Irunabar, Irungo bertsoaren bilgunea

15 Ira 2019
2 Comments

2019-2020 ikasturteko izen ematea zabalik

Txingudiko bertso-eskolan izena eman nahi baduzu, oraintxe duzu aukera, hastear baita 2019-2020 ikasturtea.
Galdera edo zalantzarik baldin baduzu, irunabar@gmail.com posta helbidera idatz dezakezu lasai asko, edo taldeetako arduradunen baten telefono zenbakira hots egin.

TALDEAK:

1.- GAZTETXOEN TALDEA: astelehenero, 17:00-18:00; Bidasoko AEK Irungo Euskaltegian. Harremanetarako: (0034) 669 366 589 -Egoitz-.

2.- BAT-BATEAN I taldea: astelehenero, 19:00-21:00; (bilgunea zehaztu gabe dago oraindik). Harremanetarako: (0034) 669 366 589 -Egoitz-.

3.- BAT-BATEKORAKO HASTAPENAK taldea: asteazkenero, 19:00-21:00; (bilgunea zehaztu gabe dago oraindik). Harremanetarako: (0034) 669 366 589 -Egoitz-.

4.- BAT-BATEAN II taldea: ostegunero, 19:30-21:30; Hondarribiko Jaizubia auzoko auzo-elkartean. Harremanetarako: (0034) 690 06 58 26 -Abel-.

5.- BERTSO TAILERRA: hamabostean behin, 19:00-20:30; Bidasoko AEK Irungo Euskaltegian. Harremanetarako: (0034) 685 72 75 39 -Aitor- / (0034) 638 32 69 70 -Adrian-.

This slideshow requires JavaScript.

Posted in Berriak,Ikastaroak and tagged ,,
27 Abu 2019
1 Comment

Hondarribiko Sagardo Eguna [2019/08/17]

Eguraldiaren eraginez, uztailaren 27an egitekoa zen Sagardo Eguna bertan behera geratu zen. Azken momentuko erabakia izan arren, Sagardo Eguna bera bertan behera ez uzteko asmo irmoa zegoenez, abuztuaren 17an jarri zuten hitzorduan antolatzaileak. Bigarren hitzordua arrakastatsua izan zen oso, eguzkiak galanki lagunduta, berotasunari aurre egiteko sagardoz zintzurrak bustitzeko aukera paregabea izan genuen eta.

Lehen deialdirako prestatutako ekintzak ere burutu ziren bigarren honetan, baita bertso saioa ere. Bertan aritu ziren, Manu Goiogana eta Igauri Lopetegi irundarrak eta Egoitz Zelaia hendaiarra. Ordu erdi inguruko saioa burutu zuen hirukoteak librean jaialdiari hasiera emateko.

Argazkilaria: Adrian Arruti

Posted in Bertso saioa,Kronikak and tagged ,,,
20 Abu 2019
1 Comment

Moskuko jaiak 2019

Azken urteetan bezala, aurtengo Moskuko jaietan ere bi bertso saio antolatu ditu Irunabar, Irungo bertsoaren bilguneak, Moskuko jai batzordeko kideekin elkarlanean: bertso-poteoa eta bertso saioa.

Abuztuaren 10ean izan zen lehena, herri bazkaria eta gero, arratsaldeko 17:00ak inguruan. Manu Goiogana irundarra, Maddi Ane Txoperena lesakarra eta Egoitz Zelaia hendaiarra aritu ziren auzoko tabernetan barrena kantuan. Giro bikaina ipini zuten, eta gustura geratu ziren bertaratutakoak.

Bertso saioa, berriz, igandean izan zen, abuztuaren 11n. Eguraldiaren baimena garaiz iritsiko ez ote zen beldur ibili ondoren, azkenean plazan bertan egin zen bertso saioa, eta Alaia Martin oiartzuarra, Igor Elortza durangarra eta Miren Amuriza berriztarra eta Aitor Sarriegi beasaindarra aritu ziren kantuan Egoitz Zelaia hendaiarraren esanetara. 18:30ean hasi zen saioak seriotik beste eduki zuen umoretik, eta bikain asmatu zuten 4 protagonistek Egoitzek agindutako lanak betetzen. Saioa amaitzerako plaza ere jendez beteta zegoela agurtu zituzten bertsolariek Moskuko jaiak, aurtengoz.

This slideshow requires JavaScript.

Posted in Besterik and tagged ,,,,,,,
24 Uzt 2019

Hondarribiko Sagardo Egunean bertsolariak [2019-07-27]

Uztailaren 27an Hondarribiko Sagardo Eguna izango dela eta, Txingudiko Bertso-eskolako Igauri Lopategi, Egoitz Zelaia eta Manu Goioganak libreko bertso saioa eskainiko dute 17:30etatik goiti.

