuna trenak direla
konturatu ziren arte.

8.-
Barru-barrura sartu zitzaien
abiaduraren harra;
hura zen mendi, zelai ta baso,
dena suntsitu beharra!
Begiak itxi eta dirutza
xahutu ordez barra-barra,
Lehendik zeudenak konponduz gero
ez zen izango hain txarra.

9.-
Gauza jakina izanagatik
asko ados ez dagola,
harrak barrua jan die eta
beste denak bost ajola.
Martxa honetan, berandu gabe,
trenbide zahar haiek nola,
agintarien utzikeriak
hilko du Irun-Brinkola.

10.-
Nafar itzainen zoritxarrean
heldu zenari lehenago
garai bateko perra berriak
herdoildu zaizka zeharo.
Txirrita bera txunditu arren
ulermenetik harago,
zaindu ezean iraungo duen
berrikuntzarik ez dago.

Iturria: https://bidasoa.hitza.eus/generoak/iritziak/hitza-irunabar-bertso-sorta-otsailak23/

Posted in Bertsoak and tagged , | Utzi iruzkina
31 Urt 2024

“Urbasan”. Jexuxmari Mendizabal Iraola «Bizargorri»-ren bertsoak, Bidasoko Hitzan.

URBASAN

Egilea: Jexuxmari Mendizabal Iraola “Bizargorri”

Doinua: Maritxu nora zoaz I

Hemen jaitsi dezakezu

1. Urbasan maldan goitti
putz eta ufaka
gizon gazte koadrila
doa tiki-taka…
Bero zitalak jota
ezinez tiraka,
barrenak egartsuak,
soinak sobran praka.

2. Bidoitza zabaldira
iritsi orduko,
iturritxo bat bertan,
guztiak lekuko!
Hango inork inori
zer ba aginduko…?
Ur trago luuuze bati
ezin egin uko.

3. Itoka ziren denak
iturrira murgil,
baina hara artzain bat
oihuz hasi hurbil:
«Etzazuela hortik
tantatxo bat ur bil,
hamaika utzi du-ta
hilzorian zurbil!».

4. Txangolari apainek
orduan: «¿Qué?», Zer, zer?
Ez zioten ulertzen
artzainari ezer.
«Ez da edangarria,
monsieur eta mister.
Señoras y señores,
alde hortik laister!!!».

5. Haien albo ondora
inguratuz gero:
«Alde hemendik, ospa!
Deus ez edan, gero!
Hilak aleka baina,
gaixoak astero
utzi ditu iturri
honek honezkero».

6. Iturriaren jiran
makur belauniko,
inork deus ez ulertzen
haren ahotik, o…!?
Zutik jarri zen gizon
plantako mutiko,
artzainari zuzenduz
jauntxo zerutiko:

7. «De Madrid somos todos:
Nacho, David, Toño…
En la cabeza “PP”
llevamos de moño.
Háblenos en cristiano,
espainolez, koino,
que estamos en España,
basko, errekoino!».

8. Artzainak bi besoak
atzean gordeta:
«Que beban despazito,
ahoa erreta;
despazio, despazito,
hotza dator eta.
Sin prisa…, todo el día…
Zuentzat erreka!».

Iturria: https://bidasoa.hitza.eus/generoak/iritziak/hitza-irurabar-bertso-sorta-urtarrilak26/

Posted in Bertsoak and tagged , | Utzi iruzkina
02 Urt 2024

“Milesker, Kote!”. Adrian Arruti Bernadeten bertsoak, Bidasoko Hitzan.

MILESKER, KOTE!

Egilea: Adrian Arruti Bernadet

Doinua: Herri txikien negu gordina

Hemen jaitsi dezakezu

1
Abenduaren hamabostean,
hala duzu iragarri,
erretiratu zara aritu
ostean buru-belarri.
Merezitako esker keinurik
ez denez jasotzen sarri
nahi nizkioke zure lanari
hainbat bertso xume jarri.

2
Alde batetik, biblioteka bat
sortu duzu aldez alde.
Zenbait ikerlan historikoren
jabea zara, bestalde.
Ez dakit ongi jabetu garen,
behin eginda zure galde,
zenbat lan egin duzun gaurgero
Hondarribiaren alde.

3
Itsas Etxetik Zuloagara,
mandatuari jarraiki,
hogeita hamasei urtean zehar
lana egin duzu, baiki,
biblioteka bat ez baita inoiz,
aditu gisa zenbaiti,
eskuizkribu eta liburu
zaharrez soilik eraiki.

4
Gehiago dela konforme gaude,
baina gehiago zer da ba?
Erakusketa, tailer, liburu
eta ekimen bailara.
Zenbat hitzaldi, zenbat aurkezpen…
guztia Zuloaga da.
Gure kapital kulturalaren
hornitzaile izan zara.

