Bete egin zen atzo Kabigorri. Aurreikusi bezala, bertso-tailerreko lagunak bertan izan ziren, eta haiek eman zioten hasiera saioari, Joxe Mari Lopetegiren “Semeak amari” bertso sorta kantatzeko gonbita eginaz bertaratutako jendeari. Ondoren, Oinatz Mitxelenak eta Eneko Sanchez gai jartzaileek hartu zuten saioaren gidaritza, eta umorez eta maisutasunez bertsolari sarda bat jarri zuten lanean. Umoretik joan zen saioa, eta entzuleak eskertu zuen hori. Kabigorriko mahaietan bazen, gainera, nahikoa pintxo goxo eta sagardo, Kabigorriren eta Irunabarren kontura joan zirenak. Eta halaxe igaro genuen arratsa, umore eta lagunarte ezin hobean.
Mila esker bihotz bihotzez Eneko eta Oinatzi, hartutako lan eta pazientzia eskergarengatik; Kabigorriri, gurekin jostatzen segi nahi izateagatik (esker bereziak Naroari, atzoko partez); eskualdetik kanpo gerturatu zineten bertsolari guztioi: Alaia Martin, Julen Zelaieta, Arkaitz Oiarzabal “Xamoa”, Patxi Castillo, Haritz Casabal eta Beñat Gaztelumendi. Eta, nola ez, zuri, entzule; zure babes, txalo, arreta eta irririk gabe, gureak ez luke zentzurik izango.
Jaso besarkada bana, eta urrira arte,
Irunabar, Irungo bertsoaren bilgunea
Bertso-tailerrak bertso-ibilaldia antolatu du ekainaren 10erako. Gaia, Joxe Mari Lopetegi bertsolaria. Arratsaldeko 18:30etarako egin dute lehendabiziko deialdia, Irungo herriko etxean (bigarren deialdia 19:00etan, Irungo Atsegiñan, berandu datozenak batu daitezen), eta hona bertso-tailerrekoek proposatu duten ibilaldia: herriko etxea, Atsegiña, EKT, Deportivo taberna,”Lopetegi-etxeak” (Erlaitz kalea) eta Santiago kaleko 1.goa (Joxe Mariren jaiotetxea). Sei toki hauek, besteak beste, garrantzia berezia izan zuten Joxe Mari Lopetegiren obran eta bizitzan, eta bakoitzean bertso-sorta bat kantatzea proposatuko dute tailerrekoek, eta eurak arduratuko dira, gainera, bertso sorta horiek denboran eta testuinguru historikoan kokatzeaz, bertaratutakoek Joxe Mari Lopetegiren hainbat aspektu ezagutu ditzaten.
Bertso-tailerrekoek animatu egin nahi dute jendea bertso-kalejira honetara, eta, batez ere, proposatutako geldiuneetan bertsoak kantatzera. Izan ere, bertso-paperak banatuko dizkiote jendeari, eurekin batera kanta dezaten.
Hainbatetan bezala, bertso-tailerrekoek Auntxa trikitixa eskolako ikasle-irakasleak izango dituzte lagun, bi elkarte hauen arteko hartu-eman onaren seinale. Irunabarretik ez gara sekula aspertuko Iñaki Aranaga eta haren ikasleek egiten duten lana eskertzen. Bejondaiela!
Ekimen honen berri bihar emango dute bertso-tailerreko kideek, ekainaren 2ko Kabigorriko bertso gauean.
Berezia izango da 2015-2016 ikasturteko Kabigorriko azken bertso-gaua. Hiru urtez jarraian antolatu ditu bertso-gauak Irunabarrek, Irungo bertsoaren bilguneak, eta 27.a izango da datorren ostegunekoa. Antolakuntza elkarlanean burutu izan dugu, Kabigorri Bidasoaldeko Ateneo
arekin batera, eskurik esku, eta inguruko bertsolarien borondate onari esker, bistan da, prest egon izan baitira afari-truke kantura etortzeko. Hala ere, Kabigorrira kantura etorri diren bertsolari zahar zein gazteek, guztiek azpimarratu dute zeinen plaza ederra, erosoa eta esker onekoa den Kabigorrikoa; hori, inongo zalantzarik gabe, ez da Irunabarren meritua, saio oro bildu zareten entzuleena baizik; ostegunero nahiz tarteka hurbiltzen zareten guztiona. Mila esker.