Kupelak 18:00etan irekiko dituzte eta 21:00ak bitarte. Azken urteetan bezala, Gipuzkoa Plazan izango da ekitaldia, Muara Kultur Elkarteak antolatua.

Animatu, ederra izango da eta!

 

Posted in Berriak,Bertso saioa and tagged ,,, | Utzi iruzkina
17 Uzt 2019
1 Comment

Haziako Bertso Bazkariko kronika [2019-07-01]

Hazia Kultur Elkarteak bertso bazkaria antolatu zuen, uztailaren lehenean, herriko jaiei amaiera polita eman nahian.

Bertan aritu ziren Oihana Bartra santutxuarra eta Irunabarreko kide den Egoitz Zelaia hendaiarra. Bazkarira 45 lagun hurbildu ziren eta hasieratik nabaritu zen giroa bero zegoela.

Sukaldariek bete betean asmatu zuten menuarekin, hasierako entsaladatik hasita, txerri ukondoarekin jarraiki eta xamingoxoarekin bukatuta.

Bazkaria amaituta, eta kafe eta kopak eskatuta, ekin zioten bertsolariek libreko saioari eta hasieratik nabaritu zen behin eta berriz egingo zuela eztanda. Bertsolariak fin ibili ziren uneoro batak besteari zein entzuleei ere ziria sartuz. Gerturatutakoek, ederki aski erantzun zioten bikoteari barre algara eta txalo zaparraden bitartez.

Dena zoragarria izan da eta bertsolariak ere oso esker oneko egon ziren entzule eta antolatzaileekiko.

This slideshow requires JavaScript.

 

Posted in Bertsoak,Kronikak and tagged ,,
02 Uzt 2019
1 Comment

Irati Alcantarilla Berritxu Sariketan garaile [2019-06-28]

Pasa den ekainaren 28arekin egin zen Berrituako Udalak antolatzen duen Euskal Herri mailako bertsolari gazteen Berritxu Saria. Bertan izan ziren Bittor Altube, Maite Sarasola, Aroa Arrizubieta, Nahia Ibarzabal, Garazi Navarro Ugarteburu, Aitor Tatiegi, Ekiñe Zapiain Arlegi eta Irati Alcantarilla.

Saioak bi zati izan zituen, bata ofizioka eta bigarrena bakarka. Bigarren zatian, lehen zatian ongien aritu ziren lauek baino ez zuten parte hartzerik izan.

Gauzak horrela, Iñigo Gogenola, Aitor Basterretxea, eta Ander Txakartegi epaileek; Bittor Altube, Aroa Arrizubieta, Aitor Tatiegi eta Irati Alcantarilla pasatzea deliberatu zuten.

Saioaren amaierarako Altubek 196puntu bildu zituen, 198 Arrizubietak, 207 Aitor Tatiegik eta 210 Irati Alcantarillak.

Zorionak, Irati!

 

Posted in Berriak,Bertsoak,Kronikak and tagged ,
21 Eka 2019

Bertso Bazkaria Hazian [2019-07-01]

Irungo jaiak direla eta, Hazia Kultur Elkarteak egitarau berezia antolatu du ekainaren 21an hasi eta uztailaren 1a bitarte. Taberna egunero irekita egoteaz gain, asteburuetan sukalde zerbitzua izango da. Ekainaren 26an Hurih (Pitxi eta Olaia) musika talde lesakarrak kontzertua eskainiko du, eta jaiak ongi amaitzeko, uztailaren lehenean Bertso Bazkari ederra antolatu du Haziak Irunabarrekin batera. Bertsotan, Oihana Bartra bilbotarra eta Egoitz Zelaia hendaiarra arituko dira. Sarrerak Hazian bertan daude salgai, eta telefono bidez ere eska daitezke.

Ondoko irudian xehetasun guztiak.

Posted in Berriak,Bertso saioa,Bertsoak and tagged ,,, | Utzi iruzkina
20 Eka 2019

“Kabitik”, Kabigorriko bertso-gauei buruzko irratsaioa, Antxeta Irratian

Hilero elkarlanean antolatzen ditugu bertso-gauak Irunabarrek, Irungo bertsoaren bilguneak eta Kabigorrik, Bidasoaldeko Ateneoak. Ekainean joan zen 6. ikasturteko azken saioa: hirurogeita hirugarrena. Baina  seigarren ikasturte honek berezitasun nabarmen bat izan du aurrekoen aldean: Kabitik irratsaioa.