5
Zeregin hori beste edonork
burutu zezakeenik
gauza jakina da eta ez dut
esango hala ez denik.
Baina horrela gertatu balitz
ikusi nahiko nuke nik
zuk adinako elegantziaz
egin ahalko zuenik.

6
Baleen ehizaz Hondarribian
nahiz Konbentzio guduaz,
Hondarribiko itsaslapurraz
zein baserrien munduaz…
inor kezkatu ez balitz kontu
horien iturburuaz
nekez jakingo genuke ezer
bizi dugun inguruaz.

7
Herri bat ezin da sortu bere
historia jakin gabe
zure alea eskaini duzu
izan dadin burujabe.
Hondarribitik harago ere
ez da pasa oharkabe
hori ulertu dugun guztiok
oso eskertuta gaude.

8
Sorta zintzoa eskribitu nahi
nizun, baina hala ote?
Ingurukoek, behintzat, hitzez hitz
gauza berbera diote.
Merezi duen horri aitortza
egin behar genioke
salbuespena ez zara eta
milesker, bihotzez, Kote!

Iturria: https://bidasoa.hitza.eus/generoak/iritziak/adrian-arruti-bernadet-milesker-kote/

Jarraian bertso-sorta entzungai Peio Etxeberriak musikatuta:

Hemen jaitsi dezakezu
Posted in Bertsoak and tagged ,, | Utzi iruzkina
03 Abe 2023

“Ibaitik itsasora”. Igauri Lopetegi Amostegiren bertsoak, Bidasoko Hitzan.

IBAITIK ITSASORA

Egilea: Igauri Lopetegi Amostegi

Doinua: Kubako gerrarena

Hemen jaitsi dezakezu

Bertso berriak jarri nahian, bai,
baina jartzekotan zeri?
Nik ezin diot hitzik eskaini
honi ez beste ezeri.
Nahiz eta suerta dakidakeen
esplikatzea zailegi,
beste ezertaz hitz egitea
gaur egun ez da zilegi.

Mendebaldetik kontrolaezin
zen ekialde hurbila.
Galtzada baten bila zebilen
kapitalaren gurpila.
Han Palestina hautatu zuten
bidea izan zedila,
besteren etxe zena ibiliz
euren interesen bila.

II. Mundu Gerra pasata,
Europan hitz hauek saldu:
“Lur sakratuan bizi nahi badu
inork aukera orain du.
Holokaustoko zauri guztiak
baietz han ongi orbaindu!”
Naziek sortu kaltea, eta
palestinarrek ordaindu.

Sionismoa babestuz joan zen
hara kolono bailara,
Israel sortuz, estatu on bat,
Europakoen mailara,
NATOrentzako base berri bat
bere interesetara.
Armada duen estatu baino
Estatudun armada da.

Harrezkeroztik palestinarrek
abiaturik borroka,
eurek hil arte inor hiltzeak
ez zuen asko inporta.
Biolentoa da orain ibaia
gainezka, harro, dator ta,
ta inork ez du aipatzen hura
estutzen duen arroka.

Palestinaren ta Israelen
artean dago ataka
Ta negoziatu dezaten askok
ematen dute matraka.
Negoziaketan negoziorik ez
duenak ezer ez dauka,
noiztik aritzen dira hizketan
lepoa eta ezpata?

Mendebaldeko biztanle asko
nahiz eta gaiaz kezkatu,
eta bakean bizi daitezen
estatu bana eskatu,
Sionistei esan zitzaien
sortzeko, ba, bi estatu!
Baina, gero lur zati bakarra
ere ez zuten askatu.

Ondo babestu izanagatik
Israelgo potentzia,
Espainiako presidentea
ezkerrak du hautetsia.
Ez naiz hasiko hemen salatzen
zer den inkoherentzia,
norberak jasan beharrekoa
da norbere kontzientzia.

Hamaika mila hildako dira,
egunetik egun gora.
Hemendik ere bultzatu ezik
ezin iritsi inora.
Oh, Palestina, lur zanpatua,
inoiz libre izango da,
Mendebaldeko kateetatik
ta ibaitik itsasora.

Iturria: https://bidasoa.hitza.eus/generoak/iritziak/hitza-irunabar-bertso-sorta-azaroak24/

Jarraian bertso-sorta entzungai Peio Etxeberriak musikatuta:

Hemen jaitsi dezakezu
Posted in Bertsoak and tagged ,, | Utzi iruzkina
03 Aza 2023

“Morroi digitala”. Xabier Isasi Balanzategiren bertsoak, Bidasoko Hitzan.