Horiek horrela, azken bertso-gau honetara etortzeko deia egiten dizuegu beste behin ere, zuen gustukoa izango den saioa prestatzen saiatu baikara. Bertsolariak, honakoan… Joxe Juan Oiarzabal “Gurdiya”, Egoitz Zelaia, Abel Zabala, Alaia Martin, Haritz Casabal, Arkaitz Oiarzabal “Xamoa”, Patxi Castillo, Julen Zelaieta, Gotzon Aizpiolea, Beñat Gaztelumendi, Ando
ni Zelaia, Xabier Isasi, Aitor Errazkin, Exteban Martiarena, Iñigo Ugarte eta Urko Casado izango dira.
Bertsolari hauek guztiak gobernatzeko bi lagunen premia izan dugu oraingoan: Oinatz Mitxelena eta Eneko Sanchez arduratuko dira gaiak jartzeaz, Txingudiko Bertso Eskolako partaideak biak. Bertso jarriak, aldiz, Txingudiko Bertso Eskolako bertso-tailerreko lagunen eskutik helduko zaizkigu.
Anima zaitezte, beraz, ekainaren 2an, arratsaldeko 19:30etarako prestatu dugun bertsoaren festa handi honetara. Zuentzat da, entzuleentzat, merezi baituzue hainbeste. Ez dakigu zer irtengo den honetatik guztitik, hori ere egia da, baina… ez duzue jakin gabe geratu nahiko, ezta?
Mila esker beste behin ere guzti-guztioi hirugarren urtez jarraian, eta ostegunera arte!!!
Irunabar, Irungo bertsoaren bilgunea.
Hilaren bostean izango da 2016ko maiatzeko bertso gaua. Beti bezala, 19:30etatik aurrera, Peña kaleko lehendabizikoan. Honako honetan, bertso jarriak Abel Zabala irundarrak kantatuko ditu, eta oholtza gainean Urko Casado astigartarra, Manu Goiogana irundarra, eta Lesakatik Manolo Arozena eta Juan Mari Lopez izango ditugu (Goizuetako eta Oiartzungo semeak, azken bi hauek, baina Lesakara ezkonduak eta aspaldi luzean bertan bizi direnak). Lau bertsolari hauei gaiak jartzen Karlos Aizpurua oiartzuarra ariko da. Punta-puntakoa maiatzeko bertso-gaua ere, beraz!
Gogoan izan saioa eta gero Kabigorrik bertan afaltzen geratzeko aukera paregabea eskaintzen digula denoi.
Apirilaren 16an hartu genituen Txingudi taldekook goierritarrak gurean, Irunabarrek (Irungo bertsoaren bilgunea), Antxeta Irratiak eta EKTk (Bidasoako Kultur Elkartea) elkarlanean antolatutako bertso-bazkarian. EKT elkartean antolatu genituen otordua eta saioa bera, eta Antxeta Irratiak bere 15. urteurrena dela eta programatutako urte osoko egitarauaren barnean txertatu genuen ekimena.
Eguerdiko 13:00etarako hasi zen jendea EKTra biltzen, ordurako elkartea girotzen hasiak baitziren Aritz Erasun eta Aitziber Arruabarrena trikitilariak.
60 bazkaltiarretik gora bildu zen azkenerako, eta 14:00ak jota hasi ginen bazkaltzen, Antxeta Irratiko, Irunabarreko eta EKTko bozeramaile banak ongi etorria egin eta Bertsotruk ekimenaren zein elkarte antolatzaileen arteko elkarlanaren berri eman eta segidan. 16:30ak pasatxo ekin zion lanari Abel Zabala irundarrak, saiorako gaiak prestatu eta egunean bertan saioa gidatzeko ardura hartua zuen Irunabarreko kideak, eta Goierri eta Txingudi taldeen izenean kantuan hastear ziren bertsolariak aurkeztu zizkien entzuleei: Mikel Tapia, Ane Beloki eta Odei Lopez Goierritik, eta Urko Casado, Manu Goiogana eta Aitor Errazkin Txinguditik.