Izan ere, ikasturte honetan ostegunetako Kabigorriko bertso-gauek irratsaio paraleloa izan dute Antxeta Irratian. Kabigorriko bertso saioak oinarri hartuta, ordubete inguruko irratsaioak ondu dituzte Gotzon Aizpioleak eta Beñat Elosegik, joan den urteko urria-azaroan hasi eta ekainera bitarte. Azken irratsaioa atzo grabatu zuten. Eta San Juan egunez emango dute, ekainaren 24ean, iluntzeko 21:00ak aldera.

Gogoan izan Antxeta Irratia zuzenean entzuteko dialak: 90.5 / 89.7 / 105.8

Datorren ikasturtean izango ditugu bueltan Beñat eta Gotzon, gustura asko aritu omen dira-eta esatari lanetan (aurretik ere eskarmentua bazuten). Teknika lanetan Antxeta irratiko Koldo Nausia eta Maia Muruaga izan dituzte lagun Beñatek eta Gotzonek.

Kabigorriko saioak 2019ko urrian hasiko badira ere, irailean abiatuko omen da Kabitik, eta esatariek aurreratu digutenez, saio berezia izango omen da datorren ikasturteko lehendabizikoa.

Post honetan bertan joango gara 2018-2019 ikasturteko Kabitik guztien grabazioen estekak batzen:

Bestetik, ekaineko saioan egindako argazkitxo batzuk:

 

Posted in Berriak,Bertsoak,Kronikak and tagged ,,, | Utzi iruzkina
18 Eka 2019

Mendeluko jaietan izan ginen kantuan

Txingudiko Bertso Eskolako hiru kide aritu ziren  aurten ere kantuan Mendeluko jaietan: Igauri Lopetegi, Adrian Arruti eta Aitor Errazkin. Maiatzaren 18an izan zen saioa, 13:30ak aldera. Eguraldia ez zuten lagun izan; bai, ordea, entzule multzo zintzo askoa. Antolatzaileen harrera ere, betiko moduan, punta puntakoa. Eskerrik asko bihotz bihotzez Mendeluko jaien antolatzaileei. Plazera da urtero zuenera hurbiltzea.

Adrian eta Aitor bertso eskolako kideak Gotzonerekin, Mendeluko jaien antolatzaileetako bat.

Posted in Kronikak and tagged ,,, | Utzi iruzkina
18 Eka 2019

Irunabar eta Iruneroren arteko elkarlana, 2. ikasturtez jarraian

Amaitzear den ikasturte honetan ere, bigarrenez jarraian, Irunabar eta Irunero aldizkariaren arteko elkarlanak emaitza politak utzi ditu.

Elkarlan honen helburu nagusia, aspaldian indarra galtzen ari den idatzizko bertso-sorten generoari bultzadatxo bat emateaz gain, Txingudiko Bertso Eskolako kideek idatzitakoei ikusgarritasuna ematea da. Honela, hilero Txingudiko Bertso Eskolako kide ezberdin batek sorta bat idatzi du gai, bertso-kopuru eta neurri librean, ondoren Irunerok hileko lehen aldizkarian argitaratzeko.

Ikasturte honen laburpen modura, Iruneron argitaratzeko idatzi diren sorta ezberdinen bilduma dakarkizuegu jarraian:

Urria |   Bertso berriak 2018-2019 ikasturte berriari jarriak | Aitor Errazkin Vicente

01_urria_BBIBJ_Aitor2

 

Azaroa |   Hegazti migratzaileak | Egoitz Zelaia

02_azaroa_Hegazti Migratzaileak_Egoitz

 

Abendua |   Irungo Euskaraldia | Adrian Arruti Bernadet

03_abendua_irungo_euskaraldia_adrian

 

Urtarrila |   Etorri berriak | Xabier Isasi Balanzategi

04_urtarrila_ETORRI BERRIAK_Isasi

 

Otsaila |   Ametsak eta desirak | Mikel Garmendia Lekuona

05_otsaila_ametsak eta desirak _Mikel

 

Apirila |   Jokua | Igauri Lopetegi Amostegi

06_apirila_jokua _Igauri

 

Maiatza |   Lurtarrak | Andoni Zelaia

07_maiatza_Lurtarrak_Andoni

 

Ekaina |   Ea ulertzen den | Manu Goiogana Bengoetxea

08_ekaina_ea ulertzen den_Manu

Irakurri ahal izan dituzuen sortak gustuko izango zenituztelakoan, ea datorren ikasturtean ere ekimen honi jarraipena emateko aukerarik dugun, irakurleen eta idazleen gozamenerako.

Posted in Besterik | Utzi iruzkina

Post Navigation

← Older Entries
Newer Entries →