MORROI DIGITALA

Egilea: Xabier Isasi Balanzategi

Doinua: Kantatzera noazu II

1
Munduko aldaketak
ez dira makalak
asko, handiak eta
gainera zabalak
denen eskura dauden
lanabes itzelak,
adibide moduan
sare sozialak.(bis)

2
Berrien berriena
hasi ezin buka.
Jende andana dabil
lar aztoratuta.
Azalduko dizuet
bertsoz kantatuta,
zer pizti klase bizi
saretan bilduta. (bis)

3
Ekaingo gizakia
ei neandertala
Sapiens espezieko
itxuraz normala.
Haiengandik gatoz gu,
nola edo hala,
eta guri jarraiki
morroi digitala. (bis)

4
Esnatu bezain pronto
ireki du Twitter.
Glovo gosarirako
oraindik betoker,
tximak ondo orraztu
eta ondoren zer?
Tik-Tok ikusi eta
lanerako Uber.(bis)

5
Lantokira iritsi,
zuzen komunera
WhatsAppek joka tope
mezu isurbera
tripaldeak darabil
kaka goitik behera
segapototik ere
dator kaka bera. (bis)

6
Kamiñeroarenak
su eta galipot,
neguan epel baina
udan beroak pot,
lan etenaldietan
begiratu ten top,
hamar onenen bila
ireki du Tik-Tok (bis)

7
Lanetik etxeraino
makina bat gizon,
bakoitzak bere kasa
nork bere smartphone,
batzuk hizketan edo
erosten edonon.
Dendarik handiena
Bezosen Amazon (bis)

8
Getariko gezurra
Twitterren egia.
Egia biribila:
laua da Ludia.
Ludia laua denez,
Merkurio bia.
2ak bitan esan du
albisbistegia (bis)

9
Morroi digitalak du
sinesteko sena.
Sena Parisekoa
ibaia izena.
Izena Google-k zart
dakargu zuzena.
Zuzena nola izan
galtzen den maizena? (bis)

10
Maria, Manu, Mamen
mutil edo dama
marmarrean matraka
berekin darama
amaren ama edo
amatxi, amama.
Atzo ikusi zuen
aman Instagrama. (bis)

11
Saga, sega, Zangozan
edo baga biga
gogobakoen leiha
gugan dago liga.
Ez du bereizten zer den
gingondoko ginga,
konputagailuko bit,
mega edo giga. (bis)

12
Ustez taldeko edo
indibiduala.
Pantailari josita
bizi nahi du hala,
mundutik joateko
bide graduala.
Sare sozialeko
mundu birtuala. (bis)

13
Klik han eta klik hemen
arriskuz arrisku,
leihatila irekiz
egiten du txistu.
Nora doan ez daki
dariola listu;
Komunan galduz gero
GPSa piztu! (bis)

14
Nabigatzen badaki
baina txarto iger.
Programa_abiatzeko
klikatu bi bider.
Zenbat aldeko eta
beste hainbat hater?
Zer lortu nahi duenik
dabil ezin uler. (bis)

15
Influentzer moduan
ez du eraginik
maitasunaren grina
galdu du jadanik
aberasteko ere
ez itxaropenik
ez diru, ez sonarik
eta ez lagunik. (bis)

16
Morroi digitalari
dena zaio muger.
Azken orduak ere
dena dakar uher,
ohekide nahi luke,
gozatu zeozer.
Kaixomaitia edo
gutxienik Tinder. (bis)

Iturria: https://bidasoa.hitza.eus/generoak/iritziak/206338/

Posted in Bertsoak and tagged , | Utzi iruzkina
03 Urr 2023

“Hitzak eta ekintzak”. Jon Luzuriaga Iurramendiren bertsoak, Bidasoko Hitzan.

HITZAK ETA EKINTZAK

Egilea: Jon Luzuriaga Iurramendi

Doinua: Maitatzen zaitudalako

Hemen jaitsi dezakezu

1
Hire baloreek eta
printzipio politek
printzipioz ia ezin
hobeak ziruditek
baina buelta bat gehiago
eman behar genikek
hire ekintzek berdina
erakusten al ditek?

2
Gobernuaren jarrera
hain baldar hain ulergaitz
berotegi efektuaz
hausnartu izan duk maiz
baina bazkal ordurako
itzuli hadin garaiz
goizero lanera kotxez
bakarrik joaten haiz.

3
Hala pentsatzen duk sare
sozialen kasutan:
“Zergatik izaten dute
haurrek Tik Toka sutan?
Filtroa galduko ditek
hango filtro faltsutan…”
Baina Twiterren sartzen haiz
eztabaida antzutan.

4
Bai garaian garaikoa
bai kilometro zero
ideiekin omen hago
erabat ados edo
entzun behar huke hori
aipatu bakoitzero:
“Zumoa eta kafea
gosaltzen duk goizero!”.

5
Esna nahi dituk herriko
kaleak eta plazak
saltoki txikiek behar
omen ditek ardaztzat.
Hala ere merkeago
eros ditzaan galtzak
Amazon Primen harpide
urteak daramatzak.