Saio gustagarri askoa egin zuten bertsolariek, eta entzulearen txaloak eta irriak lortu zituzten, ez gutxitan. Gaiei dagokienean, bertsolariek umoretik jo zezaten prestatua zituen Zabalak, eta hala egin zuten bertsolariek, aukera izan zuten guztietan. Bertsolariek ofizio bana burutzeko aukera izan zuten, eta, gainerakoan, hiru, lau eta sei lagunen artean burutu beharreko ariketei egin zieten aurre. Ia ordu eta hiru laurdeneko saioa eta gero, bertsolariak, antolatzaileak eta entzuleak, denak gustura. Lagun zahar eta berriak agurtu, elkartea jaso, erratza pasa, kontuak egin eta argiak itzali genituen, neke eta nahigabe punttuaz, baina datorren urtean berriz ere “Bertsotruk” berpiztuko dugun esperantzarekin.
Irunabarretik esker bereziak eman nahi dizkiegu Bertsotruk egitasmoak iraun duen bitartean laguntza eskaini diguten lagun guzti-guztiei eta saioetara hurbildu diren entzule guztiei, eta bereziki Joxeja Zabalo jarraitzaile sutsu eta eragile nekaezinari eta Julen Zelaieta bertsolari beratar prestuari. Biba zuek!
Txingudiko taldeak Txingudi-Goierri bertso-trukea antulatuta amaitutzat joko du, aurtengoz, behinik behin, bere Bertsotruk-a. Azken saioa izango da, beraz, gure eskualdeko bertso eskolakoontzat. Horiek horrela, Antxeta Irratia eta EKT gehitu zaizkigu saio honen antolaketan, eta luxua da hori guretzat; bertsolaritza herrian hedatzen laguntzen, eskualdeko irratia eta Bidasoako EKT izango ditugu, beraz; eta saioaren berri ematen laguntza ematen, gainera, beste hainbat eta hainbat lagun. Zer gehiago eska dezakegu guk? Pozik gaude, bistan da; eskerrik asko guztioi.
Antxeta Irratiko lagunek kartelaren diseinuaren, sarreren salmentaren eta antolakuntza mailako beste hamaika konturen ardura hartu dute (Antxeta Irratiaren proiektuak 15 urte bete ditu aurten, eta ekitaldiz josi nahi izan dute urtea; tartean, bertso-bazkari hau bera); EKT-k elkartearen egoitza bera eskaini du saioa antolatzeko, eta otorduaz eta zerbitzua antolatzeaz arduratuko da, besteak beste. Irunabarrekook bazkal osteko bertso saioren kargu egin gara gehienbat, baina baita EKT-ko zein Antxetako eragileekin elkarlana sustatzeaz ere.
Eskualde mailako elkarteen arteko elkarlan horrek gutxitan eman du emaitza txarrik gurean, eta horrek konfiantza ematen digu eskutik lanean dihardugun hiru elkarteoi. Izan ere, aski ongi dakigu gure ardura dela goierritarrak gurean eroso eta gustura senti daitezen, etxean bezala, eta etxean bezala senti daitezen nahi dugu, bistan da, saioa-entzun asmoz gerturatuko diren bazkaltiar guztiak ere.
Ez da helburu makala, baina gure aldetik daukagun guztia ematera goaz, eta hori beti izan dugu jendearen esker ona jasotzeko berme.
Anima zaitezte guztiok bertso-bazkari honetan parte hartzera. Jakingarri guztiak kartelean dituzue. Eta kontuan izan, bazkaria 14:00etan hastekoa bada ere, 13:00etik aurrera izango dela zabalik EKTko taberna, eta trikitilariak izango direla zain, zuei guztioi harrera egiteko. SARRERAK, Irungo Sunbilla eta Hazia eta Hondarribiko Itxaropena tabernetan salgai, 15 €an!
Goza dezagun!
Txingudiko Bertso Eskolako Bertso-tailerrak HITZALDIA antolatu du Joxe Mari Lopetegiri buruz, datorren asteazken honetarako (2016-04-13), Oiasso Irungo Erromatar Museoan, arratsaldeko 19:00etatik aurrera. Joxan Elosegi idazle eta itzultzaile irundarrak emango du hitzaldia. Izan ere, berak idatzia da Joxe Mari Lopetegi, Errepublikanoen bertsolaria liburua (Paper Hotsak, 2004).
Txingudiko Bertso Eskolako Bertso-tailerreko kideak Joxe Mari Lopetegi bertsolari irundarra zenaren bizitza eta bertsogintza aztertzen aritu dira 2015eko urritik hona, eta jarduera multzo interesgarria prestatu dute, hura nor izan zen herritar guztioi azaltzeko asmoz.
Apirilaren 9an, larunbatarekin, Bertso-tailerreko kideek Irungo Udal Liburutegian prentsaurreko bat ematea zuten helburu, baina post hau argitaratutako unean horretarako baimenaren berririk ez dutenez oraindik, hedabideei prentsa ohar bat bidalita konformatu beharko dutela dirudi.
Jakin dugunez, prentsaurreko horretan eman nahi zuten ikasturte osoan zehar egindako lanaren berri, eta Joxe Mari Lopetegi bertsolaria ezagutarazteko osatu duten egitaraua herriari aurkeztu, bide batez.
Post honen bidez, beraz, jakinarazi nahi dizuegu Bertso-tailerreko kideek prestatutako ekimen guztien berri jarriko dugula Irunabarreko blog honetan.
Erne egon, beraz, laster hasiko baikara jarduera guztiei buruzko berri ematen.
Bien bitartean, ongi izan.
IRUNABAR, Irungo bertsoaren bilgunea
Talde eragilea.
Martxoaren 10ean eman zitzaion hasiera Hendaia Euskarazi, herriko etxean ospatu ekitaldian. Txingudiko Bertso Eskolako Andoni Zelaiak “Bertso Tailerrean” ondutako bertso sorta kantatu zuen, Aitor Errazkin bertso eskolako kidea eta Hendaiako musikari prestu bat gitarrarekin laguntzaile izan zituela.
HENDAIA EUSKARAZ
2016-III-11
Ekitaldian parte hartuaz
bertsozko lehen urratsa
gertutasuna adieraziz
kenduko dugu arantza.
Hitz jokoekin margotutako
eguna nola arratsa
beste urtetan bezala aurten
martxoak hartzen du martxa.
Beraz, Hendaian euskararentzat
banderaren igoera,
hura maitatu ta erabili
beraren parte baikera.
beste hizkuntzak hor daude baina
gurea bultza aurrera,
euskaraz bizi nahi duenak
izan dezala aukera.
Eguneroko bizitza duina
gure eskutan hartzea,
zer ederrago gure herrian
gure hitzak mintzatzea.
Gerta daiteke zabarkeriaz
gure altxorra galtzea;
gauza normala izan behar du
guk euskaraz bizitzea.
Mundu globala zein den handia
txikiak behar arreta…
Euskal Herria bere ttikian
berari gure apeta.
Hiru hizkuntza daude Hendaian
hori ez da berriketa!
Bertsoen bidez egiten dugu
euskararen ariketa.
Entzuteko zain gure hizkuntza
anitz balitz, hala bedi.
Baikor jarrera eskua luza
elkarri laguntzen segi.
Eguneroko solas txikiak
itxaron gabe gehiegi,
euskararekin jantzi daitezen
Bidasoaren alde bi.
Zorte on opa hendaiatarrei,
berotzen doa giroa.
Alaitasunez bizi dezagun
oraina eta geroa.
Udaberria kax-kax atea
joka duen urtaroa
euskararentzat hilabete hau
izan bedi oparoa.
 | Gipuzkoako Herriarte…(e)k Txingudi A taldea aurrera, Gip… bidalketan |
 | Urko Etxebeste(e)k Txingudi A taldea aurrera, Gip… bidalketan |
| Gipuzkoako Herriarte…(e)k M-28, egun betea Donostian eta… bidalketan |
Irunabar, Irungo bertsoaren bilgunea 