6
Nola daukagu bizitza
hain indibiduala?
Auzolana aipatzen duk
elkarlana bezala,
baina pisukideekin
ikaslea hintzala
han hozkailuan bakoitzak
zian bere apala.

7
Bidasoako gorpuak
hain hotzak begitandu
zitzaizkianetik izan
duk zer heureganandu.
Nahiz tabernan lagunekin
afera sakon landu
sekula ez haiz etorkin
batekin harremandu.

8
Hi euskalduna omen haiz
bai buru bai ukabil
zazpiak herri bat gaituk
esanagatik abil
EITBren diskurtsotik
oso urrun ez habil
Maule baino gertuago
sentitzen baituk Madril.

9
Nola ez feminismoa
bizitzen duk bertatik
zein duan hire tokia
nonbait argi daukak hik,
gizontasunen tailerrak
goraipatuagatik
inoiz ez haizela joango
ederki asko dakik.

10
Kezkatzen haute hamaika
jarrera desegokik;
ustez ez izan arren deus
gizon homofobotik
hausnarketa sakonago
bat ez ote dagokik?
Hatz txikia ere ez duk
sartu ipurtzulotik.

11
Nahiz eta osatzen hauten
kontraesan anitzek
oraindik jende askori
atzerakoi deritzek;
nahiz eta bestelakoa
dioten hire hitzek
pertsona ez al zuten ba
definitzen ekintzek?

Iturria: https://bidasoa.hitza.eus/generoak/iritziak/jon-luzuriaga-iurramendi-hitzak-eta-ekintzak/

Jarraian bertso-sorta entzungai Jone Garmendia Castañosek musikatu eta kantatuta:

Hemen jaitsi dezakezu
Posted in Bertsoak and tagged ,, | Utzi iruzkina
10 Ira 2023
1 Comment

Ikasturte honetan ere bailarako hedabideekin elkarlanean ariko gara

Irunabarren helburuetako bat bertsoa inguruko hainbat txokotara helaraztea ere badenez, badira zenbait ikasturte bailarako hedabideekin elkarlanean ari garela.

Hasi berri dugun 2023/24 hau bosgarren ikasturtea dugu Bidasoko Hitzarekin elkarlanean. Irailean hasi eta ekaina bitarte, hilero, eta hilabeteko azken ostiraletan, Txingudiko bertso-eskoletako kide batek bertso-jarriak argitaratuko ditu aipatutako aldizkariko papereko edizioan, eta egun gutxi batzuk igaro ondoren, eskuragarri izango duzue argitalpen hori bera baita bertsio digitalean ere. Nola ez, Irunabarren webgunera ere ekarriko ditugu bertso horiek guztiak.

Irunero aldizkariarekin hasitako elkarlana oraindik lehenagokoa da. 7. ikasturtez jarraian, Txingudiko bertso-eskoletako kideren baten bertso jarriek argia ikusiko dute hilero. Iruneroren kasuan, hilabete hasieran argitaratuko da elkarlanaren emaitza, eta kasu honetan ere paperezko edizioan zein bertsio digitalean egongo da ikusgai. Ikasturtea urria hasieran hasi eta ekainean amaituko da, eta Iruneroko sorta guztiak ere Irunabarren webgunera ekarriko ditugu.

Horretaz gain, osagarri modura, idatzitako sorta hauek musikatzen direnean ere eskuragarri izango dituzue webguneko argitalpenetan zein Ivoox-eko gure kanalean (harpidetu zaitezte!). Gero eta gehiago zarete elkarlan hauetako bertso-sortaren bat musikatzera animatu zaretenak. Ikasturte honetan ere animatuko bazinate plazer handiz jasoko genituzke zuek musikatu eta kantatutako bertso-sortak irunabar@gmail.com helbidean.

Hona hemen pasa den ikasturtean argitaratu eta musikatutako zenbait bertso-sorta:

  • “50 urte”, Abel Zabala Elizazuk 2022ko abenduan Iruneron argitaratu eta Peio Etxeberriak musikatutako bertso-sorta:
Hemen jaitsi dezakezu
  • “Bi belaun”, Jexuxmari Mendizabal Iraola “Bizargorri”-k 2022ko azaroan Bidasoko Hitzan argitaratu eta Peio Etxeberriak musikatutako bertso-sorta:
Hemen jaitsi dezakezu
  • “Erlauntzan barrena”, Jon Luzuriaga Iurramendik 2023ko martxoan Iruneron argitaratu eta Jone Garmendia Castañosek musikatutako bertso-sorta:
Hemen jaitsi dezakezu

Posted in Berriak,Bertsoak and tagged ,,,,,,,

Post Navigation

← Older Entries
Newer Entries →